អភិបាលរាជធានីភ្នំពេញថាការដាក់អនុវត្តន៍ផ្លូវថ្មើរជើងធ្វើឱ្យអាជីវករលក់ដាច់ជាងមុន

អភិបាលរាជធានីភ្នំពេញលោក ឃួង ស្រេង ថា​ការអនុវត្តន៍ផ្លូវថ្មើរជើងមុខវាំងកំពុងទទួលបានលទ្ធផលវិជ្ជមានដោយមានភ្ញៀវមកលេងច្រើន ហើយការប្រកបអាជីវកម្មកាន់តែប្រសើរ។

ថ្លែងប្រាប់អ្នកយកព័ត៌មានក្នុងពេលចុះពិនិត្យការអនុវត្តន៍ផ្លូវថ្មើរជើងមុខវាំងសប្ដាហ៍ទី២ នៅថ្ងៃទី៩ ខែកុម្ភៈ ឆ្នាំ២០២៥ លោក ឃួង ស្រេង ថាសប្ដាហ៍នេះមានភ្ញៀវជាច្រើនចូលទទួលទានអាហារតាមភោជនីយដ្ឋាននៅតាមផ្លូវថ្មើរជើងនេះ ដែលធ្វើឱ្យអ្នកលក់ៗអស់លឿនជាងថ្ងៃធម្មតា។

អភិបាលរាជធានីភ្នំពេញបញ្ជាក់ថាក្នុងសប្ដាហ៍ទី២នេះការអនុវត្តន៍សាកល្បងផ្លូវថ្មើរជើងនេះតាមការសង្កេត មានភ្ញៀវជាតិ-អន្តរជាតិមកលែងកំសាន្តជាច្រើនកើនលើសសប្តាហ៍មុនទៅទៀត។

លោកថា៖ «ពីមួយថ្ងៃទៅមួយថ្ងៃពលរដ្ឋពេញចិត្ត មកកម្សាន្តផ្លូវថ្មើរជើង ដែលជាការសាកល្បងរបស់រដ្ឋបាលរាជធានីភ្នំពេញ   ដែលទាំងអស់នេះជាការគាំទ្រ និងលើកទឹកចិត្តដល់រដ្ឋបាលរាជធានីភ្នំពេញ »។

លោក ឃួង ស្រេង សង្ឃឹមថាដំណើរការសាកល្បងនេះនឹងទទួលបានជោគជ័យហើយនឹងបន្តរៀបចំឱ្យមានរបៀបរៀបរយជាងនេះទៅទៀត ដើម្បីទាកទាញភ្ញៀវជាតិ និងអន្តរជាតិ ឱ្យចូលរួមកម្សាន្តសប្បាយ។ 

ចំពោះបញ្ហានេះទីតាំងចតឡាន ម៉ូតូវិញ រហូតមកដល់ពេលនេះសាលារាជធានីភ្នំពេញមិនទាន់អាចរកទីតាំងបាននៅឡើយទេ តែម្ចាស់ឡានអាចផ្ញើបាននៅតាមទីតាំងឯកជនមួយចំនួននៅអតីតពន្ធនាគារតេ៣ ដោយឡែកសម្រាប់ម៉ូតូ អាចផ្ញើបាននៅសាលសន្និសីទចតុមុខ ក្នុងតម្លៃត្រឹមតែ១ពាន់រៀល។

គួរឱ្យដឹងថាការសាកល្បងផ្លូវថ្មើរជើង (Walk Street) ត្រូវបានសាលារាជធានីភ្នំពេញធ្វើឡើងនៅរៀងរាល់ថ្ងៃសៅរ៍ និងថ្ងៃអាទិត្យ ដោយចាប់ពីម៉ោង ៦ល្ងាចដល់ម៉ោង១១យប់ នៅតាមបណ្តោយតីរវិថីព្រះស៊ីសុវត្ថិ ចាប់ពីវិថីបក្សីចាំក្រុង (ផ្លូវលេខ៩៤) រហូតដល់មុខព្រះបរមរាជវាំង ស្ថិតនៅក្នុងខណ្ឌដូនពេញ រាជធានីភ្នំពេញ៕

អត្ថបទដោយ ស្រី រ័ត្ន