អាជ្ញាធរជាតិអប្សរា បញ្ជាក់ថា ស្ត្រីភ្នាក់ងារទេសចរដែលគេថតបង្ហោះ គឺមានបញ្ហាសុខភាព មិនមែនងងុយគេងឡើយ

នៅថ្ងៃទី៣០ ខែមករា ឆ្នាំ២០២៥ អាជ្ញាធរជាតិអប្សរា បានចេញសេចក្តីប្រកាសច្រានចោលនូវវីដេអូដែលបានថតបង្ហោះស្ត្រីភ្នាក់ងារទេសចរប្រចាំប្រាសាទអង្គរវត្ត គឺមិនមែនងងុយគេងម៉ោងការងារដូចការលើកឡើងទេ ពោល គឺមានបញ្ហាសុខភាព។

សេចក្តីប្រកាសនេះ ធ្វើឡើងបន្ទាប់ពីមានវីដេអូមួយត្រូវបានបង្ហោះលើបណ្តាញសង្គមពេលដែលស្ត្រីភ្នាក់ងារទេសចរអង្គុយឱបពោះ និងទម្រេតក្បាលលើរនាំង ស្របពេលមានភ្ញៀវទេសចរជាតិ និងអន្តរជាតិជាច្រើន កំពុងតម្រង់ជួរចាំឡើងទស្សនាប្រាង្គកណ្តាលនៃប្រាសាទអង្គរវត្ត។

ជុំវិញករណីនេះ អាជ្ញាធរជាតិអប្សរាបញ្ជាក់ថា ការបង្ហោះនោះគឺមិនពិតនោះទេ ហើយបង្កជាការយល់ច្រឡំលើស្ត្រីភ្នាក់ងារទេសចរប្រចាំប្រាសាទអង្គរវត្ត ព្រោះស្ត្រីខាងលើចុកពោះ ទើបអង្គុយឱបពោះ និងទម្រេតទីរនាំង មិនស្ថិតក្នុងការងងុយគេងក្នុងម៉ោងបំពេញការងារឡើយ។ បន្ថែមពីនេះ អាជ្ញាធរជាតិអប្សរាបញ្ជាក់ទៀតថា នៅក្បែរភ្នាក់ងារទេចរដែលឈឺនោះ ក៏មានភ្នាក់ងារទេសចរ២រូបទៀត នៅចាំជួយសម្របសម្រួលដល់ភ្ញៀវទេសចរឡើងចុះជណ្តើរប្រាសាទអង្គរវត្តផងដែរ។

ជាមួយគ្នានេះ អាជ្ញាធរជាតិអប្សរាក៏តែងតែណែនាំដល់ភ្នាក់ងារទេចរត្រូវសុំច្បាប់សម្រាកប្រសិនជាមានបញ្ហាសុខភាព ដើម្បីថែរក្សាសុខភាពឱ្យបានល្អ ចៀសវាងធ្វើឱ្យប៉ះពាល់ដល់ភ្ញៀវទេសចរជាតិ និងអន្តរជាតិ។ អាជ្ញាធរជាតិអប្សរាបង្ហាញពីការសោកស្តាយចំពោះការបង្ហោះវីដេអូ ជាមួយនឹងការអធិប្យាយមិនពិតនេះ ដែលមិនមែនបង្ហាញពីការរិះគន់ដើម្បីស្ថាបនាឡើយ ថែមទាំងប៉ះពាល់ដល់កិត្តិយស និងសេចក្តីថ្លៃថ្នូររបស់ស្ត្រីដែលខិតខំបំពេញការងារផងដែរ៕