សហជីព ថា បទពិសោធន៍ជាក់ស្ដែងពុំមានការកំណត់ចំនួននៃការប្រើប្រាស់សេវា ប.ស.ស នោះទេ

សហជីពនៅកម្ពុជាបានអះអាងថា ពេលកម្មករទៅទទួលសេវាសុខាភិបាល ប.ស.ស គឺពុំមានការកំណត់ចំនួននៃការទៅទទួលសេវានោះទេ។ ពួកគេចាត់ទុកការផ្សាយព័ត៌មានមិនពិតទាក់ទងនឹងការប្រើប្រាស់ប័ណ្ណ ប.ស.ស គឺជាការញុះញង់បង្កឱ្យប៉ះពាល់ដល់សេចក្ដីថ្លៃថ្នូរបស់ក្រសួងការងារ និងបេឡាជាតិរបបសន្ដិសុខសង្គម។

ប្រធានសហភាពពលកម្មជាតិកម្ពុជា លោកសំ សឿន បានថ្លែងថាព័ត៌មានដែលថាមានការកំណត់ចំនួននៃការទៅទទួលសេវាសុខាភិបាលដោយប្រើបណ្ណប.ស.ស គឺជាព័ត៌មានមិនពិតក្នុងគោលបំណងធ្វើឱ្យមហាជនយល់ច្រឡំ ខឹងសម្បារ យល់ខុស ដកសេចក្តីទុកចិត្ត លើការប្រើប្រាស់សេវា ប.ស.ស។

លោកថ្លែងថា «ខ្ញុំសូមអំពាវនាវដល់សមាជិកបសសទាំងអស់កុំជឿតាមការបំភ្លៃការពិតរបស់ក្រុមប្រឆាំងថា សេវាបសសប្រើបាន១ខែតែ២ដង គឺខុសស្រឡះទាំងស្រុង ការពិតសេវាបសសប្រើបានគ្រប់ពេលឱ្យតែសមាជិកបសសឈឺ ហើយទៅមន្ទីរពេទ្យដៃគូ ក៏ដូចជាមន្ទីរពេទ្យស្ថាប័នរដ្ឋផងដែរ»។

ទន្ទឹមនេះប្រធានសហភាពកម្ពុជាពន្លឺកម្មករលោក អ៊ុន ដារ៉ា ដែលជាអ្នកធ្វើការងារផ្ទាល់ជាមួយកម្មករនិយោជិត ពិនិត្យឃើញថា ការប្រើប្រាស់បសសមិនមានការកំណត់ចំនួនដងនៃការទៅមន្ទីរពេទ្យដើម្បីពិនិត្យ ពិគ្រោះ និងព្យាបាលនោះទេ។ លោកដារ៉ាយល់ឃើញថា អ្នកដែលបំភ្លៃព័ត៌មាននេះគឺមិនដែលនៅជិតកម្មករ និងមិនដឹងថា ការប្រើប្រាស់សេវាបសសពិតប្រាកដយ៉ាងណានោះទេ ហើយការផ្សាយព័ត៌មានគ្មានការពិតនេះ ដើម្បីតែបង្ខូចបង្កាច់ក្រសួងការងារ ពិសេសរាជរដ្ឋាភិបាលដែលកំពុងយកចិត្តទុកដាក់លើសុខុមាលភាពប្រជាជន។

លោកថ្លែងថា៖ «បងប្អូនមួយចំនួនដែលលើកឡើងដោយគ្មានអំណះអំណាងបើឈប់បានឈប់ទៅ ហើយខ្ញុំសូមអំពាវនាវដល់បងប្អូនកម្មករពុកម៉ៃពូមីងទាំងអស់ ដែលជាសមាជិកបសសកុំជឿតាមពួកញុះញង់មួយក្តាប់តូចនេះឱ្យសោះ ពួកនេះពូកែណាស់អស់មួយរឿងចូល១រឿង រឿងមិនពិតក៏និយាយ រឿងអីក៏និយាយដើម្បីបំផ្លាញអ្វីដែលយើងកំពុងមាន»។

ពាក់ព័ន្ធរឿងនេះបេឡាជាតិសន្តិសុខសង្គមនៃក្រសួងការងារ និងបណ្តុះបណ្តាលវិជ្ជាជីវៈបានចេញសេចក្តីបំភ្លឺ យ៉ាងច្បាស់ថា ការប្រើប្រាស់សេវាបសសក្នុងការពិនិត្យពិគ្រោះព្យាបាល នៅតាមមូលដ្ឋានសុខាភិបាលមិនមានការកំណត់ចំនួនដងទេ បើមានការអនុវត្តខុសការពិតនេះ សូមបងប្អូនទាក់ទងលេខ ១២៨៦ ឬ១២៩៧ ដើម្បីរាយការណ៍ឬប្តឹងតាមបណ្តឹងអនាមិកដើម្បីបសសចាត់ការតាមច្បាប់៕