លោក ហ៊ុយ វណ្ណៈ អំពាវនាវដល់អ្នកប្រើAI ឈប់យករូបថតរូបសំណាកនានាទៅធ្វើឱ្យមានចលនាទៀត ព្រោះប៉ះពាល់ដល់វប្បធម៌ខ្មែរ

លោក ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា បានផុសលើបណ្តាញសង្គមហ្វេសប៊ុកនាថ្ងៃទី៣០ ខែមករា ឆ្នាំ២០២៥ អំពាវនាវដល់អ្នកដែលប្រើ AI យករូបថតរូបសំណាកនានា ដែលតំណាងឱ្យខេត្ត ឬវប្បធម៌ខ្មែរ ទៅធ្វើឱ្យមានចលនា ដែលធ្វើឱ្យប៉ះពាល់ខ្លាំងដល់វប្បធម៌ ព្រលឹងដូនតាខ្មែរ។

ការអំពាវនាវនេះ ធ្វើឡើងស្របពេលដែលប៉ុន្មានថ្ងៃនេះ សង្កេតឃើញនៅលើបណ្តាញសង្គម បានយករូបថត រូបសំណាកព្រះថោងតោងស្បៃនាងនាគ ដែលជារូបសំណាកស្ថិតនៅខេត្តព្រះសីហនុ ទៅធ្វើឱ្យមានចលនាចេញពីកន្លែងដើម ឬ ចលនាផ្សេងៗ ដែលខុសពីទម្រង់ដើមដោយប្រើបច្ចេកវិទ្យា AI។

ត្រង់ចំណុចនេះ លោក ហ៊ុយ វណ្ណៈ បានអំពាវនាវថា៖ “បើឈប់បាន សូមឈប់! ប៉ុន្មានថ្ងៃនេះ ខ្ញុំឃើញបងប្អូនខ្លះ បានប្រើបច្ចេកវិទ្យា AI កែច្នៃរូបសំណាកនានា ឱ្យមានចលនា ដោយរូបសំណាកខ្លះ បានច្នៃឱ្យរត់ពីកន្លែងមួយទៅកន្លែងមួយ។ ការច្នៃរូបសំណាកជាទីសក្ការៈ មានប្រវត្តិនិងភាពអច្ឆរិយៈ ឱ្យទៅមនុស្សយន្ត ឬកុក្កតា គឺជាការបំផ្លាញគុណតម្លៃវប្បធម៌ ព្រលឹងដូនតា និងព្រលឹងជាតិយើង”។

លោកក៏បានបន្ថែមថា ចំពោះសកម្មជននយោបាយមួយចំនួន ក៏បាន​ប្រើបច្ចេកវិទ្យា AI យករូបថ្នាក់ដឹកនាំជាតិទៅច្នៃដើម្បីបម្រើឧបករណ៍នយោបាយហិង្សារបស់ខ្លួន ដោយលោកបញ្ជាក់ថា ទង្វើទាំងអស់នេះ មិនគួរធ្វើទាល់តែសោះ។ លោក ហ៊ុយ វណ្ណៈ ក៏បានសរសេរណែនាំ គួរឆ្លៀតឱកាសនេះ មកពង្រឹងសាមគ្គីជាតិ រៀនគោរព រៀនទទួលស្គាល់ រៀនបំពេញឱ្យគ្នា ដើម្បីរួមជាកម្លាំងមួយ និងរួមគ្នាបន្តកសាងជាតិឱ្យកាន់តែរីកចម្រើន និងមានការអភិវឌ្ឍបន្ថែម។

លោក ហ៊ុយ វណ្ណៈថា៖ “កូនៗរបស់យើង ត្រូវបន្តរស់ក្នុងសង្គមមួយនេះ ប្រកបដោយបរិយាកាសថ្លៃថ្នូរ និងស៊ីវិល័យទាំងអស់គ្នា”។

យ៉ាងណា បន្ទាប់ពីលោកបានសរសេរសំណេរនេះនៅលើហ្វេសប៊ុក ក៏មានមតិជាច្រើន បានបញ្ចេញមតិគាំទ្រ និងឯកភាព ចំពោះការលើកឡើងរបស់លោកផងដែរ៕