ព័ត៌មានជាតិ
ប្រធានមន្ទីរអប់រំត្បូងឃ្មុំ ៖ ប្រឡងគ្រូជាប់កិច្ចសន្យាអនុវត្តតាមគោលការណ៍ តម្លាភាព និងយុត្តិធម៌ មិនមែនប្រឡងបង្គ្រប់កិច្ចទេ
លោក ផាត សុខសាន្ត ប្រធានមន្ទីរអប់រំ យុវជន និងកីឡាខេត្តត្បូងឃ្មុំ បានមានប្រសាសន៍កាលពីព្រឹកថ្ងៃទី ២៨ មករា ថា ដំណើរការប្រឡងជ្រើសរើសគ្រូបង្រៀនជាប់កិច្ចសន្យាចំណេះទូទៅនៅឆ្នាំនេះ មន្ទីរ នឹងអនុវត្តតាមគោលការណ៍របស់ក្រសួងអប់រំ យុវជន និងកីឡា គឺ តម្លាភាព យុត្តិធម៌ និងលទ្ធផលទទួលយកបាន អ្នកចេះគឺជាប់ មិនមែនដូចពាក្យចចាមអារ៉ាមដែលថាការប្រឡងនេះដើម្បីជាការបង្គ្រប់កិច្ចនោះទេ។
លោកប្រធានមន្ទីរ បានបន្តថា ការប្រឡងជ្រើសរើសគ្រូបង្រៀនជាប់កិច្ចសន្យាឆ្នាំនេះ មន្ទីរបានចាប់ផ្តើមទទួលពាក្យប្រឡងចាប់ពីថ្ងៃទី ១៨ រហូតដល់ថ្ងៃទី ៥ ខែកុម្ភៈ ឆ្នាំ ២០២៥ និងរៀបចំការប្រឡងនៅចន្លោះថ្ងៃទី ៧ ដល់ថ្ងៃទី ១០ កុម្ភៈ រហូតមកដល់ពេលនេះមានបេក្ខជនដាក់ពាក្យជិត ២០០ នាក់ហើយ ឆ្នាំនេះ ជ្រើសរើសតែ ៤៩ នាក់ទេ ដែលជាកូតាសម្រាប់បំពេញគ្រូជាប់កិច្ចសន្យាចាស់ដែលបានលាឈប់ដោយសារមួយចំនួនទៅបំពេញការងារផ្សេង និងមួយចំនួនទៀតអសកម្មដែលតាមការវាយតម្លៃដោយគណៈកម្មការថានានុក្រមត្រូវដកគាត់ចេញ។ ការជ្រើសរើសគ្រូជាប់កិច្ចសន្យា ៤៩ នាក់ ត្រូវធ្វើតេស្ត និងវាស់វែងសមត្ថភាពពួកគាត់ផ្នែកវប្បធម៌ទូទៅ និងវិធីសាស្ត្របង្រៀន។
លោកប្រធានមន្ទីរ បានបន្តទៀតថា ការរៀបចំធ្វើតេស្តប្រឡងនេះ មន្ទីរសហការជាមួយមន្ទីរមុខងារសាធារណៈខេត្ត ដោយអនុវត្តតាមគោលការណ៍របស់ក្រសួងអប់រំ យុវជន និងកីឡា គឺ ប្រឡងដោយតម្លាភាព យុត្តិធម៌ និងលទ្ធផលទទួលយកបាន អ្នកចេះគឺជាប់។
លោកប្រធានមន្ទីរ បានឱ្យដឹងទៀតថា លក្ខខណ្ឌជ្រើសរើសគឺយកសិស្សដែលមានសញ្ញាបត្រទុតិយភូមិឡើងទៅ ឬមានសញ្ញាបត្រសមមូល ហើយការជ្រើសរើសយកអាទិភាពសម្រាប់បេក្ខជនមានមូលដ្ឋាននៅក្នុងភូមិ ឃុំ និងស្រុកតែម្តង ដើម្បីមានភាពងាយស្រួលដល់ការបង្រៀន និងបង្រៀនបានយូរអង្វែង។
លោកប្រធានមន្ទីរ បានអំពាវនាវដល់អាណាព្យាបាលមាតាបិតា កុំមានការជឿលើពាក្យចចាមអារ៉ាមដែលបានលើកឡើងថា ដំណើរការប្រឡងជ្រើសរើសគ្រូបង្រៀនជាប់កិច្ចសន្យាចំណេះទូទៅគឺជាការប្រឡងបង្គ្រប់កិច្ច មានអ្នករត់ការស៊ីសំណូកសូកប៉ាន់គ្រប់រូបភាពជាថ្នូរនឹងការប្រឡងជាប់ ឬក៏មិនចាំបាច់មកប្រឡងក៏ជាប់ ឬក៏បិទប៉ុស្តិ៍មិនឱ្យបេក្ខជនដាក់ពាក្យប្រឡងដោយប្រកាណាមួយ។
លោកប្រធានមន្ទីរ បានធានាអះអាងថា «មន្ទីរអបរំ និងមន្ទីរមុខងារសាធារណៈខេត្ត រៀបចំការប្រឡងដោយយុត្តិធម៌ សុក្រឹត និងផ្តល់ឱកាសស្មើៗ គ្នា ដល់បេក្ខជនគ្រប់រូបគឺធានាថាអ្នកចេះគឺជាប់ដោយមិនមាននរណាម្នាក់អន្តរាគមន៍ទេ ហើយក៏មិនមានការសូកប៉ាន់ណាមួយជាថ្នូរនឹងការប្រឡងជាប់នោះទេ សូមមានការជឿជាក់ទៅលើការរៀបចំខេត្តក្នុងការស្វែងរកអ្នកចេះពិតប្រាកដ ទើបអាចបង្រៀន និងផ្តល់ចំណេះដឹងដល់សិស្សកាន់តែប្រសើរនៅក្នុងខេត្ត»។
