សមត្ថកិច្ចខេត្តព្រះវិហារ ចុះកម្ទេចរណ្តៅរ៉ែមាសខុសច្បាប់ ១កន្លែង នៅភ្នំដែក

សមត្ថកិច្ចខេត្តព្រះវិហារ នាថ្ងៃទី១១ ខែកុម្ភៈ ឆ្នាំ២០២៥ បានចុះកម្ទេចរណ្តៅរ៉ែមាសខុសច្បាប់ ១កន្លែង នៅភ្នំដែក រមណីយ ស្រុករវៀង ខេត្តព្រះវិហារ។ ការចុះបង្ក្រាបនេះ ដឹកនាំដោយលោក ស្រេង វុទ្ឋា ព្រះរាជអាជ្ញារងអមសាលាដំបូងខេត្តព្រះវិហារ សហការជាមួយកងកម្លាំងអាវុធហត្ថខេត្ត។

លោក ស៊ុន ចន្ទ័រក្សា ប្រធានមន្ទីររ៉ែ និងថាមពលខេត្តព្រះវិហារ បានឱ្យដឹងថា ក្នុងប្រតិបត្តិការនេះបង្រ្កាបបាន រណ្តៅរ៉ែមាសចំនួន ១រណ្តៅ និងកម្ទេចចោលរោងស្នាក់នៅរបស់កម្មករ ៣រោង (៦បន្ទប់), អាងត្រាំគីមី ១៥ម៉ែត្រx២០ម៉ែត្រ ចំនួន ២អាង និយាមការ X=499202; Y=1473716 ដោយក្រុមការងារបានកាយបំផ្លាញរណ្ដៅទាំង២ ដើម្បីចាត់ការបន្តតាមនិតិវិធី។

លោក ស៊ុន ចន្ទ័រក្សា បានឱ្យដឹងបន្ថែមថា កន្លងមក មន្ទីរជំនាញសហការជាមួយអាជ្ញាធរស្រុករវៀង តែងតែចុះផ្សព្វផ្សាយហាមប្រាមប្រជាពលរដ្ឋ កុំឱ្យនាំគ្នាជីករ៉ែមាសដែលមានរណ្តៅជ្រៅៗ អាចបង្កឱ្យមានគ្រោះថ្នាក់ដល់អាយុជីវិត។ ប្រសិនជាជីកយករ៉ែមាសត្រឹមរណ្តៅរាក់ ឬបាញ់ឈីត អាជ្ញាធរនឹងមន្ទីរជំនាញមិនហាមឃាត់ទេ ពីព្រោះជាឆ្នាំងបាយរបស់ពលរដ្ឋ។

ករណីបង្ក្រាបនេះដែរ ម្ចាស់ទីតាំងរុករករ៉ែអាណាធិបតេយ្យខាងលើជាជនជាតិចិន បានរត់គេចខ្លួនបាត់អស់បន្ទាប់ពីសមត្ថកិច្ចទៅដល់៕

ដោយ៖ជុន កុសល