ព័ត៌មានជាតិ

មន្ត្រីជំនាញសុខភាពសត្វ ចុះចាក់វ៉ាក់សាំងជំងឺសាទឹកសត្វគោ នៅស្រុកតាំងគោក

បានផុស

១ ម៉ោង មុន

នៅ

ថ្ងៃពុធ ១២ កុម្ភៈ ២០២៥

ដោយ

កាលពីថ្ងៃទី ១១ ខែកុម្ភៈ ឆ្នាំ ២០២៥ លោក ចាន់ បញ្ញាវ័ន្ត ប្រធានការិយាល័យផលិតកម្ម និងបសុព្យាបាលខេត្តកំពង់ធំ ដឹកនាំសហការី ចុះចាក់វ៉ាក់សាំងជំងឺសាទឹកសត្វគោរបស់ប្រជាពលរដ្ឋ នៅឃុំទ្រាល ស្រុកតាំងគោក ប្រមាណជិត ២០០ ក្បាល និងផ្តល់វ៉ាក់សាំងជំងឺសាទឹក ២ ០០០ កម្រិត ដល់ភ្នាក់ងារសត្វភូមិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ចាន់ បញ្ញាវ័ន្ត លើកឡើងថា ការចាក់វ៉ាក់សាំងជំងឺសាទឹក ត្រូវធ្វើឲ្យបានទៀងទាត់ និងតាមរដូវកាល ដែលជានិច្ចកាលត្រូវធ្វើវ៉ាក់សាំង ២ ដង ក្នុង ១ ឆ្នាំ ទើបអាចការពារជំងឺបាន។ ជំងឺដែលតែងតែកើតមានចំពោះសត្វគោ ក្របី ជាញឹកញាប់ និងបង្កជាគ្រោះមហន្តរាយមាន ៤ ប្រភេទសំខាន់ គឺ ជំងឺបូសខ្យល់ កើតឡើងនៅរដូវក្តៅខ្លាំង ចន្លោះខែកុម្ភៈ ដល់ ខែឧសភា , ជំងឺសាទឹក កើតឡើងភាគច្រើននៅរដូវភ្លៀងធ្លាក់ដំបូង ហើយពេលខ្លះក៏អាចកើតឡើងនៅរដូវក្តៅ ផងដែរ, ជំងឺអ៊ុតក្តាម ធ្វើទុកសត្វនៅរដូវភ្លៀងធ្លាក់ជោកជាំ មានរោគសញ្ញាអាចឈឺជើង និងហៀរទឹកមាត់ មិនស៊ីស្មៅ ជាដើម។

លោកបន្តថា ក្រៅពីចាក់វ៉ាក់សាំងបានទៀងទាត់ ប្រជាកសិករដែលមានសត្វគោ ក្របី ត្រូវយកចិត្តទុកដាក់ចំពោះទីកន្លែងរស់នៅរបស់សត្វ សម្អាតទ្រុង ឬ ក្រោលជាប្រចាំ បាញ់ថ្នាំសម្លាប់មេរោគ ឲ្យបានញឹកញាប់ យ៉ាងហោច ២ ដង ក្នុង ១ ខែ ផ្តល់ទឹក និងស្មៅ ព្រមទាំងចំបើងឲ្យស៊ីគ្រប់គ្រាន់។

ជាមួយគ្នានេះ លោកបានអំពាវនាវដល់ប្រជាពលរដ្ឋដែលជាម្ចាស់សត្វទាំងអស់ ពិនិត្យ និងតាមដានសុខភាពសត្វរបស់ខ្លួន ក្នុងករណីសង្ស័យថា សត្វឈឺ សូមរាយការណ៍ទៅអាជ្ញាធរមូលដ្ឋាន និងភ្នាក់ងារសុខភាពសត្វភូមិ រាយការណ៍បន្តមកមន្ទីរកសិកម្ម រុក្ខាប្រមាញ់ និងនេសាទខេត្ត ហើយមន្ទីរនឹងបញ្ជូនមន្ត្រីជំនាញចុះទៅដល់មូលដ្ឋាន ដើម្បីឲ្យគាត់ចុះទប់ស្កាត់ និងមានវិធានការការពារកុំឲ្យមានជំងឺឆ្លងទៅសត្វដទៃទៀត ឲ្យបានទាន់ពេលវេលា។ ក្នុងករណីដែលមានសត្វងាប់ សូមកុំយកទៅបរិភោគ និងលក់ទៅឲ្យឈ្មួញ ព្រោះអាចបណ្ដាលឲ្យឆ្លងរីករាលដាលដល់សត្វ និងមនុស្សផងដែរ៕

អត្ថបទ ៖ ឈាង មករា