នាយករដ្ឋមន្ត្រីឡាវ ចាត់ទុកកិច្ចសហប្រតិបត្តិការថាមពលជាមួយកម្ពុជា ជាអាទិភាព និងមានសារៈសំខាន់បំផុត

ជំនួបជាមួយសម្ដេចតេជោ ហ៊ុន សែន ប្រធានព្រឹទ្ធសភា នារសៀលថ្ងៃទី៦ ខែកុម្ភៈ ឆ្នាំ២០២៥ ក្នុងរដ្ឋធានីវៀងចន្ទន៍ នាយករដ្ឋមន្ត្រីឡាវ លោក សនសៃ ស៊ីផាន់ដន បានអះអាងថា កិច្ចសហប្រតិបត្តិការថាមពលជាមួយកម្ពុជាដែលជាប្រទេសជិតខាងគ្នា គឺជាអាទិភាពរបស់រដ្ឋាភិបាលឡាវ ដើម្បីរួមចំណែកជួយដល់តម្រូវការថាមពលរបស់កម្ពុជា។

ការអះអាងរបស់នាយករដ្ឋមន្ត្រីឡាវ គឺជាការឆ្លើយទៅនឹងការលើកឡើងរបស់សម្ដេចតេជោ ហ៊ុន សែន ដែលបានសង្កត់ធ្ងន់ដល់ការជំរុញផ្គត់ផ្គង់ថាមពលអគ្គិសនីពីឡាវទៅកម្ពុជា និងពីកម្ពុជាទៅប្រទេសជាសមាជិកអាស៊ានផ្សេងទៀតសំដៅរួមចំណែកជួយតម្រូវការថាមពលរបស់កម្ពុជា ដល់ទំហំពាណិជ្ជកម្ម និងការរីកលូតលាស់សេដ្ឋកិច្ច គឺជាមូលដ្ឋានរបស់ប្រជាជននៃប្រទេសទាំងពីរនៅគ្រប់ទីកន្លែង ព្រមទាំងការកសាងបណ្តាញថាមពលអាស៊ាន។

សម្តេចតេជោ បានលើកឡើងថា ឥឡូវ ឱកាសឱ្យយើងឈានទៅមុខហើយ ត្រូវជំរុញបន្ថែមគ្រប់កិច្ចសហប្រតិបត្តិការ ជាពិសេសកិច្ចសហប្រតិបត្តិការដែលមានស្រាប់ឱ្យលូតលាស់។ ក្រៅពីកិច្ចសហប្រតិបត្តិការថាមពល សម្ដេចតេជោ ក៏បានលើកឡើងពីទំនាក់ទំនងទ្វេភាគីលើផ្នែកសេដ្ឋកិច្ច ពាណិជ្ជកម្ម វិនិយោគ និងទេសចរណ៍រវាងប្រទេសទាំងពីរ ដែលកំពុងដើរទៅមុខ ទោះបីយឺត តែមានភាពរឹងមាំ។

នាយករដ្ឋមន្រ្តី សនសៃ ស៊ីផាន់ដន បានឯកភាពមតិសម្តេចតេជោ លើការពង្រីកពាណិជ្ជកម្ម ថាមពល ព្រមទាំងវិស័យសាធារណការ និងដឹកជញ្ជូន ជាពិសេសការតភ្ជាប់រវាងប្រទេសទាំងពីរ។ បន្ថែមពីនេះ លោកនាយករដ្ឋមន្ត្រី ក៏បានវាយតម្លៃខ្ពស់ចំពោះបរិយាកាសព្រំដែនល្អរួមគ្នា និងទំនាក់ទំនងអស់ពីចិត្តពីថ្លើម ត្រង់ទៅត្រង់មក សាមគ្គីល្អរវាងប្រទេសទាំងពីរ ហើយបញ្ជាក់ថា នឹងសហការជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា អនុវត្តកិច្ចព្រមព្រៀងដែលបានសម្រេចរួមគ្នាលើគ្រប់ការងារ តាមស្មារតីនៃកិច្ចព្រមព្រៀងរវាងបក្សទាំងពីរ។

នៅចំពោះមុខសម្ដេចតេជោ ប្រធានព្រឹទ្ធសភាកម្ពុជា លោកនាយករដ្ឋមន្រ្តីឡាវ បានស្នើឱ្យភាគីនៃប្រទេសទាំងពីរបន្តជំរុញកិច្ចសហប្រតិបត្តិការរវាងសមត្ថកិច្ចពាក់ព័ន្ធ ដើម្បីអនុវត្តកិច្ចព្រមព្រៀងដែលមានឱ្យចេញរូបរាង៕

ដោយ៖ ធឿន វ៉ាន់សុង