អ្នកនាំពាក្យ៖ ក្រសួងដាក់ពង្រាយក្រុមឆ្លើយតបបន្ទាន់ ១៦០នាក់ តាមព្រំដែនទឹក គោក និងអាកាស ទប់ស្កាត់ ជំងឺឆ្លង ថ្មីៗ

លោកវេជ្ជបណ្ឌិត លី សូវ៉ាន់ អ្នកនាំពាក្យក្រសួងសុខាភិបាល និងជាប្រធាននាយកដ្ឋានប្រយុទ្ធនឹង ជំងឺឆ្លង បានមាន
ប្រសាសន៍នៅព្រឹកថ្ងៃទី៣១ មករានេះ ថា ក្រសួងបានដាក់ពង្រាយក្រុមឆ្លើយតបបន្ទាន់តាមច្រកព្រំដែនទឹក
គោក និងអាកាស ដើម្បីទប់ស្កាត់ ជំងឺឆ្លង ថ្មីៗ ដែលកំពុងកើតឡើងនាពេលបច្ចុប្បន្ន និងទៅថ្ងៃអនាគត។

លោកវេជ្ជបណ្ឌិតបានបន្តថា «យើងមានមន្រ្តីសុខាភិបាលតាមព្រំដែន (មន្រ្តីចត្តាឡីស័ក) ផ្លូវគោក អាកាស ផ្លូវទឹក សរុបចំនួន ១៦០នាក់ នៅច្រកចំនួន៥១ ។ យើងមិនបង្កើនចំនួនទេ តែបន្តពង្រឹង និងបង្កើនសមត្ថភាព»។

ក្នុងឱកាសជួបសំណេះសំណាល និងផ្ដល់អនុសាសន៍លើការអនុវត្តការងារជូនដល់ថ្នាក់ដឹកនាំ និងមន្រ្តីរាជការ
នាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល កាលពីដើមខែមករា លោកសាស្រ្តាចារ្យ ឈាង រ៉ា
រដ្ឋមន្រ្តីក្រសួងសុខាភិបាល ឱ្យពង្រឹងប្រសិទ្ធភាពការងារទាក់ទងជាមួយនឹងជំងឺឆ្លង ដោយនវានុវត្តន៍ និងបុរេសកម្ម
បង្កើនការសហការ និងសហប្រតិបត្តិការជាមួយនាយកដ្ឋាន អន្តរស្ថាប័ន មន្ទីរពេទ្យ និងអង្គការដៃគូ ពង្រឹងសមត្ថភាពបុគ្គលិកក្នុងការឆ្លើយតបបន្ទាន់ ទៅនឹងជំងឺឆ្លង និងគ្រោះអាសន្នសុខភាពសាធារណៈផ្សេងទៀត បង្កើនការចូលរួមពីសហគមន៍ដើម្បីរាយការណ៍អំពីជំងឺឆ្លង និងព្រឹត្តិការណ៍សុខភាពសាធារណៈនានាឱ្យបានទាន់ពេលវេលា
ពង្រឹងការប្រើប្រាស់ប្រព័ន្ធបច្ចេកវិទ្យា និងនវានុវត្តន៍ និងត្រៀមផែនការឆ្លើយតបទៅនឹងជំងឺឆ្លងកើតថ្មី និងជំងឺឆ្លងលេចឡើងសារជាថ្មី៕

អត្ថបទ៖ សំអឿន