ឡាវភ្ជាប់ការរីកចម្រើនរបស់ខ្លួនទៅនឹងការចូលរួមរបស់កម្ពុជា

ប្រធានរដ្ឋសភាឡាវលោក សាយ សំផន ភូមិវិហាន  បានអរគុណប្រទេសកម្ពុជាដែលបានជួយដល់ប្រទេសឡាវកាលពីកន្លងទៅ រាល់ជំនួយនានាដែលកម្ពុជាបានផ្ដល់ជូននិងការគាំទ្រទាំងក្នុងក្របខណ្ឌតំបន់ និងអន្តរជាតិ បានធ្វើឱ្យមានការអភិវឌ្ឍន៍ដល់បច្ចុប្បន្ន។

ថ្លែងក្នុងពិធីលៀងសាយភោជន៍ផ្លូវការជូនប្រធានព្រឹទ្ធសភាកម្ពុជា សម្ដេច​តេជោ ហ៊ុន សែន នៅរដ្ឋធានីវៀងច័ន្ទ កាលពីយប់ថ្ងៃទី៦ ខែកុម្ភៈ ឆ្នាំ២០២ លោក សាយ សំផន ភូមិហាន ថាបានថ្លែងអំណរគុណចំពោះគណបក្សគណប្រជាជនកម្ពុជា រាជរដ្ឋាភិបាល និងប្រជាជនកម្ពុជា ដែលបានជួយគាំទ្រចំពោះបុព្វហេតុតស៊ូរបស់ប្រជាជនឡាវក្នុងពេលកន្លងមកនិងបច្ចុប្បន្នលើការជ្រោមជ្រែងដល់ការកសាងនិងអភិវឌ្ឍសាធារណរដ្ឋប្រជាធិបតេយ្យប្រជាមានិតឡាវ។

ក្នុងនាមសភាជាតិឡាវលោកបានអរគុណចំពោះជំនួយរបស់កម្ពុជាលើការបណ្តុះបណ្តាលធនធានមនុស្សដែល ព្រឹទ្ធសភាកម្ពុជា បានផ្តល់អាហារូបករណ៍ ដល់មន្ត្រីនៃសភាជាតិឡាវ ក៍ដូចជាជំនួយលើវិស័យផ្សេងៗ ទៀត ជាពិសេសការជួយគាំទ្រឡាវនៅក្របខណ្ឌតំបន់និងអន្តរជាតិ។

ថ្លែងក្នុងពិធីនោះផងដែរប្រធានព្រឹទ្ធសភាកម្ពុជា សម្ដេចតេជោ ហ៊ុន សែន បានវាយតម្លៃខ្ពស់ចំពោះទំនាក់ទំនង និងយូរអង្វែងរវាងប្រជាជនកម្ពុជា-ឡាវ។ សម្តេចជឿជាក់ថា «ភាពជាដៃគូយុទ្ធសាស្រ្តគ្រប់ជ្រុងជ្រោយ និងយូរអង្វែង» ដែលបង្កើតឡើងនៅឆ្នាំ២០១៩ នឹងបន្តឈានទៅមុខយ៉ាងស្វាហាប់ និងត្រូវបានលើកកម្ពស់ថែមទៀត ដោយការប្រាស្រ័យទាក់ទងគ្នា យ៉ាងជិតស្និទ្ធ នៅគ្រប់កម្រិតទាំងក្នុងក្របខ័ណ្ឌរដ្ឋ និងក្របខ័ណ្ឌបក្ស។

សម្តេចតេជោបន្ថែមថាក្នុងស្មារតីមិត្តភាពជាប្រពៃណីនិងសាមគ្គីភាពដ៏ជិតស្និទ្ធ  និងសភាកម្ពុជាត្រៀមខ្លួនជានិច្ច ដើម្បីបន្តធ្វើកិច្ចសហការកាន់តែជិតស្និទ្ធ ជាមួយប្រធាននិងរដ្ឋសភានៃសាធារណរដ្ឋប្រជាធិបតេយ្យប្រជាមានិតឡាវ ដើម្បីនាំមកនូវគុណប្រយោជន៍ដ៏ធំធេងសម្រាប់ប្រជាជននិងប្រទេសទាំងពីរ។

កម្ពុជា-ឡាវ បានបង្កើតទំនាក់ទំនងការទូតជាមួយគ្នាក្នុងឆ្នាំ១៩៥៦។ ក្នុងប្រវត្តិសាស្ត្រនៃទំនាក់ទំនងឃើញមានភាពល្អួកល្អឺនច្រើនទោះបីជាធ្លាប់មានបញ្ហាព្រំដែនខ្លះជាមួយគ្នាក្ដី តែបានដោះស្រាយដោយសន្តិវិធី។ ក្នុងឆ្នាំ២០២៤ ប្រធានាធិបតីឡាវលោក ថងលូន ស៊ីសូលីត បានថ្វាយដំរី២ជួនព្រះមហាក្សត្រកម្ពុជាដែលជាសញ្ញានៃទំនាក់ទំនងដ៏ល្អរវាងប្រទេសទាំងពីរ៕

អត្ថបទដោយ ហ៊ុន សិរីវឌ្ឍន៍