រដ្ឋមន្ត្រីដែនដី​ អះអាងថា ក្បាលដីនៅសល់៥០ម៉ឺនក្បាលដីទៀត និងចុះបញ្ចប់នៅឆ្នាំ២០២៦ខាងមុខ

ឧបនាយករដ្ឋមន្រ្តី រដ្ឋមន្ដ្រីក្រសួងរៀបចំដែនដី នគររូបនីយកម្ម និងសំណង់ លោក សាយ សំអាល់ បានថ្លែងឱ្យដឹងថា រហូតមកដល់ឆ្នាំ២០២៥នេះ ក្រសួងបានចុះបញ្ជីដីធ្លី បានចំនួនប្រមាណ៤លានក្បាលដីហើយ ខណៈសល់ ៥០ម៉ឺនក្បាលដីទៀតតែប៉ុណ្ណោះ នឹងត្រូវបិទបញ្ចប់នៅឆ្នាំ២០២៦ខាងមុខ។

ថ្លែងនៅក្នុងពិធីបុកគ្រឹះសាងសង់អាគារកងរាជអាវុធហត្ថខេត្តតាកែវថ្មី នៅសង្កាត់រកាក្រៅ ក្រុងដូនកែវ ខេត្តតាកែវ កាលពីថ្ងៃសុក្រ ទី៧ ខែកុម្ភៈ ឆ្នាំ២០២៥ លោកឧបនាយករដ្ឋមន្ដ្រី សាយ សំអាល់ បានមានប្រសាសន៍បន្តថា មន្រ្តីក្រសួងដែនដី នឹងប្រឹងប្រែងបិទបញ្ចប់ការចុះបញ្ជីក្បាលដី ដែលនៅសល់ប្រមាណ៥០ម៉ឺនក្បាលដីទៀត នៅឆ្នាំ២០២៦ខាងមុខនេះ។ ការបិទបញ្ចប់ការចុះបញ្ជីក្បាលដីជូនប្រជាពលរដ្ឋ វានឹងធ្វើឱ្យប្រជាពលរដ្ឋមានសុវត្ថិភាព ក្នុងការកាន់កាប់ដីធ្លី និងកាត់បន្ថយពីបញ្ហាជំលោះដីធ្លីផងដែរ។

លោក សាយ សំអាល់ បានលើកឡើងទៀតថា តាមរយៈការចុះបញ្ជីដីធ្លីជូនប្រជាពលរដ្ឋបានចំនួនដ៏ច្រើននេះ វាបានធ្វើឱ្យបញ្ហាទំនាស់ និងជំលោះដីធ្លីនៅក្នុងប្រទេសកម្ពុជា មានការធ្លាក់ចុះយ៉ាងខ្លាំង​ ពោលទំនាស់ដីធ្លីដែលកំពុងតែស្ថិតនៅក្នុងដៃរបស់ក្រសួងដែនដី មាននៅក្រោម១ពាន់រឿង ហើយមន្រ្តីក្រសួងកំពុងតែប្រឹងប្រែងដោះស្រាយបញ្ចប់បញ្ហាក្នុងពេលឆាប់ៗខាងមុខនេះ ដោយឡែកបញ្ហារបស់បុរីក៏ក្រសួងបានដោះស្រាយបានមួយចំនួនធំ ហើយរហូតមកដល់ពេលនេះមានបុរីជាង ២០ប៉ុណ្ណោះដែលកំពុងតែដោះស្រាយបន្ត។

សូមបញ្ជាក់ថា​ បញ្ជាការដ្ឋានកងរាជអាវុធហត្ថខេត្តតាកែវថ្មី បានបុកគ្រឹះដំណេីរការសាងសង​ហេីយ​ នៅថ្ងៃទី០៧​ ខែកុម្ភៈ​ ឆ្នាំ២០២៥​ ក្រោមការផ្ដួចផ្ដើមកសាងពីសំណាក់​នាយឧត្តមសេនីយ៍​ សៅ​ សុខា​ អគ្គមេបញ្ជាការរងកងយោធពលខេមរភូមិន្ទ​ មេបញ្ជាការកងរាជអាវុធហត្ថលេីផ្ទៃប្រទេស​ អនុវត្តការងារផ្ទាល់ដោយ លោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ​ ដែលមានទីតាំងនៅភូមិត្រពាំងអង្គ​ សង្កាត់រកាក្រៅ​ ក្រុងដូនកែវ​ ខេត្តតាកែវ៕

​អត្ថបទ៖ វីរៈ