ព័ត៌មានជាតិ

ក្រសួងការងារ និងក្រសួងសុខាភិបាល បើកយុទ្ធនាការផ្សព្វផ្សាយ ទប់ស្កាត់ ជំងឺមិនឆ្លង ជូនកម្មករ-និយោជិត នៅខេត្តកណ្ដាល

បានផុស

២ ខែ មុន

នៅ

ថ្ងៃពុធ ៥ កុម្ភៈ ២០២៥

ដោយ

ក្រសួងការងារ និងក្រសួងសុខាភិបាល បានបើកយុទ្ធនាការផ្សព្វផ្សាយ ដើម្បីទប់ស្កាត់ជំងឺមិនឆ្លងជូនដល់កម្មករ-និយោជិត តាមសហគ្រាស-គ្រឹះស្ថាន នៅខេត្តកណ្ដាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបើកយុទ្ធនាការផ្សព្វផ្សាយនេះ ក្នុងឱកាស លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និង លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអញ្ជើញជាអធិបតី ក្នុងពិធីបើកយុទ្ធនាការផ្សព្វផ្សាយ ដើម្បីទប់ស្កាត់ជំងឺមិនឆ្លងជូនដល់កម្មករ-និយោជិត នៅតាមសហគ្រាស គ្រឹះស្ថាន ដែលរៀបចំធ្វើឡើងក្នុងបរិវេណរោងចក្រ បូវឃើរ ហ្គាមេន ហ្វេកធើរី ស្ថិតក្នុងឃុំបែកចាន ស្រុកអង្គស្នួល ខេត្តកណ្ដាល កាលពីព្រឹកថ្ងៃទី ០៥ ខែកុម្ភៈ ឆ្នាំ ២០២៥ នេះ។

ពិធីបើកយុទ្ធនាការនេះ មានការអញ្ជើញចូលរួមពី លោក គួច ចំរើន អភិបាល នៃគណៈអភិបាលខេត្តកណ្ដាល ថ្នាក់ដឹកនាំ នៃក្រសួងសុខាភិបាល , ក្រសួងការងារ និងបណ្ដុះបណ្ដាលវិជ្ជាជីវៈ , អាជ្ញាធរមូលដ្ឋានខេត្ត , មន្ទីរជុំវិញខេត្ត , អង្គការដៃគូ, តំណាងសមាគមនិយោជក , តំណាងសហជីព និងកម្មករ-និយោជិត នៃរោងចក្រ បូវឃើរ ហ្វេកធើរី។

គួរជម្រាបថា យុទ្ធនាការផ្សព្វផ្សាយ ដើម្បីទប់ស្កាត់ជំងឺមិនឆ្លងជូនដល់កម្មករ-និយោជិតនេះ រៀបចំឡើងក្រោមកិច្ចសហការរវាង ក្រសួងការងារ និងបណ្ដុះបណ្ដាលវិជ្ជាជីវៈ និងក្រសួងសុខាភិបាល ក្នុងគោលបំណងរួមចំណែកក្នុងការទប់ស្កាត់ជំងឺមិនឆ្លង បង្កើនការយល់ដឹង សកម្មភាពអប់រំសុខភាព ធានានូវសុខុមាលភាពរបស់កម្មករ-និយោជិត និងសាធារណជន អំពីកត្តាហានិភ័យ នៃជំងឺមិនឆ្លង ដើម្បីជំរុញការផ្លាស់ប្ដូរឥរិយាបថបុគ្គលផ្ទាល់ គ្រួសារ សហគមន៍ ប្រកបដោយសុខភាព និងសុខុមាលភាព៕

អត្ថបទ ៖ ពិសី