មានទឹកស្រោចស្រពគ្រប់គ្រាន់ កសិករនៅឃុំជ្រោយបន្ទាយ ​ពង្រីកផ្ទៃដី​ដាំដុះ​ស្រូវប្រាំងកើន​ដល់ជាង ២០០ ហិកតា

ប្រពន្ធ័ធារាសាស្ដ្រទំនប់បឹងខ្នាយរមាស គឺជាអាងស្ដុបទឹកដ៏ធំមួយ ស្ថិត​នៅភូមិកែង ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ ដែលមានវិសាលភាពផ្គត់ផ្គង់ទឹក គ្របដណ្ដប់លើផ្ទៃដីស្រែប្រាំងប្រមាណជាង ៦០០ ហិកតា។

ឆ្នាំមុន​ផ្ទៃដីបង្កបង្កើនផលស្រូវរដូវប្រាំងនៅទំនប់បឹងខ្នាយរមាស មានចំនួនត្រឹមតែ ៤៤០ ហិកតាប៉ុណ្ណោះ ប៉ុន្តែនៅឆ្នាំនេះ កើនឡើងដល់ជាង ៦០០ ហិកតា រីឯទិន្នផលស្រូវ ក៏មានការកើនឡើងចន្លោះ​ពី ៦ តោន ទៅ ៧ តោន ក្នុង ១ ហិកតា។ នេះបើ​តាមលោក ប៉ិច ងន់ស្រ៊ឺ មេឃុំជ្រោយបន្ទាយ ប្រាប់សារព័ត៌មាន​កម្ពុជាថ្មី។

លោក ប៉ិច ងន់ស្រ៊ឺ មេឃុំជ្រោយបន្ទាយ ស្រុកព្រែកប្រសព្វ​បាន​ឲ្យ​ដឹង​ថា ការប្រើប្រាស់ទឹកឆ្នាំនេះបានល្អប្រសើរ ដោយកន្លង​មកប្រជាកសិករ ក្នុងឃុំប្រើប្រាស់ទឹកខ្ជះខ្ជាយ។ ជាក់ស្ដែងក្នុងឆ្នាំ២០២៤ កសិករក្នុងឃុំបានជួបបញ្ហាកង្វះ​ទឹកច្រើន ដោយអាជ្ញាធរឃុំ​បានប្រើប្រាស់ម៉ាស៊ីនបូមទឹក​ចំនួន ៣ ទៅ ៤ គ្រឿង ដើម្បីបូមជួយសង្គ្រោះស្រូវ​ប្រជាពលរដ្ឋ​។ ប៉ុន្តែឆ្នាំនេះដោយអាជ្ញាធរឃុំ បានចុះណែនាំផ្សព្វផ្សាយដល់ប្រជាកសិករឲ្យ​ចេះប្រើទឹកសន្សំសំចៃឃើញថា ឆ្នាំនេះមានទឹកប្រើប្រាស់គ្រប់គ្រាន់ ហើយផ្ទៃដីធ្វើស្រែប្រាំងក៏​កើនជាងឆ្នាំមុន រហូតមកដល់ពេលនេះ ប្រជាកសិករចាប់ផ្ដើមប្រមូលផលជាបណ្តើរៗផងដែរ។

ប្រពន្ធ័ធារាសាស្ដ្របឹងខ្នាយរមាស មានប្រឡាយមេមួយខ្សែ និងប្រឡាយរងចំនួន ៩ ខ្សែ ដែលអាចផ្គត់ផ្គង់ទឹកលើផ្ទៃដីជាង ៦០០ ហិកតា។

ពាក់ព័ន្ធនឹងប្រពន្ធ័ធារាសាស្ដ្រនេះ មេឃុំជ្រោយបន្ទាយ​បាន​បញ្ជាក់ថា គឺអាច​ធ្វើស្រូវបានតែម្តងទេ មិនអាចធ្វើពីរដងបានឡើយ ដោយសារអាងស្តុបទឹកបឹងខ្នាយរមាសមានបរិមាណកំណត់។

នៅក្នុងឃុំជ្រោយបន្ទាយ ផ្ទៃដីបង្កបង្កើនផលដំណាំស្រូវបែងចែកជាពីរ មានផ្ទៃដីស្រែវស្សា និងផ្ទៃដីស្រែប្រាំង។ ក្នុងនោះ ផ្ទៃដីស្រែប្រាំងក្នុងផែនការ នៅទូទាំងឃុំមានចំនួនសរុប ៨០០ ហិកតា ប៉ុន្តែជាក់ស្ដែងអនុវត្តកើនឡើងដល់ជាង ១ ពាន់ហិកតា លើសផែនការឃុំ៕

អត្ថបទ៖ ប្រុញ វិធិន