ព័ត៌មានជាតិ

ពលរដ្ឋធ្វើដំណើរតាមផ្លូវ ៦០ ម៉ែត្រ សំណូមពរអ្នកបើកបរទាំងអស់ គោរពច្បាប់ចរាចរណ៍ ទោះបីមានទ្រូងផ្លូវ ឬ គំនូសសញ្ញាចរាចរណ៍ក៏ដោយ

បានផុស

២ ខែ មុន

នៅ

ថ្ងៃពុធ ១២ កុម្ភៈ ២០២៥

ដោយ

ប្រជាពលរដ្ឋជាអ្នកដំណើរតាមបណ្ដោយផ្លូវលេខ ៦០ ម៉ែត្រ បានសំណូមពរដល់បណ្ដាអ្នកបើកបរទាំងអស់ សូមចូលរួមគោរពច្បាប់ចរាចរណ៍ឱ្យបានខ្ជាប់ខ្ជួនទាំងអស់គ្នា បើទោះបីជានៅលើផ្លូវនេះមានទ្រូងផ្លូវ ឬ គំនូសសញ្ញាចរាចរណ៍ក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពលរដ្ឋទាំងអ្នកបើកបររថយន្ត ក៏ដូចជាអ្នកបើកម៉ូតូ យល់ឃើញថា ការដាក់របាំងដែក ឬ របាំងថ្មពុះចែកទ្រូងផ្លូវ ក៏ដូចជាគំនូសសញ្ញាចរាចរណ៍ផ្សេងៗ លើដងផ្លូវ គឺជារឿងល្អប្រសើរ និងល្អបំផុត ដើម្បីកាត់បន្ថយបានពីគ្រោះថ្នាក់ចរាចរណ៍នៅលើកំណាត់ផ្លូវ ៦០ ម៉ែត្រ ប៉ុន្តែបើអ្នកបើកបរទាំងឡាយនៅតែបន្តការបើកបរដោយមិនគោរពច្បាប់ បើកបរដោយការបើកបញ្ច្រាស បើកបរដោយការបំពាន ឬ ស្ថិតក្នុងស្ថានភាពស្រវឹងនោះ គ្រោះថ្នាក់ក៏នៅតែអាចកើតមានឡើងដែរ។

ពលរដ្ឋជាអ្នកដំណើរ ក៏បានសំណូមពរដល់ប្រជាពលរដ្ឋទាំងអស់ ដែលជាអ្នកបញ្ជាយានយន្ត សូមគោរពច្បាប់ចរាចរណ៍ទាំងអស់គ្នា និង កុំខ្លាចប៉ូលិស។ ត្រូវគោរពច្បាប់ ដើម្បីកាត់បន្ថយគ្រោះថ្នាក់ចរាចរណ៍ ព្រោះគ្រោះថ្នាក់ចរាចរណ៍កើតឡើងតែងតែបន្សល់សោកនាដកម្ម បាត់បង់សមាជិកគ្រួសារ និងក្លាយជាជនពិការអស់មួយជីវិត។

គួរបញ្ជាក់ថា របាំងថ្ម និង របាំងដែក ត្រូវបានរៀបចំដាក់បែងចែកជា ០២ កំណាត់ផ្លូវ ដោយកំណាត់ផ្លូវទី ០១ គិតចាប់ពីស្ពានអាកាសមរតកតេជោ ដល់ស្តុបសឺដែស ត្រូវដាក់របាំងដែកពុះចែកទ្រូងផ្លូវ ដោយកំណត់ល្បឿនត្រឹម ៤០km/h។ ដោយឡែកគិតចាប់ពីស្តុបសឺដែស ដល់ផ្លូវជាតិលេខ ០២ ត្រូវដាក់របាំងថ្មពុះចែកទ្រូងផ្លូវ ដោយកំណត់ល្បឿនត្រឹម ៦០km/h ប៉ុណ្ណោះ។

ទន្ទឹមនឹងការដាក់ទ្រូងផ្លូវខាងលើនេះដែរ បច្ចុប្បន្ន កម្លាំងសមត្ថកិច្ចរាជធានី និងនគរបាលខណ្ឌពាក់ព័ន្ធ នៅតែបន្តពង្រឹងការអនុវត្តច្បាប់ចរាចរណ៍ ដោយការចាប់ល្បឿននៅពេលថ្ងៃ ហើយអនុវត្តចាប់ជាតិស្រវឹងនៅពេលយប់ ដើម្បីជាផ្នែកសំខាន់មួយក្នុងការកាត់បន្ថយគ្រោះថ្នាក់ដែលតែងឧស្សាហ៍បង្កឡើងដោយអ្នកបើកបរយានយន្តទាំងឡាយនៅបន្តការល្មើសច្បាប់ផងដែរ៕

អត្ថបទ ៖ សុភា