មន្រ្តីសុខាភិបាល៖ បច្ចុប្បន្នជំងឺគ្រុនឈាមនៅភ្នំពេញ ស្ថិតក្នុងស្ថានភាពគ្រប់គ្រងបាន

ក្នុងរយៈពេលប៉ុន្មានសប្តាហ៍ថ្មីៗនេះ ប្រជាពលរដ្ឋក្នុងរាជធានីភ្នំពេញបានលើកឡើងពីការព្រួយបារម្ភអំពីជំងឺគ្រុនឈាម រួមជាមួយនឹងការកើនឡើងនៃចំនួនសត្វមូស។ ទោះយ៉ាងណា ប្រធានមន្ទីរសុខាភិបាលរាជធានីភ្នំពេញលោក ងី មានហេង បានបញ្ជាក់ថា ស្ថានភាពជំងឺគ្រុនឈាមក្នុងតំបន់នៅតែស្ថិតក្នុងការគ្រប់គ្រងបាន ខណៈរដ្ឋបាលខណ្ឌទាំង ១៤ បានចេញប្រតិបត្តិការចុះបាញ់ថ្នាំសម្លាប់ជម្រូកមូស ដើម្បីសុខសុវត្ថិភាពប្រជាពលរដ្ឋ។

ក្នុងបទសម្ភាសជាមួយសារព័ត៌មានកម្ពុជាថ្មី នៅថ្ងៃទី៧ ខែកុម្ភៈនេះ លោក ងី មានហេង បានថ្លែងប្រាប់ថា បច្ចុប្បន្នជំងឺគ្រុនឈាមនៅភ្នំពេញ ស្ថិតនៅក្នុងស្ថានភាពដែលយើងគ្រប់គ្រងបាន បើទោះបីជាចំនួនសត្វមូសមានការកើនឡើងក្តី។ លោកបញ្ជាក់ថា៖ «បើយើងធៀបករណីគ្រុនឈាមក្នុងខែមករា ឆ្នាំ២០២៥ នេះ មានធៀបឆ្នាំ២០២៤ តិចជាងឆ្ងាយ។ អ៊ីចឹង!អត់មានអីគួរឱ្យបារម្ភទេ ដោយសារតែចំនួននេះស្ថិតក្នុងស្ថានភាពមួយដែលគ្រប់គ្រងបាន។ និយាយឱ្យខ្លីជំងឺគ្រុនឈាមមិនមានបញ្ហាដែលគួរឱ្យបារម្ភចំពោះរាជធានីភ្នំពេញទេ»។

លោកកត់សម្គាល់ថា ចំនួនអ្នកកើតជំងឺគ្រុនឈាមថ្មីនៅភ្នំពេញពិតជាមាន ប៉ុន្តែចំនួនដែលកើតថ្មីនេះមិនមានអ្វីដែលគួរឱ្យព្រួយបារម្ភ ហើយមិនមានការរាតត្បាតនោះឡើយ។ លោកបញ្ជាក់ថា៖«ជំងឺគ្រុនឈាមអាចឆ្លងបានលុះត្រាតែមានភ្នាក់ងារចម្លង គឺមូសខ្លា រីឯមូសបច្ចុប្បន្ននេះមានទាំងមូសខ្លា និងមូសអង្កាម តែខ្ញុំជឿថាមូសខ្លាមានតិចព្រោះករណីគ្រុនឈាមមានតិច។ចឹងភាគច្រើនមូសសព្វថ្ងៃនេះ គឺមូសអង្កាម»។

លោកបញ្ជាក់ថា មូសដែលមានការកើនឡើងនាពេលបច្ចុប្បន្ននេះ គឺជាមូសអង្កាម ពុំមានជាមូសខ្លាដែលជាភ្នាក់ងារចម្លងជំងឺគ្រុនឈាមនោះទេ។ លោកពន្យល់ថា៖«មូសអង្កាមមិនមែនជាភ្នាក់ងារចម្លងជំងឺគ្រុនឈាមនោះទេ តែមូសអង្កាមពេលខាំយើង ធ្វើឱ្យបង្កភាពរំខានដល់មនុស្ស។ទោះជាមានច្រើនក៏ដោយ យើងមិនបារម្ភអំពីការចម្លងជំងឺគ្រុនឈាមនោះទេ»។

រដ្ឋបាលរាជធានីភ្នំពេញ បានចាប់ផ្តើមយុទ្ធនាការកម្ចាត់មូសនៅទូទាំង១០៥ខណ្ឌ ចាប់ពីថ្ងៃទី១៦ ដល់ថ្ងៃទី២៩ ខែមករា។បន្ថែមលើនេះ នៅថ្ងៃទី៥ ខែកុម្ភៈ អភិបាលរាជធានីភ្នំពេញ បានចេញសេចក្តីណែនាំដល់មន្ត្រីសុខាភិបាលខណ្ឌ និងមណ្ឌលសុខភាព ធ្វើការបាញ់ថ្នាំមូសនៅតាមមូលដ្ឋានរៀងៗខ្លួន ដើម្បីធានាបាននូវសុខសន្តិភាព និងសុវត្ថិភាពជូនប្រជាពលរដ្ឋ។ នេះបើតាមការបញ្ជាក់បន្ថែមពីប្រធានមន្ទីរសុខាភិបាល។

លោក ងី មានហេង បញ្ជាក់បន្ថែមថា មន្ទីរសុខាភិបាលរាជធានីភ្នំពេញ កំពុងស្នើសុំគោលការណ៍បន្ថែមពីលោកអភិបាលរាជធានីភ្នំពេញ ដើម្បីដឹកនាំឱ្យសហគមន៍ចូលរួមលុបបំបាត់ជម្រកមូស។ លោកបន្តថា ៖«ការលុបបំបាត់ជម្រកមូសនេះដែរ គឺត្រូវការការចូលរួមពីប្រជាពលរដ្ឋ ដើម្បីលុបបំបាត់ថ្លុកដក់ទឹកដែលជាជម្រកមូស និងសម្អាតបរិស្ថានជុំវិញផ្ទះឱ្យបាន៣០០ម៉ែត្រ គ្រប់ៗគ្នា ទើបអាចកាត់បន្ថយការកកើតមូសទាំងនេះបាន»។

បច្ចុប្បន្ន រដ្ឋបាលរាជធានីភ្នំពេញ និងមន្ទីរសុខាភិបាលរាជធានីភ្នំពេញ បានសហការគ្នាយ៉ាងសស្រាក់សស្រាំ អនុវត្តយុទ្ធនាការកម្ចាត់មូសខ្លា និងមូសអង្កាម ដើម្បីឈានទៅលុបបំបាត់ជំងឺគ្រុនឈាមគ្រប់ទីតាំងភូមិសាស្ត្រក្នុងរាជធានីភ្នំពេញ៕