អភិបាលក្រុងអរិយក្សត្រស្នើពលរដ្ឋកុំជក់បារីលើសាឡាង ព្រោះប៉ះពាល់សុខភាពអ្នករួមដំណើរ  

អភិបាលក្រុងអរិយក្សត្រ លោក ចាន់ តារា បានស្នើដល់ប្រជាពលរដ្ឋកុំឱ្យជក់បារីនៅលើសាឡាង ដោយលោកអភិបាលបញ្ជាក់ថា ដើម្បីបញ្ចៀសផលប៉ះពាល់ដល់សុខភាពអ្នកដែលរួមដំណើរជាមួយនៅលើសាឡាង ឬទូកចម្លង។

ការស្នើរបស់អភិបាលក្រុងអរិយក្សត្រ ក្រោយមានសំណូមពរពីសំណាក់ប្រជាពលរដ្ឋ ដែលធ្វើដំណើរឆ្លងសាឡាង និងទូកចម្លង ពាក់ព័ន្ធ នឹងការជក់បារីនៅសាឡាងចម្លងពីភ្នំពេញ ទៅអរិយក្សត្រ និងភ្នំពេញ ទៅស្វាយជ្រំ។ ក្រោយពីបានទទួលសំណូមពរនេះ លោក ចាន់ តារា បានស្នើសុំដល់ប្រជាពលរដ្ឋ ដែលធ្វើដំណើរតាមសាឡាង និងទូកចម្លង កុំជក់បារី ពេលកំពុងធ្វើដំណើរលើសាឡាង ព្រោះវាអាចបង្ករផលប៉ះពាល់ដល់សុខភាពអ្នកដទៃ ដែលកំពុងធ្វើដំណើររួមជាមួយ ជាពិសេសស្ត្រីមានផ្ទៃពោះ ទារក និងកុមារ ដែលងាយរងគ្រោះពីផ្សែងបារី។  

លោកអភិបាលក្រុង ក៏បានរៀបចំដាក់ស្លាកសញ្ញា ហាមជក់បារី គ្រប់សាឡាងចម្លងទាំងអស់ និងថែមទាំងបានហាមិនឱ្យមានការដាក់លក់បារីនៅលើសាឡាងនោះឡើយ៕ ដោយ៖ ធឿន វ៉ាន់សុង