ព័ត៌មានជាតិ

សណ្ដាប់ធ្នាប់ជាប់របងសាលារៀនសន្ធរម៉ុក នៅតែជាបញ្ហាប្រឈម ខណៈអ្នកចតរថយន្តនៅតែបន្តចតលើផ្លូវសាធារណៈ

បានផុស

២ ខែ មុន

នៅ

ថ្ងៃព្រហស្បតិ៍ ១៣ កុម្ភៈ ២០២៥

ដោយ

សណ្ដាប់ធ្នាប់នៅជាប់របងសាលារៀនសន្ធរម៉ុក នៅតែជាបញ្ហាប្រឈម ខណៈអ្នកចតរថយន្តបន្តចតលើផ្លូវសាធារណៈ ធ្វើឲ្យបាត់បង់សណ្ដាប់ធ្នាប់ និង រំលោភលើផ្លូវសម្រាប់អ្នកថ្មើរជើង ដែលបច្ចុប្បន្ន ថ្នាក់ដឹកនាំក្រសួងមហាផ្ទៃ ក៏បានជំរុញលើកទឹកចិត្តដល់ អភិបាលរាជធានី អភិបាលខណ្ឌទាំង ១៤ ក្នុងមូលដ្ឋានរាជធានីភ្នំពេញ ឲ្យយកចិត្តទុកដាក់ពីបញ្ហាសណ្ដាប់ធ្នាប់នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីតាំងខាងលើនេះ ស្ថិតនៅកំណាត់ផ្លូវកម្ពុជាក្រោម ចំណុចមុខសាលាសន្ធរម៉ុក មូលដ្ឋានសង្កាត់ទឹកល្អក់ទី ១ ខណ្ឌទួលគោក រាជធានីភ្នំពេញ។

សិស្សានុសិស្សរៀននៅវិទ្យាល័យសន្ធរម៉ុក សុំមិនបញ្ចេញឈ្មោះ បានប្រាប់ កម្ពុជាថ្មី ថា រាល់ថ្ងៃពេលសម្រាកពីម៉ោងសិក្សា (ម៉ោងចេញលេង) ត្រូវចេញមកខាងក្រៅបរិវេណសាលា ដើម្បីទិញនំចំណីហូបនោះ ត្រូវសម្រេចចិត្តដើរលើផ្លូវជាសិទ្ធអាទិភាពរបស់យានយន្ត ឡានម៉ូតូ ដែលអាចបង្កហានិភ័យជាយថាហេតុបានគ្រប់ពេលវេលា។ ដូច្នេះ សំណូមពរដល់អាជ្ញាធរពាក់ព័ន្ធ ជាពិសេសអាជ្ញាធរខណ្ឌទួលគោក គួរមានវិធានការបន្តទៀត ដើម្បីកុំឲ្យអ្នកចតរថយន្តបន្តចតនៅទីតាំងផ្លូវសម្រាប់អ្នកថ្មើរជើងបែបនេះ។

ពាក់ព័ន្ធបញ្ហានេះ កាលពីរសៀលថ្ងៃទី ១៦ ខែកញ្ញា ឆ្នាំ ២០២៤ កន្លងទៅ កម្លាំងគណៈបញ្ជាការឯកភាពខណ្ឌទួលគោក បានចុះរៀបចំសណ្ដាប់ធ្នាប់ដែលប្រជាពលរដ្ឋបានយករថយន្តមកចតនៅលើចិញ្ចើមផ្លូវសម្រាប់អ្នកថ្មើរជើង ជាពិសេសសិស្សានុសិស្សដើរចេញចូលទៅសាលារៀន ក្នុងករណីនៅតែបន្តចតនោះ អាជ្ញាធរ នឹងស្ទូចយករថយន្តទៅរក្សាទុកនៅអធិការដ្ឋាននគរបាលខណ្ឌ ដើម្បីចាត់ការតាមនីតិវិធី។

ជាមួយគ្នានេះ ប្រជាពលរដ្ឋអ្នកធ្វើដំណើរ ក៏ដូចជាសិស្សានុសិស្ស បានសំណូមពរដល់អាជ្ញាធរ គួរបន្តចុះរៀបចំបន្តទៀតផង ដោយសាររហូតមកដល់ពេលនេះអ្នកចតរថយន្តនៅតែបន្តចតដដែល។

គួរជម្រាបថា កន្លងទៅ អាជ្ញាធរមូលដ្ឋានខណ្ឌទួលគោក បានចុះរៀបចំសណ្ដាប់ធ្នាប់តាមដងផ្លូវផ្សេងៗ ដូចជា ជុំវិញមន្ទីរពេទ្យ និងតាមផ្សារមួយចំនួនបានល្អប្រសើរ តែហាក់ចន្លោះនៅចំណុចមុខសាលារៀនសន្ធរម៉ុក ដែលជាទីប្រជុំជនរបស់សិស្សានុសិស្សចេញចូលដើរថ្មើរជើង៕

អត្ថបទ ៖ សុភា