ព័ត៌មានជាតិ

ប្រធានមន្ទីរ ៖ បញ្ហាខ្វះគ្រូបង្រៀន នៅសាលាបឋមសិក្សាទួលកី បានដោះស្រាយបញ្ចប់

បានផុស

១ ខែ មុន

នៅ

ថ្ងៃអង្គារ ៤ កុម្ភៈ ២០២៥

ដោយ

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡា បានមានប្រសាសន៍នៅព្រឹកថ្ងៃទី ០៤ កុម្ភៈ នេះថា បញ្ហាខ្វះគ្រូបង្រៀន នៅសាលាបឋមសិក្សាទួលកី ដែលធ្វើឱ្យសាលាត្រូវដាក់សិស្សក្នុង ០១ ថ្នាក់ ជិត ១៥០ នាក់ ត្រូវបានដោះស្រាយបញ្ចប់ជាស្ថាពរ បន្ទាប់ពីអភិបាលរាជធានីភ្នំពេញបានស្នើឱ្យគ្រូកិច្ចសន្យា ០២ នាក់ ដែលសាលាបានបញ្ឈប់ឱ្យចូលបង្រៀនធម្មតាវិញ និងជួយឧបត្ថម្ភថវិកាប្រចាំខែ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកប្រធានមន្ទីរ បានបន្តថា បញ្ហាដែលសាលាបឋមសិក្សាទួលកីខ្វះគ្រូ និងធ្វើឱ្យចំនួនសិស្សកើនច្រើន ជាពិសេសថ្នាក់ទី ០១ និងថ្នាក់ទី ០២ មានចំនួន ១៤៨ នាក់ ក្នុង ០១ ថ្នាក់ នេះ ដោយសារសាលាមានសិស្សសរុប ៩២៨ នាក់ ចែកជា ១៣ ថ្នាក់ គ្រូបង្រៀនក្របខណ្ឌ ចំនួន ០៨ នាក់ គ្រូបង្រៀន ០២ ពេល ០៣ នាក់ និងគ្រូបង្រៀនចូលនិវត្តន៍ ចំនួន ០២ នាក់។

លោកប្រធានមន្ទីរ បានពន្យល់ថា ដូចនេះសាលាត្រូវការគ្រូបង្រៀន ០២ នាក់ បន្ថែមទៀត ហើយ ករណីនេះ សាលាបានប្រើប្រាស់គ្រូកិច្ចសន្យាចំនួន ០២ នាក់បន្ថែមទៀត រយៈពេល ០៣ ខែរួចមកហើយ គិតចាប់ពីដើមឆ្នាំសិក្សា ២០២៤-២០២៥ ដោយសាលាយល់ឃើញថា ក្រសួងអប់រំ យុវជន និងកីឡា និង ក្រសួងមុខងារសាធារណៈ នឹងផ្តល់គ្រូនៅដើមឆ្នាំ។ ប៉ុន្តែផ្ទុយទៅវិញ ក្របខណ្ឌដែលក្រសួងអប់រំ យុវជន និងកីឡា និងក្រសួងមុខងារសាធារណៈ ផ្តល់ឱ្យសាលាបឋមសិក្សាទួលកី ទទួលបានតែគ្រូបង្រៀន ០២ ពេល ចំនួន ០៣ នាក់ តែប៉ុណ្ណោះ។ ចំពោះក្របខណ្ឌគ្រូកិច្ចសន្យាដែលសាលាបានស្នើសុំចំនួន ០២ នាក់ សាលាពុំទទួលបានតាមការស្នើសុំឡើយ ជាហេតុធ្វើឱ្យសាលាសម្រេចចិត្តបង្រួមថ្នាក់ទី ០១ និងថ្នាក់ទី ០២ បញ្ចូលគ្នា បណ្តាលឱ្យចំនួនសិស្សកើនឡើង ច្រើនក្នុងថ្នាក់នីមួយៗ ប៉ះពាល់ដល់ដំណើរការបង្រៀន និងរៀន។

លោកប្រធានមន្ទីរបានបន្ថែមថា បន្ទាប់ពីទទួលបានអនុសាសន៍ដឹកនាំពី លោក ឃួង ស្រេង អភិបាល នៃគណៈអភិបាលរាជធានីភ្នំពេញ ចំពោះបញ្ហាខ្វះគ្រូបង្រៀននៅសាលាបឋមសិក្សាទួលកី លោកបានស្នើសុំឱ្យគ្រូកិច្ចសន្យា ០២ នាក់ ដែលសាលាបានបញ្ឈប់ ឱ្យគាត់ចូលបង្រៀនធម្មតាវិញ។ ចំពោះថវិកាឧបត្ថម្ភប្រចាំខែ លោកអភិបាលនឹងចាត់ចែងដោះស្រាយជូន។

គួរបញ្ជាក់ថា នៅព្រឹកថ្ងៃទី ០៤ ខែកុម្ភៈ ឆ្នាំ ២០២៥ នេះ អាណាព្យាបាលសិស្សដែលមានកូនចៅរៀននៅសាលាបឋមសិក្សាទួលកីបានជួបជុំគ្នាធ្វើការតវ៉ាដើម្បីឱ្យសាលាស្វែងរកដំណោះស្រាយចំពោះបញ្ហាខ្វះខាតគ្រូបង្រៀននេះហើយក៏មានការបើកកិច្ចប្រជុំបន្ទាន់មួយជាមួយតំណាងអាណាព្យាបាលសិស្ស និងលោកប្រធានមន្ទីរអប់រំ យុវជន និងកីឡា។

លោកប្រធានមន្ទីរ បានបញ្ជាក់ថា ក្រោយពីទទួលបានការធានាអះអាងខាងលើ តំណាងអ្នកអាណាព្យាបាលសិស្ស បានស្ងប់ចិត្ត ទទួលយកចំណាត់ការដ៏ត្រឹមត្រូវ និងទាន់ពេលវេលាពីសំណាក់ លោកអភិបាលរាជធានីភ្នំពេញ ហើយពួកគាត់រីករាយទទួលយក និងបានរំសាយទៅគេហដ្ឋានរៀងៗ ខ្លួន៕

អត្ថបទ ៖ សំអឿន