ព័ត៌មានជាតិ

ស្រុកសំឡូត នៅមានតំបន់សក្តានុពល ៥ ផ្សេងទៀត ក្រៅពីរមណីយដ្ឋានដែលមានស្រាប់

បានផុស

២ ខែ មុន

នៅ

ថ្ងៃព្រហស្បតិ៍ ១៣ កុម្ភៈ ២០២៥

ដោយ

ស្រុកសំឡូតនៃខេត្តបាត់ដំបង ត្រូវបានគេស្គាល់ថា ជាស្រុកមួយដែលសម្បូរទៅដោយផលដំណាំកសិកម្មច្រើនប្រភេទ និងមានសក្តានុពលលើវិស័យទេសចរណ៍ផងដែរ ខណៈបច្ចុប្បន្ន ស្រុកមួយនេះមានរមនីយដ្ឋានចំនួន ៥ ក្រៅពីតំបន់ចំនួន ៥ ទៀត ដែលមានសក្តានុពលលើវិស័យទេសចរណ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីនៅមូលដ្ឋានស្រុកថា ប្រជាពលរដ្ឋនៅក្នុងស្រុកសំឡូត មានកម្រិតជីវភាពសមរម្យជាងគ្រាកន្លងទៅ តាមរយៈការប្រកបមុខរបរកសិកម្ម ស្របតាមប្រភពដីដ៏មានជីវជាតិល្អតាមធម្មជាតិ សម្បូរដោយព្រៃឈើ ជ្រោះជ្រលងដងភ្នំ មានប្រភពទឹកមិនចេះរីងស្ងួត កសិផលផ្តល់ទិន្នផលតាមការរំពឹងទុករបស់កសិករ។

ប្រភពបន្តថា ចំពោះវិស័យទេសចរណ៍ ក៏មានវិសាលភាពធំធេង សម្រាប់ទាក់ទាញអារម្មណ៍ភ្ញៀវទេសចរណ៍ មកម្តងហើយនៅតែចង់ទៅកម្សាន្តម្តងទៀត។ បច្ចុប្បន្ន អាជ្ញាធរមូលដ្ឋានស្រុកក៏បានធ្វើការទប់ស្កាត់ការទន្ទ្រានព្រៃពីសំណាក់ជនឆ្លៀតឱកាសមួយចំនួនផងដែរ ដើម្បីអភិរក្សហ្វូងសត្វទាំងពួងឲ្យកាន់តែសម្បូរបែប។

អ្នកស្រី ឡឹប ធីម ជាអ្នកស្រុកមោងឬស្សី ក្នុងដំណើរកម្សាន្តនៅរមនីយដ្ឋានមួយ ក្នុងស្រុកសំឡូត បានឲ្យ កម្ពុជាថ្មី ដឹងថា អ្នកស្រីរីករាយណាស់ ពេលបានទៅលេងកម្សាន្តម្តងៗ នៅស្រុកសំឡូតនេះ សម្បូរទីកន្លែងកម្សាន្តណាស់ បើទោះបីមិនមានរមណីយដ្ឋាន ក៏មានតំបន់ដែលគួរឲ្យទាក់ទាញអារម្មណ៍ដែរ។

អ្នកស្រីបន្តថា «ស្ទើររាល់សប្តាហ៍ ខ្ញុំតែងទៅកម្សាន្តតាមរមណីយដ្ឋាន ដែលមានដងអូរត្រជាក់ទឹកថ្លាដូចកញ្ចក់ ហើយក្រៅពីនេះ ខ្ញុំបានដើរកម្សាន្តក្នុងចម្ការរបស់អ្នកស្រុក មើលទៅគួរឲ្យស្រស់ស្រាយណាស់ ឃើញផលដំណាំពួកគាត់ផ្លែច្រើន ហើយក៏បានទិញបរិភោគក្នុងចម្ការទៀតផង ក្នុងនោះមានធុរេន មៀន ជាដើម។

លោក ហម អរុណ អនុប្រធានទេសចរណ៍ខេត្ត បានឲ្យដឹងថា ស្រុកសំឡូត គឺសម្បូរទៅដោយធនធានធម្មជាតិ ហើយបច្ចុប្បន្នមាន រមនីយដ្ឋានចំនួន ៥ សម្រាប់បម្រើដល់ភ្ញៀវទេសចរ ហើយក្រៅពីនេះ មានតំបន់ចំនួន ៥ ទៀត ដែលកំពុងមានសក្តានុពលផ្នែកវិស័យទេសចរណ៍ ដែលខាងមន្ទីរកំពុងយកចិត្តទុកដាក់លើតំបន់ទាំង ៥ នេះ។