ពិព័រណ៍រូបភាពស្តីពីសកម្មភាពដោះមីន និងសង្គ្រាមនៅកម្ពុជា ដាក់តាំងបង្ហាញនៅជប៉ុន

ថ្ងៃទី៥ ខែកុម្ភៈ ឆ្នាំ២០២៥ សិក្ខាកាមចំនួន ៤រូប ដែលអង្គភាពស៊ីម៉ាក់ បានចាត់បញ្ជូនទៅប្រទេសជប៉ុនកាលពីពាក់កណ្តាលខែមករា ឆ្នាំ២០២៥ កន្លងទៅនេះ បានធ្វើការតាំងពិព័រណ៍ស្នាដៃរបស់ខ្លួនបន្ទាប់ពីទទួលបានការបណ្តុះបណ្តាលនៅខេត្តអូគីណាវ៉ា ប្រទេសជប៉ុនអស់រយៈពេលជិត១ខែ។

មជ្ឈមណ្ឌលសកម្មភាពកំចាត់មីនកម្ពុជា – CMAC បានឱ្យដឹងថា ការតាំងពិព័រណ៌មិនអចិន្ត្រៃយ៍បែបរូបថតនេះគឺស្តីពី “ប្រវត្តិសង្រ្គាមសម័យទំនើប និងការស្វែងរកសន្តិភាពតាមរយៈការបោសសម្អាតមីននៅប្រទេសកម្ពុជា”ដោយមានការចូលរួមកាត់ខ្សែបូពីតំណាងអង្គភាពស៊ីម៉ាក់ លោក ផាត ភារៈ ប្រធាននាយកដ្ឋានកណ្តាល និងជាប្រធានខុទ្ទកាល័យ រួមជាមួយតំណាងសាលាខេត្តអូគីណាវ៉ា ប្រធានសារមន្ទីរសន្តិភាពអ៉ូគីណាវ៉ា តំណាងទីភ្នាក់ងារសហប្រតិបត្តិការអន្តរជាតិជប៉ុន (JICA) ប្រចាំអូគីណាវ៉ា និងប្រធានមជ្ឈមណ្ឌលជំនួយសន្តិភាព (OPAC) ផងដែរ។

ពិព័រណ៍រូបភាពនេះ បានតាំងបង្ហាញពីព្រឹត្តិការណ៍សង្រ្គាមជាង ៣ ទស្សវត្សនៅកម្ពុជា និងបញ្ហាគ្រាប់មីននិងសំណល់យុទ្ធភណ្ឌសង្រ្គាមជាច្រើនលានគ្រាប់ត្រូវបានបន្សល់ទុក ដោយសារមរតកសសង្គ្រាម ក៏ដូចជាតាំងបង្ហាញពីសកម្មភាពបោសសម្អាតមីនរបស់ មជ្ឈមណ្ឌលសកម្មភាពកំចាត់មីនកម្ពុជា (CMAC) ដែលបាននឹងកំពុងបានដើរតួរនាទីយ៉ាងសំខាន់ក្នុងការបោសសម្អាតគ្រាប់មីន និងសំណល់យុទ្ធភណ្ឌសង្រ្គាម និងការរំដោះដីសុវត្ថិភាពជូនប្រជាពលរដ្ឋចាប់តាំងពីឆ្នាំ១៩៩២។

ជប៉ុន គឺជាប្រទេសមួយក្នុងចំណោមប្រទេសផ្សេង​ទៀត ដែលបានផ្តល់ជំនួយដល់កម្ពុជាក្នុងការបោសសម្អាតមីន។ កាលពីថ្ងៃទី ០៥ ខែ កុម្ភៈ ឆ្នាំ ២០២៥  ជប៉ុន បានផ្តល់ជំនួយឥតសំណងបន្ថែមប្រមាណ ១,៣ លានដុល្លារ ដល់ អង្គការសកម្មភាពកំចាត់មីនជប៉ុន (JMAS) សម្រាប់បោសសម្អាតគ្រាប់មីន យុទ្ធភណ្ឌមិនទាន់ផ្ទុះ និងគ្រាប់បែកចង្កោម នៅខេត្តបន្ទាយមានជ័យ និងស្ទឹងត្រែង៕