ផ្សារទំនើបកម្ពស់៣ជាន់ដំបូងគេនៅក្នុងក្រុងដូនកែវនឹងលេចជារូបរាងនៅចុងឆ្នាំ២០២២

ផ្សារណាត់ ដែលនឹងក្លាយជាផ្សារទំនើបដំបូងគេក្នុងខេត្តតាកែវ ត្រូវបានសាងសង់នៅថ្ងៃទី១៨ ខែមីនា ឆ្នាំ២០២១ ហើយគ្រោងនឹងបញ្ចប់នៅចុងឆ្នាំ២០២២ខាងមុខនេះ។ ផ្សារនេះមានទីតាំងស្ថិតនៅភូមិ១ សង្កាត់រកាក្នុង ក្រុងដូនកែវ។

កាលពីថ្ងៃទី១៨ ខែមីនា ឆ្នាំ២០២១ លោក កង អាណាន់ អភិបាលក្រុងដូនកែវ និងលោកស្រី បានអញ្ជើញចូលរួមពិធីសែនក្រុងពាលី សុំម្ចាស់ទឹកម្ចាស់ដី បើកការដ្ឋានបុកគ្រឹះសាងសង់ផ្សារណាត់ថ្មីឡើងវិញ ដោយមានការចូលរួមពីលោក ឡោ ជំនិត និងភរិយាជាវិនិយោគិនផ្សារណាត់។  

នាឱកាសនោះដែរ លោកអភិបាលក្រុងដូនកែវបានបញ្ចាក់ថា ផ្អែកតាមការឲ្យដឹងពីប្រធានវិនិយោគផ្សារណាត់ ផ្សារនេះមានកម្ពស់៣ជាន់ និងមានតូបប្រមាណជាង៤០០តូប ដែលនឹងត្រូវចំណាយពេលសាងសង់ជាងមួយឆ្នាំ ពោលគឺនឹងរួចរាល់ក្នុងឆ្នាំ២០២២។ សមិទ្ធិផលថ្មីមួយនេះ និងលើកកម្ពស់ជីវភាពបងប្អូនអាជីវកដែលធ្លាប់លក់ដូរនៅកន្លែងចាស់ឲ្យប្រសើឡើង ព្រោះមានតូបមានប្លង់ត្រឹមត្រូវសម្រាប់លក់ដូរតកូនតចៅ។

នេះសបញ្ជាក់ថា ទោះបីប្រទេសកម្ពុជាយើងកំពុងរងការរាតត្បាតពីជំងឺកូវីដ-១៩ យ៉ាងណាក៏ដោយ ក៏មិនរំខានដល់ការអភិវឌ្ឍលើគ្រប់វិស័យខ្លាំងខ្លានោះដែរ ដោយសារបច្ចុប្បន្ននេះនាវាកម្ពុជាស្ថិតក្រោមការដឹកនាំដ៏ឈ្លាសវៃនិងប្រកបដោយគតិបណ្ឌិតរបស់សម្តេចអគ្គមហាសេនាបតី ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។

អត្ថបទ៖ វីរៈ