ព័ត៌មានជាតិ

អ្នកនាំពាក្យ ៖ ការរៀបចំប្រឡងបាក់ឌុបនៅខែសីហា មិនប៉ះពាល់ដំណើរការសិក្សារបស់សិស្សនោះទេ

បានផុស

៤ សប្តាហ៍ មុន

នៅ

ថ្ងៃពុធ ៥ កុម្ភៈ ២០២៥

ដោយ

លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍នៅរសៀលថ្ងៃទី ០៥ កុម្ភៈ នេះថា ការរៀបចំប្រឡង សញ្ញាបត្រមធ្យមសិក្សាទុតិយភូមិ ឬ បាក់ឌុប នៅខែសីហា ខាងមុខនេះ មិនធ្វើឱ្យប៉ះពាល់ដល់ដំណើរការសិក្សារបស់សិស្សានុសិស្សនោះទេ ដោយសារឆ្នាំនេះក្រសួងបានដាក់កាលបរិច្ឆេទចូលកង ឬ ចូលរៀនឆ្នាំសិក្សាថ្មី នៅថ្ងៃទី ០១ ខែវិច្ឆិកា ឆ្នាំ ២០២៥។

លោកស្រីបានបន្តថា ដូចនេះសិស្សានុសិស្សមានពេលវេលាគ្រប់គ្រាន់ និងកាលវិភាគបានត្រឹមត្រូវ ដើម្បីត្រៀមលក្ខណៈក្នុងការចូលរួមប្រឡងនាពេលខាងមុខ។

លោកស្រី បានបន្តទៀតថា សម្រាប់ឆ្នាំសិក្សា ២០២៤-២០២៥ នេះ ក្រសួងអប់រំ បានរំកិលកាលបរិច្ឆេទប្រឡងសញ្ញាបត្រមធ្យមសិក្សាបឋមភូមិ ឬ ឌីប្លូម និងប្រឡងសញ្ញាបត្រមធ្យមសិក្សាទុតិយភូមិ ឬ បាក់ឌុប ទៅរកភាពប្រក្រតីឡើងវិញ ពោលមុនការរាតត្បាតជំងឺកូវីដ-១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីបានបញ្ជាក់ថា ការរីករាលដាលជំងឺកូវីដ-១៩ បានធ្វើឱ្យក្រសួងអប់រំរំកិលការរៀន និងបង្រៀន ក៏ដូចជាការប្រឡងសញ្ញាបត្រមធ្យមសិក្សាទុតិយភូមិជាបន្តបន្ទាប់។ ប៉ុន្តែប៉ុន្មានឆ្នាំចុងក្រោយនេះ ក្រសួងបានព្យាយាមរំកិលកាលបរិច្ឆេទ នៃការប្រឡងវិលមករកភាពប្រក្រតីវិញហើយ ក្នុងឆ្នាំសិក្សា ២០២៤-២០២៥ នេះ ក្រសួងបានរៀបចំបានទៅតាមការគ្រោងទុកដោយមិនមានការរំកិលការរៀន និងបង្រៀន ជាបន្តទៀតទេ។

គួរបញ្ជាក់ថា ថ្មីៗ នេះ ក្រសួងអប់រំ យុវជន និងកីឡា បានជូនដំណឹងពីកាលបរិច្ឆេទសម័យប្រឡងសញ្ញាបត្រមធ្យមសិក្សាបឋមភូមិ ឬ ឌីប្លូម នៅថ្ងៃទី ១៤ ខែកក្កដា ឆ្នាំ ២០២៥ ខណៈនៅឆ្នាំមុនប្រឡងនៅថ្ងៃទី ០២ ខែកញ្ញា ឆ្នាំ ២០២៤ និងប្រឡងសញ្ញាបត្រមធ្យមសិក្សាទុតិយភូមិ ឬ បាក់ឌុប ធ្វើនៅថ្ងៃទី ១៨ ខែសីហា ឆ្នាំ ២០២៥ ខណៈឆ្នាំមុន ធ្វើថ្ងៃទី ០៨ ខែតុលា ឆ្នាំ ២០២៥៕

អត្ថបទ ៖ សំអឿន