គម្រោងពង្រីកសមត្ថភាពប្រព័ន្ធផ្គត់ផ្គង់ទឹកស្អាតខេត្តស្វាយរៀង នឹងបញ្ចប់ការងារសាងសង់នៅចុងឆ្នាំ២០២៥

គម្រោងពង្រីកសមត្ថភាពប្រព័ន្ធផ្គត់ផ្គង់ទឹកស្អាតខេត្តស្វាយរៀង នឹងបញ្ចប់ការងារសាងសង់ នៅចុងឆ្នាំ២០២៥។តាមរយៈសមិទ្ធផលនៃគម្រោងនេះ រដ្ឋាករទឹកស្វាយរៀង និងមានសមត្ថភាពផលិត ទឹកស្អាតសរុប ២២ ៦០០ម៣/ថ្ងៃ និងតបណ្តាញចែកចាយទឹកស្អាតសរុបប្រវែង ២៣៨ ៣៦៧គ.ម ដែលនឹងអាចមានលទ្ធភាពផ្គត់ផ្គង់ទឹកស្អាតដែលមានគុណភាព សុវត្តិភាព និងនិរន្តភាព ជូនប្រជាពលរដ្ឋនៅក្រុងស្វាយរៀង និ ស្រុកស្វាយជ្រុំ សរុបប្រមាណ ១១៧ ៥៣០នាក់។

គម្រោងនេះនឹងរួមចំណែកធ្វើឱ្យរដ្ឋាករទឹកស្វាយរៀងអាចឈានសម្រេច បាននូវគោលនយោបាយរបស់រាជរដ្ឋាភិបាល ដែលបានកំណត់ថា “ត្រឹមឆ្នាំ២០៣០ សម្រេចនូវការទទួលបានសាកលកម្ម និងសមធម៌នូវទឹកបរិភោគដែលមានសុវត្ថិភាព និងថ្លៃសមរម្យសម្រាប់ប្រជាជនទាំងអស់”។

លោក ទេព ណារើន អគ្គនាយករដ្ឋាករទឹកស្វាយរៀង កាលពីថ្ងៃទី៦ ខែកុម្ភៈ ឆ្នាំ២០២៥ បានឱ្យដឹងថា រដ្ឋាករទឹកស្វាយរៀង មានតំបន់សេវាកម្ម ចំនួន ៨១ភូមិ ស្ថិតក្នុង ៧សង្កាត់ ក្រុងស្វាយរៀង និង ៥ឃុំ ស្រុកស្វាយជ្រំ រួមមាន ១.សង្កាត់ស្វាយរៀង ២.សង្កាត់ព្រៃឆ្លាក់ ៣.សង្កាត់ពោធិ៍តាហោ ៤.សង្កាត់ស្វាយតឿ ៥.សង្កាត់សង្ឃរ ៦.សង្កាត់ ចេក ៧.សង្កាត់គយត្របែក ក្រុងស្វាយរៀង ៨.ឃុំស្វាយជ្រំ ៩.ឃុំតាសួស ១០.ឃុំកំពង់ចំឡង ១១.ឃុំពោធិ៍រាជ១២.ឃុំ បាសាក់ ស្រុកស្វាយជ្រំ ខេត្តស្វាយរៀង។

ក្នុងនោះដែរ ចំនួនគ្រួសារក្នុងតំបន់សេវាកម្មមាន ២៤ ២៥៥គ្រួសារ ស្មើនឹង ១០៤,៦១៨ (ស្ថិតិឆ្នាំ២០២២) លោកបានលើកឡើងថាប្រភពទឹក គឺបានមកពីទន្លេវ៉ៃគោ និងទឹកអណ្តូង ចំនួន៣ ដែលមាជម្រៅ ២០០ម៉ែត្រ។

លោកបានឱ្យដឹងបន្ថែមថា បច្ចុប្បន្ននេះ រដ្ឋាករទឹកស្វាយរៀង មានសមត្ថភាពផលិតសរុប ១៥,៨០០ម៣/ថ្ងៃ ដោយមានចំនួន ៣រោងចក្រ ក្នុងនោះ រោងចក្រចាស់ ៤,៨០០ម៣/ថ្ងៃ (គម្រោងADB ៣២៣២-២០០៤-២០០៦)។ រោងចក្រ ADB ៩,០០០ម៣/ថ្ងៃ (គម្រោងADB ៣២៣២-២០២១-២០២៣) និងទិញទឹកដុំ ២,០០០ម៣/ថ្ងៃ (ពីក្រុមហ៊ុនលីទ្រី ខែមេសា ឆ្នាំ២០២០)៕

ដោយ៖ភក្ដី