ព័ត៌មានជាតិ

ចំណូលក្រសួងប្រៃសណីយ៍កើនគុណជា ៤ ពី ២០០ លានដុល្លារ ដល់ ៨០០ លានដុល្លារ រយៈពេល ៥ ឆ្នាំចុងក្រោយ

បានផុស

១ ម៉ោង មុន

នៅ

ថ្ងៃពុធ ៥ កុម្ភៈ ២០២៥

ដោយ

ក្រសួងប្រៃសណីយ៍និងទូរគមនាគមន៍ សម្រេចបានការប្រមូលចំណូលចូលថវិកាជាតិសរុបបានប្រមាណ ៨០៤ លានដុល្លារអាម៉េរិក ក្នុងរយៈពេល ៥ ឆ្នាំចុងក្រោយ កើនឡើងគុណជា ៤ បើធៀបរយៈពេល ៥ ឆ្នាំមុន ដែលថវិកាចំណូលប្រមូលមានត្រឹមតែជាង ២០០ លានដុល្លារ។ នេះបើតាមលោក ជា វ៉ាន់ដេត បង្ហាញពីលទ្ធផលសម្រេចបានរបស់ក្រសួងប្រៃសណីយនិងទូរគមនាគមន៍ក្នុងរយៈពេល ៥ ឆ្នាំ (២០២០-២០២៤) នៅក្នុងសន្និបាតបូកសរុបលទ្ធផលការងារនៅព្រឹកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជា វ៉ាន់ដេត រដ្ឋមន្រ្តីក្រសួងប្រៃសណីយ៍និងទូរគមនាគមន៍បានគូសបញ្ជាក់ថា ក្នុងរយៈពេល ៥ ឆ្នាំ ដែលលោកចូលកាន់តំណែងជារដ្ឋមន្រ្តីក្រសួងប្រៃសណីយ៍និងទូរគមនាគមន៍ លោកបានប្តេជ្ញាចិត្តក្នុងការពង្រឹងការងារគ្រប់គ្រងហិរញ្ញវត្ថុ ដោយផ្ដោតទៅលើការកែសម្រួលយន្តការប្រមូលចំណូល និងការគ្រប់គ្រងការចំណាយឱ្យចំគោលដៅ។

ជាលទ្ធផលក្នុងរយៈពេល ៥ ឆ្នាំនេះ ចំណូលរបស់ក្រសួងប្រៃសណីយ៍និងទូរគមនាគមន៍បានកើនឡើងគុណជាង ៤។

«មុនពេលខ្ញុំចូលកាន់តំណែង ចំណូលក្រសួងរកបានតែជាង ២០០ លានដុល្លារកាលពី ៥ ឆ្នាំមុន ខណៈ ៥ ឆ្នាំចុងក្រោយនេះ ចំណូលកើនឡើងដល់ជាង ៨០០ លានដុល្លារ»។

ក្រសួងប្រៃសណីយ៍និងទូរគមនាគមន៍ ក្រោមការដឹកនាំដោយលោក ជា វ៉ាន់ដេត បានធ្វើការកែទម្រង់ការរៀបចំកិច្ចការរដ្ឋបាល ដែលធានាបានរំហូរការងារលឿនរហ័ស និងមានតម្លាភាព តាមរយៈការប្រើប្រាស់ប្រព័ន្ធអនុម័តឯកសារផ្ទៃក្នុង (DWF) និងប្រព័ន្ធគ្រប់គ្រងផ្សេងទៀត ជាពិសេសការពង្រឹងការងារគ្រប់គ្រងហិរញ្ញវត្ថុ ដោយផ្ដោតទៅលើការកែសម្រួលយន្តការប្រមូលចំណូល និងការគ្រប់គ្រងការចំណាយឱ្យចំគោលដៅ។

ជាក់ស្ដែងពីឆ្នាំ ២០២០-២០២៤ ក្រសួងសម្រេចប្រមូលចំណូលថវិកាជាតិនិងវិភាគទានមូលនិធិសរុបបានប្រមាណ ៨០៤ លានដុល្លារអាម៉េរិក បើប្រៀបធៀបទៅនឹងចំណូលថវិកាជាតិនិងវិភាគទានមូលនិធិក្នុងរយៈពេល ២០១៥-២០១៩ ដែលប្រមូលបានចំនួនប្រមាណ ២១៦ លានដុល្លារអាម៉េរិក។

ទន្ទឹមចំណូលក្រសួងកើនឡើង លោករដ្ឋមន្រ្តីបានបន្តថា ក្រសួងក៏បង្កើតយន្តការលើកទឹកចិត្តដល់មន្រ្តីរាជការបម្រើការងារក្រសួងដែលខិតខំបំពេញការងារប្រកបដោយស្មារតីទទួលខុសត្រូវខ្ពស់ ដូចជាការផ្តល់ឱកាសដល់មន្រ្តីរាជការក្រសួង ក្នុងការអាចបន្តការសិក្សាពង្រឹងសមត្ថភាពបន្ថែមទាំងក្នុងស្រុកនិងក្រៅស្រុក ការផ្តល់ប្រាក់រង្វាន់ប្រចាំខែ និងប្រចាំឆ្នាំ រួមទាំងការលើកទឹកចិត្តផ្សេងទៀត៕