លើកនេះ! អង្គរវត្ត វ៉ាដាច់ បារាំង និងអូស្រ្តាលី ក្លាយជាទីកន្លែងទស្សនាដ៏ល្បីបំផុតក្នុងពិភពលោក

សម្តេចនាយករដ្ឋមន្រ្តី ហ៊ុន ម៉ាណែត នៅថ្ងៃទី ០២ ខែកុម្ភៈនេះ បានបង្ហោះសារនៅលើបណ្តាញសង្គម ចូលរួមអបអរសាទរ ដែលប្រាសាទអង្គរវត្ត បានជាប់ឈ្មោះជាទីកន្លែងទស្សនាដ៏​ល្បី​បំផុត​នៅក្នុង​ពិភពលោក ក្នុងចំណោមកន្លែងល្បីៗបំផុតទាំង៣២ ។

យោងតាមការចុះផ្សាយគេហទំព័រ U.S News & World Report ស្តីពីការធ្វើដំណើរជុំវិញពិភពលោកដើម្បីស្វែងរកទីតាំងប្រវត្តិសាស្ត្រដ៏គួរឱ្យចាប់អារម្មណ៍ បានចាត់ថ្នាក់ ប្រាសាទអង្គរវត្ត ស្ថិតនៅលើកំពូលតារាងលេខ១ ដេញតាមពីក្រោយដោយចំណាត់ថ្នាក់លេខ២ គឺ Sydney Opera House: Sydney (ប្រទេសអូស្រ្តាលី) និង Eiffel Tower: Paris (ប្រទេសបារាំង)។

ប្រភពដដែល បានគូសរំលេចថា ប្រាសាទបុរាណដែលលាតសន្ធឹងពាសពេញឧទ្យានបុរាណវិទ្យាអង្គរ គឺជាកន្លែងបុរាណវត្ថុដ៏សំខាន់បំផុតមួយរបស់អាស៊ីអាគ្នេយ៍។ ប្រាសាទអង្គរវត្ត ដែលជាបេតិកភណ្ឌពិភពលោករបស់អង្គការយូណេស្កូនេះ បង្ហាញពីសំណល់នៃរាជធានីនៃអាណាចក្រខ្មែរពីសតវត្សទី៩ ដល់សតវត្សទី ១៥ រួមទាំងបូជនីយដ្ឋានសាសនាដ៏ធំបំផុតរបស់ពិភពលោក។

តាមការចុះផ្សាយរបស់ U.S News & World Report ក៏បានណែនាំដល់អ្នកធ្វើដំណើរជុំវិញពិភពលោក
សូមពិចារណាកក់ដំណើរកម្សាន្តទេសចរណ៍ មកមើលប្រាសាទអង្គរវត្ត ដើម្បីយល់កាន់តែច្បាស់ពីប្រវត្តិរបស់ប្រាសាទ និងស្ថាបត្យកម្មខ្មែរដ៏អស្ចារ្យ។ ប្រភពដែលបញ្ជាក់ទៀតថា៖« មុននឹងចាកចេញពីរមណីយដ្ឋានបុរាណ អ្នកទេសចរត្រូវប្រាកដថាឡើងដល់កំពូលប្រាសាទអង្គរវត្តដើម្បីទទួលបានទិដ្ឋភាពដ៏អស្ចារ្យពិតប្រាកដ។ បន្ទាប់ពីទស្សនាប្រាសាទអង្គរវត្ត អ្នកទេសចរមិនគួរមើលរំលងទស្សនា​ប្រាសាទបាយ័នឡើយ»។

ក្នុងឆ្នាំ ២០២៤ រមណីដ្ឋានបុរាណអង្គរ ដែលជាកន្លែងទេសចរណ៍ដ៏ទាក់ទាញនៅកម្ពុជា ទទួលបានភ្ញៀវទេសចរបរទេសជាង ១ លាននាក់។ ចំនួននេះមានការកើនឡើងជាង ២៨  ភាគរយ ធៀបនឹងរយៈពេលដូចគ្នាកាលពីឆ្នាំ ២០២៣ ដែលមានភ្ញៀវទេសចរបរទេស ៧៩៨,០៦៩ នាក់។

ក្នុងនោះគ្រឹះស្ថានអង្គរ​ រកចំណូលបានជាង ៤៧ លានដុល្លារ ពីការលក់សំបុត្រចូលទស្សនា មានការកើនឡើង ជាង ២៨ ភាគរយ។ នេះបើយោងតាមរបាយការណ៍ពីគ្រឹះស្ថានអង្គរដែលគ្រប់គ្រងការលក់សំបុត្រចូលទស្សនា៕