ព័ត៌មានជាតិ

សហគមន៍ ទុរេនបែកអន្លូង បង្កើតឡើងដើម្បីជួយកសិករក្នុងខេត្តកំពង់ចាម

បានផុស

១ ខែ មុន

នៅ

ថ្ងៃសុក្រ ៣១ មករា ២០២៥

ដោយ

កសិករដាំទុរេន ក្នុងភូមិសាស្ត្រខេត្តកំពង់ចាម ពេលនេះបានចងក្រងបង្កើតសហគមន៍ទុរេនបែកអន្លូង លើកដំបូង ខណៈបច្ចុប្បន្នមានម្ចាស់ចំការទុរេនជាង៥០នាក់ហើយ បានចូលជាសមាជិកសហគមន៍មួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហេង ឆេងលី ប្រធានសហគមន៍ ទុរេនបែកអន្លូង នៅស្រុកស្ទឹងត្រង់បានឲ្យដឹងថា នេះជាលើកដំបូងហើយសម្រាប់អ្នកស្រុកបែកអន្លូង ដែលអាចបង្កើត និងចងក្រងគ្នាជាសហគមន៍នោះ ព្រោះកន្លងមកពុំមានសហគមន៍បែបនេះឡើយ ពោលគឺម្ចាស់ចំការនីមួយៗធ្វើទៅតាមទំនៀមប្រពៃណីរបស់ខ្លួនទាំងការដាំដុះថែទាំ និងពេលប្រមូលផល។

លោក ហេង ឆេងលី សង្ឃឹមថា សមាជិកសមាជិកាទាំងអស់នឹងរួមគ្នាដើម្បីសហគមន៍ទុរេនបែកអន្លូងមួយនេះមានភាពរីកចម្រើន និងមិនជួបឧបសគ្គចំពោះការបង្កបង្កើនផលដំណាំទុរេនមួយនេះ។

លោក សុឹម ថាវីរៈ ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ចាម បានឲ្យដឹងថា ការបង្កើតសហគមន៍នៅពេលនេះ គឺជាប្រវត្តិសាស្ត្រមួយហើយដែលម្ចាស់ចំការចេះសហការគ្នាចងក្រងជាសហគមន៍នោះ ដែលអាចជួយឲ្យមន្ត្រីជំនាញងាយស្រួលស្រួលក្នុងផ្តល់ជាធាតុចូល លើការថែទាំ បច្ចេកទេសដំណាំ និងស្វែងរកដៃគូសហការបញ្ជាទិញផងដែរ។

លោកប្រធានមន្ទីរបញ្ជាក់ទៀតថា ពិធីបំបោសផ្កាទុរេននេះក៏បង្ហាញពីប្រពៃណីវប្បធម៍របស់អ្នកចំការដាំទុរេនផងដែរ ដែលអាចជួបជុំសប្បាយរីករាយ និងអាចផ្តល់ប្រឹក្សាគ្នាទៅវិញទៅមកលើច្ចេកទេសដាំដុះថែទាំជាដើម៕

អត្ថបទ៖ ឡេក ចាន់ពេជ្រ