ផ្លូវជាតិលេខ៤៨ អាចនឹងមានជញ្ជីងថ្លឹងទម្ងន់ ក្រោយស្ថាបនាចប់រួចរាល់

កំណាត់ផ្លូវជាតិលេខ៤៨ ស្ថិតនៅឃុំបឹងព្រាវ ស្រុកស្រែអំបិល អាចនឹងមានជញ្ជីងថ្លឹងទម្ងន់១កន្លែងអចល័ត ដោយអាជ្ញាធរ និងមន្ទីរសាធារណការខេត្តកោះកុង ចុះសិក្សាជ្រើសរើសទីតាំង និងផលប៉ះពាល់។

លោកស្រី អ៊ី នារីនេត អភិបាលរងខេត្តកោះកុង បង្ហើបប្រាប់ កម្ពុជាថ្មី នៅថ្ងៃទី៤ ខែកុម្ភៈ ឆ្នាំ២០២៥នេះថា ដើម្បីទប់ស្កាត់ការដឹកជញ្ជូនលើសទម្ងន់កំណត់នៃច្បាប់ រដ្ឋបាលខេត្តកោះកុង សហការជាមួយមន្រ្តីសាធារណការ និងអាជ្ញាធរ​មូលដ្ឋានចុះត្រួតពិនិត្យតាមលក្ខណៈបច្ចេកទេសរកទីតាំងដំឡើងជញ្ជីងថ្លឹងរថយន្ត។

បើតាមលោកស្រីអភិបាលរងខេត្តកោះកុង ក្រុមការងារជ្រើសរើសបាន៣ទីតាំង ដើម្បីវាយតម្លៃពីផលប៉ះពាល់ផ្សេងៗ ពិសេសការរស់នៅរបស់ពលរដ្ឋអមសងខាងផ្លូវជាតិលេខ៤៨។ ជញ្ជីងថ្លឹងទម្ងន់រថយន្តនេះ អាចនឹងដំណើរការក្រោយការដ្ឋានផ្លូវចប់ជាស្ថាពរនាពេលខាងខាងមុខ។

ដោយឡែកលោក ផាត់ សេង អនុប្រធានមន្ទីរសាធារណការ និងដឹកជញ្ជូនខេត្តកោះកុង ថ្លែងថា លោក និងក្រុមការងារពិនិត្យឃើញ១ទៅ២ទីតាំងហើយសម្រាប់ស្នើសុំទៅខេត្ត និងក្រសួង ដើម្បីដំឡើងជញ្ជីង ក្នុងចំណោមទីតាំង៣ខាងលើ។លោក ផាត់ សេង បន្តថា លោក និងមន្រ្តីជំនាញកំពុងសិក្សាលម្អិតថែមឱ្យតាមលក្ខណៈបច្ចេកទេសនៃទីតាំងផ្សេងៗ សម្រាប់ជម្រើសជូនថ្នាក់ដឹកនាំពិនិត្យសម្រេច។ បច្ចុប្បន្នលោកស្នើដល់អាជ្ញាធរស្រុកស្រែអំបិល និងអាជ្ញាធរភូមិឃុំ ស្រង់ស្ថិតិពលរដ្ឋដែលអាចរងផលប៉ះពាល់ជាមុនសិន។

កាលពីថ្ងៃទី២៩ ខែសីហា ឆ្នាំ២០២៤ លោក អន ដាវុធ ប្រធានមន្ទីរសាធារណការ និងដឹកជញ្ជូនខេត្តកោះកុង ធ្លាប់ឱ្យដឹងថា ក្រៅតែពីផ្លូវជាតិលេខ៤៨មានជញ្ជីងថ្លឹងទម្ងន់រថយន្ត ផ្លូវជាតិលេខ ១០ ត្រង់ចំណុចគីឡូម៉ែត្រ១៩៦ ស្ថិតក្នុងភូមិបឹងឃុនឆាង សង្មាត់ស្មាច់មានជ័យ ក្រុងខេមរភូមិន្ទ ក៏នឹងមានជញ្ជីងថ្លឹងទំនិញអចល័ត១កន្លែងដែរ បន្ទាប់ពីគម្រោងការដ្ឋានផ្លូវលេខ១០បញ្ចប់ជាស្ថាពរ៕

អត្តបទ៖ សិរីវឌ្ឍនៈ