មន្ត្រី​ជាន់ខ្ពស់​នៃ​ក្រសួងសាធារណការ​ និង​ដឹកជញ្ជូន​បន្តចុះពិនិត្យ​វឌ្ឍនភាព​ការ​ស្ថាបនាផ្លូវជាតិលេខ៧

កំពង់ចាម ៖​ លោក​ លឹម​ ស៊ីដេនីន​ រដ្ឋលេខាធិការ​ក្រសួងសាធារណការ​ និងដឹកជញ្ជូន​និងជានាយកគ្រប់គ្រងគម្រោងស្ថាបនាផ្លូវជាតិលេខ៧ជាបួនគន្លង​​ ចាប់ពីរង្វង់មូលស្គន់​ ដល់​រង្វង់មូលស្ពានគីហ្សូណា​ខេត្តកំពង់ចាម​ បានចុះពិនិត្យ​វឌ្ឍនភាព​ការស្ថាបនា​ ផ្លូវជាតិលេខ៧ជាបួនគន្លង​​ ចាប់ពីរង្វង់មូលស្គន់​ ដល់​រង្វង់មូលស្ពានគីហ្សូណា​ខេត្តកំពង់ចាម​ ខណៈ​បច្ចុប្បន្ន​បានស្ថាបនាជាង៣២%ហេីយ។

នៅព្រឹក​ ថ្ងៃទី​៦ ខែកុម្ភៈ​​​ ឆ្នាំ​២០២៥​ លោក​ លឹម​ ស៊ីដេនីន​ រដ្ឋលេខាធិការ​ក្រសួងសាធារណការ​ និងដឹកជញ្ជូន​និងជានាយកគ្រប់គ្រងគម្រោងស្ថាបនាផ្លូវជាតិលេខ៧ជាបួនគន្លង​​ ចាប់ពីរង្វង់មូលស្គន់​ ដល់​រង្វង់មូលស្ពានគីហ្សូណា​ខេត្តកំពង់ចាម​ និង​លោក​ ឡុង​ ណារ៉ូ​ ប្រតិភូរាជរដ្ឋាភិបាលទទួលបន្ទុករដ្ឋាករទឹកស្អាតរាជធានីភ្នំពេញ​ បាន​ដឹក​នាំ​មន្ត្រីជំនាញបច្ចេកទេស​ ក្រុមហ៊ុនម៉ៅ​សាងសង់​ និងអាជ្ញាធរមូលដ្ឋាន​ចុះពិនិត្យវឌ្ឍនភាពការដ្ឋាន​និងដោះស្រាយបញ្ហាប្រឈមមួយចំនួនចំពោះប្រព័ន្ធទឹកស្អាត​។

ឆ្លៀត​ឱកាស​នោះ​ដែរ​ លោក​ លឹម​ ស៊ីដេនីន​ រដ្ឋលេខាធិការ​ក្រសួង​សាធារណការ​ និងដឹកជញ្ជូន​ និងជា​នាយក​គម្រោង បានបញ្ជាក់​ឱ្យ​ដឹង​ថា​ មក​ដល់​ពេល​នេះ​ក្រុមហ៊ុនទទួលម៉ៅការ​កំពុងអនុវត្តន៍គម្រោងសាងសង់ជាបន្តបន្ទាប់​ ខណៈ​តំបន់​ខ្លះ​ក្រុម​ការងារ​បច្ចេកទេស​ចាក់ថ្មម៉ិចក្រាលកិនបណ្តេីរៗ​ ហេីយ​តំបន់​ខ្លះ​ទៀត​បានស្ថាបនាទ្រូងផ្លូវផងដែរ។

លោក​រដ្ឋលេខាធិការ​ បាន​បញ្ជាក់​ទៀត​ថា​ ចំពោះមុខ​ក្រសួងសាធារណការ​និងដឹកជញ្ជូន​ ខិតខំប្រឹងប្រែង​ពន្លឿនការងារស្ថាបនាផ្លូវជាតិលេខ៧ជាបួនគន្លងនេះ​ ដេីម្បី​ធ្វេី​យ៉ាងណា​សាងសង់​ឱ្យ​ហេីយតាមការកំណត់។

ចំណែក​ការ​ដោះស្រាយផលប៉ះពាល់ជាមួយបងប្អូនប្រជាពលរដ្ឋវិញ​ អាជ្ញាធរនិងមន្ត្រីពាក់ព័ន្ធ​ដោះស្រាយរួចរាល់ហេីយ​ និងបន្តដោះស្រាយបញ្ហាដែលនៅសេសសល់​ ដូចតំបន់ខ្លះបញ្ហ​ប្រព័ន្ធ​ទឹកស្អាតរបស់​រដ្ឋាករ​ទឹក​ ក្រុមការងារ​រដ្ឋាករទឹក​កំពុងជួយសម្របសម្រួល​ កាយដោះដូរកន្លែងថ្មី​ កុំ​ឱ្យរាំងស្ទះដល់ដំណេីរការក្រុមហ៊ុនសាងសង់​។

សូមជម្រាបជូនថា​ គម្រោងស្ថាបនាផ្លូវជាតិលេខ៧ជាបួនគន្លង​​ ចាប់​ពី​រង្វង់មូលស្គន់​ ដល់​រង្វង់មូលស្ពានគីហ្សូណា​ ក្រុង​កំពង់ចាម​នេះ​ បានចាប់ផ្តេីមបេីកការដ្ឋានស្ថាបនាកាលពីថ្ងៃទី៩​ ខែមករា​​ឆ្នាំ២០២៣​ គម្រោងនេះមានប្រវែងសរុបជាង៤៥គីឡូម៉ែត្រ ចំពោះ​ទទឹង​ផ្លូវវិញ​នៅតំបន់ក្រៅទីប្រជុំ​ មានទទឹង២៤ម៉ែត្រ​កន្លះ​ និងក្នុងទីប្រជុំជន​មានទទឹង២០ម៉ែត្រ​កន្លះ​ ដោយមានសួនច្បារនៅចំចំណុចកណ្តាលផ្លូវ​ ក្រោម​ឥណទានសម្បទានពីរដ្ឋាភិបាលនៃសាធារណៈរដ្ឋប្រជាមានិតចិន៕

អត្ថបទ​និង​រូបភាព ​៖ ​ឡេក​ ចាន់ពេជ្រ​