ភ្លៀងកក់ខែខ្លាំងបំផុតក្នុងរយៈពេល២០ឆ្នាំនៅវៀតណាម បង្កការជន់លិចធ្ងន់ធ្ងរ

ភ្លៀងកក់ខែមួយមេដ៏ខ្លាំងបំផុតមិនធ្លាប់ជួបប្រទះសោះក្នុងរយៈពេល២០ឆ្នាំមកនេះ បានវាយប្រហារភាគខាងត្បូងប្រទេសវៀតណាម ដោយបង្កការជន់លិចទីក្រុងហូជីមិញ យ៉ាងធ្ងន់ធ្ងរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ VN Express, ភ្លៀងបានធ្លាក់យ៉ាងចាស់ដៃនៅព្រឹកថ្ងៃព្រហស្បតិ៍ទី១៣ខែកុម្ភៈឆ្នាំ២០២៥ ដោយធ្លាក់ប្រហែល៥ម៉ោងដល់ម៉ោង៨ព្រឹក បណ្តាលឲ្យទីតាំងមួយចំនួនត្រូវជន់លិចយ៉ាងខ្លាំង បង្កការកកស្ទះចរាចរណ៍និងបិទផ្លូវក្រោមដី។

ក៏មានសេចក្តីរាយការណ៍អំពីការជន់លិចផ្ទះសម្បែងរបស់ប្រជាពលរដ្ឋផងដែរ ដោយកន្លែងខ្លះ ទឹកបានលិចចូលផ្ទះជម្រៅត្រឹមចង្កេះ ឯណោះ។

ទោះបីជាយ៉ាងណាក៏ដោយ មិនមែនតែហូជីមិញទេ សូម្បីខេត្តនៅជាប់នោះដូចជា Binh Duong, Ba Ria-Vung Tau និង Dong Nai ក៏រងគ្រោះធ្ងន់ដោយភ្លៀងកក់ខែនេះដែរ។

នេះគឺជាកំណត់ត្រាដ៏អាក្រក់មួយដែលទីក្រុងហូជីមិញ មិនធ្លាប់ជួបភ្លៀងកក់ខែធ្ងន់ធ្ងរបែបនេះឡើយ ចាប់តាំងពីឆ្នាំ២០០៦មក​ ដោយត្រឹមតែរយៈពេលខ្លីប៉ុណ្ណោះ ភ្លៀងបានធ្លាក់ហួសកម្រិតជាមធ្យមប្រចាំខែកុម្ភៈទាំងមូលទៅទៀត៕

អត្ថបទ៖ សុខ សុវណ្ណ

ចុចអាន៖ កម្ពុជានឹងមានភ្លៀងកក់ខែ គ្របដណ្តប់លើផ្ទៃដី១០-១៥% ចាប់ពីថ្ងៃទី១៣ ដល់ថ្ងៃទី២០