យោងតាមសេចក្តីប្រកាសព័ត៌មានរបស់មន្ទីរអប់រំ យុវជន និងកីឡាខេត្តត្បូងឃ្មុំ ចុះថ្ងៃទី ២៧ ខែមករា បានឱ្យដឹងថា មន្ទីរអប់រំ យុវជន និងកីឡាខេត្តត្បូងឃ្មុំ សូមប្រកាសបដិសេធ និងច្រានចោលទាំងស្រុងចំពោះពាក្យចចាមអារ៉ាមគ្មានមូលដ្ឋានច្បាស់លាស់ និងចរិតបំពុលសង្គមដែលធ្វើឱ្យសាធារណជនជាអាណាព្យាបាលសិស្សមានការភាន់ច្រឡំ ព្រមទាំងស្នើសុំឱ្យផ្តល់ព័ត៌មានពិតមកមន្ទីរអប់រំ យុវជន និងកីឡាខេត្ត តាមរយៈលេខទូរស័ព្ទ ០៧១៩៤៥ ៧៧៧៧ ឬក៏តាមរយៈហ្វេសបុកផេក មន្ទីរអប់រំ យុវជន និងកីឡាខេត្តត្បូងឃ្មុំ ដើម្បីឱ្យ មន្ទីរ អប់រំ យុវជន និងកីឡាខេត្ត មានមូលដ្ឋានក្នុងការស្វែងរកជនខិលខូចទាំងនោះអនុវត្តការងារតាមនីតិវិធីច្បាប់ជាធរមាន៕
អត្ថបទ ៖ សំអឿន
Ronaldo ជម្រុញឱ្យសិស្សប្អូននៅ ព័រទុយហ្គាល់ ម្នាក់ផ្លាស់ទៅ Man UTD
ស្រាបៀរ Heineken® បាននាំមកនូវផលិតផលថែរក្សាស្បែក Heineken® Smootheriser ដែលមានចំនួនកំណត់មកប្រទេសកម្ពុជា
ប្អូនប្រុស វ៉ាង ស្រីណូ ចេញមុខសុំទោសស្ថាប័ន Majestic Cambodia ក្រោយរិះគន់មិនសំចៃមាត់
អ្នកនាំពាក្យគ្រោះមហន្តរាយ ៖ កម្ពុជា មិនមានកន្លែងណាមួយកើតមាន បញ្ហារញ្ជួយដីទេ
ផន ស្រីពី មោទនភាព ព្រោះបានរួមចំណែកការងារសង្គម និងស្វែងយល់ពីប្រវត្តិសាស្រ្តជាតិ នៅខេត្តស្ទឹងត្រែង
-
ព័ត៌មានអន្ដរជាតិ២២ ម៉ោង agoកម្មករសំណង់ ៤៣នាក់ ជាប់ក្រោមគំនរបាក់បែកនៃអគារ ដែលរលំក្នុងគ្រោះរញ្ជួយដីនៅ បាងកក
-
ព័ត៌មានអន្ដរជាតិ៤ ថ្ងៃ agoរដ្ឋបាល ត្រាំ ច្រឡំដៃ Add អ្នកកាសែតចូល Group Chat ធ្វើឲ្យបែកធ្លាយផែនការសង្គ្រាម នៅយេម៉ែន
-
សន្តិសុខសង្គម២ ថ្ងៃ agoករណីបាត់មាសជាង៣តម្លឹងនៅឃុំចំបក់ ស្រុកបាទី ហាក់គ្មានតម្រុយ ខណៈបទល្មើសចោរកម្មនៅតែកើតមានជាបន្តបន្ទាប់
-
ព័ត៌មានជាតិ១ ថ្ងៃ agoបងប្រុសរបស់សម្ដេចតេជោ គឺអ្នកឧកញ៉ាឧត្តមមេត្រីវិសិដ្ឋ ហ៊ុន សាន បានទទួលមរណភាព
-
ព័ត៌មានជាតិ៤ ថ្ងៃ agoសត្វមាន់ចំនួន ១០៧ ក្បាល ដុតកម្ទេចចោល ក្រោយផ្ទុះផ្ដាសាយបក្សី បណ្តាលកុមារម្នាក់ស្លាប់
-
ព័ត៌មានអន្ដរជាតិ៥ ថ្ងៃ agoពូទីន ឲ្យពលរដ្ឋអ៊ុយក្រែនក្នុងទឹកដីខ្លួនកាន់កាប់ ចុះសញ្ជាតិរុស្ស៊ី ឬប្រឈមនឹងការនិរទេស
-
សន្តិសុខសង្គម២១ ម៉ោង agoការដ្ឋានសំណង់អគារខ្ពស់ៗមួយចំនួនក្នុងក្រុងប៉ោយប៉ែតត្រូវបានផ្អាក និងជម្លៀសកម្មករចេញក្រៅ
-
ព័ត៌មានអន្ដរជាតិ៣ ថ្ងៃ agoតើជោគវាសនារបស់នាយករដ្ឋមន្ត្រីថៃ «ផែថងថាន» នឹងទៅជាយ៉ាងណាក្នុងការបោះឆ្នោតដកសេចក្តីទុកចិត្តនៅថ្ងៃនេះ?