ព័ត៌មានអន្ដរជាតិ

លោក ណេតាន់យ៉ាហ៊ូ សរសើរលោក ត្រាំ លើគម្រោងយកជនជាតិប៉ាឡេស្ទីនចេញពីហ្គាហ្សា

បានផុស

៣ ថ្ងៃ មុន

នៅ

ថ្ងៃព្រហស្បតិ៍ ៦ កុម្ភៈ ២០២៥

ដោយ

Chheang

ផ្ទុយពីអន្តរជាតិភាគច្រើនដែលបានរិះគន់ លោកនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ បាននិយាយថា មិនមានអ្វីខុសទេនៅក្នុងគំនិតរបស់ប្រធានាធិបតីអាមេរិកលោក ដូណាល់ ត្រាំ ក្នុងការបម្លាស់ទីប្រជាជនប៉ាឡេស្ទីនចេញពីតំបន់ហ្គាហ្សា។

លោក ដូណាល់ ត្រាំ និងលោក បេនចាមីន ណេតាន់យ៉ាហ៊ូ (រូបភាព៖ The Standard)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេដឹកនាំអ៊ីស្រាអែល បាននិយាយនៅក្នុងបទសម្ភាសន៍មួយនៅលើទូរទស្សន៍ Fox News កាលពីថ្ងៃពុធទី៥កុម្ភៈថា៖ «គំនិតជាក់ស្តែងនៃការអនុញ្ញាតឲ្យប្រជាជនហ្គាហ្សាដែលចង់ចាកចេញ អាចចាកចេញបាន។ ខ្ញុំចង់និយាយថា តើមានអ្វីខុស? ពួកគេអាចចាកចេញ ពួកគេអាចត្រឡប់មកវិញ។ ពួកគេអាចផ្លាស់ទីលំនៅ និងត្រឡប់មកវិញ។ ប៉ុន្តែអ្នកត្រូវតែកសាងហ្គាហ្សាឡើងវិញ»។

ក្រុមសិទ្ធិមនុស្ស បានចាត់ទុកទង្វើនេះគឺជាការបោសសម្អាតជនជាតិភាគតិច និងបានថ្កោលទោសចំពោះការលើកឡើងរបស់លោក ត្រាំ ដែលថា ប្រជាជនប៉ាឡេស្ទីននៅក្នុងតំបន់ហ្គាហ្សាគួរផ្លាស់ទីលំនៅជាអចិន្ត្រៃយ៍ ស្របពេលដែលស្នើឲ្យសហរដ្ឋអាមេរិកកាន់កាប់តំបន់ហ្គាហ្សាផងដែរ។

លោក ណេតាន់យ៉ាហ៊ូ បានប្រាប់ថា លោកមិនជឿទេថា លោក ត្រាំ បានស្នើឲ្យបញ្ជូនទាហានអាមេរិកទៅប្រយុទ្ធនឹងក្រុមហាម៉ាសនៅតំបន់ហ្គាហ្សា ឬថាទីក្រុងវ៉ាស៊ីនតោន នឹងផ្តល់ហិរញ្ញប្បទានដល់កិច្ចខិតខំប្រឹងប្រែងកសាងឡើងវិញ។

លោកបានបន្ថែមថា៖ «នេះជាគំនិតល្អមុនគេបង្អស់ដែលខ្ញុំបានឮ។ វាជាគំនិតដ៏គួរឲ្យកត់សម្គាល់មួយ ហើយខ្ញុំគិតថា វាគួរតែត្រូវបានតាមដាន ពិនិត្យ និងធ្វើវាឲ្យពិតប្រាកដ ពីព្រោះខ្ញុំគិតថា វានឹងបង្កើតអនាគតខុសគ្នាសម្រាប់មនុស្សគ្រប់គ្នា»។

ចាប់តាំងពីថ្ងៃទី២៥ខែមករាមក លោក ត្រាំ បានស្នើម្តងហើយម្តងទៀតថា ប្រជាជនប៉ាឡេស្ទីននៅហ្គាហ្សា គួរតែត្រូវបានទទួលយកដោយប្រទេសអារ៉ាប់ក្នុងតំបន់ ដូចជា អេហ្ស៊ីប និងហ្ស៊កដានី ដែលជាគំនិតមួយដែលត្រូវបានច្រានចោលដោយរដ្ឋអារ៉ាប់ និងមេដឹកនាំប៉ាឡេស្ទីន៕

ដោយ៖ ឈាង

ចុចអាន៖ UN ព្រមានថា ផែនការកាន់កាប់ហ្គាហ្សា របស់លោកត្រាំ នឹងក្លាយជាការបោសសម្អាតផ្តាច់ពូជ