ឯកឧត្តម ហ៊ុន ម៉ានី បង្ហាញសារឈឺចាប់ពេលជនអគតិខ្លះប្រមាថលើក្រុមគ្រួសាររបស់ឯកឧត្តម  

នៅថ្ងៃទី៤ ខែកុម្ភៈ ឆ្នាំ២០២៥នេះ ឯកឧត្តមឧបនាយករដ្ឋមន្ដ្រី ហ៊ុន ម៉ានី បានបង្ហោះសារឈឺចាប់ចំពោះការប្រមាថរបស់ជនអគតិមួយចំនួនមកលើក្រុមគ្រួសារ ដោយការប្រើប្រាស់ពាក្យពេចន៍អសុរស ដែលមិនអាចទទួលយកបានឡើយ។

សំណេរលើបណ្ដាញសង្គមហ្វេសប៊ុក ដោយមានភ្ជាប់ជាមួយរូបសម្ដេចតេជោ ហ៊ុន សែន ដែលជាឪពុក និងសម្ដេចធិបតី ហ៊ុន ម៉ាណែត ជាបងប្រុស ឯកឧត្តម ហ៊ុន ម៉ានី បានរៀបរាប់នូវរឿងដែលមិនអាចទទួលយកបានចំពោះការប្រមាថពីសំណាក់ជនអគតិមួយក្រុមមកលើក្រុមគ្រួសាររបស់ឯកឧត្តម ពិសេសសម្ដេចតេជោ ហ៊ុន សែន និងសម្ដេចធិបតី ហ៊ុន ម៉ាណែត។

ឯកឧត្តម បានសរសេរដូច្នេះថា៖ «ខ្ញុំពិតជាមិនអាចទទួលយកបាននូវទង្វើរបស់ជនអគតិមួយក្រុម ដែលបានប្រើប្រាស់ពាក្យពេចន៍អសុរស ប្រមាថកាតទានមកដល់សមាជិកក្រុមគ្រួសារខ្ញុំឡើយ។ បើទោះពួកគេមិនទទួលស្គាល់នូវការលះបង់របស់ក្រុមគ្រួសារខ្ញុំ ក្នុងបុព្វហេតុជាតិ និងមាតុភូមិនាពេលកន្លងមក ក៏គួរពួកគេត្រូវទទួលស្គាល់នូវភាពចាស់ទុំរបស់ពួកគាត់ក្នុងសង្គមខ្មែរ ដែលមានអារ្យធម៌ថ្កុំថ្កើង និងថ្លៃថ្នូរដែរ»។

សារខាងលើរបស់លោក ហ៊ុន ម៉ានី ធ្វើឡើងបន្ទាប់ពីប៉ុន្មានថ្ងៃចុងក្រោយនេះ ក្រុមប្រឆាំងជ្រុលនិយម ដែលមានមូលដ្ឋាននៅក្រៅប្រទេស បានបង្ហោះវីដេអូប្រើប្រាស់នូវពាក្យពេចន៍អសុរសលើសម្ដេចតេជោ ហ៊ុន សែន និងសម្ដេចធិបតី ហ៊ុន ម៉ាណែត ក្នុងការដឹកនាំប្រទេស៕