ព័ត៌មានជាតិ

រដ្ឋមន្ត្រីក្រសួងការងារ រំពឹងថា កម្មវិធីបណ្ដុះបណ្ដាលជំនាញបច្ចេកទេស ផ្នែករថយន្តអេឡិចត្រូនិក នឹងទាក់ទាញអ្នកវិនិយោគកូរ៉េមកកម្ពុជាបន្ថែមទៀត

បានផុស

៤៦ វិនាទី មុន

នៅ

ថ្ងៃព្រហស្បតិ៍ ១៣ កុម្ភៈ ២០២៥

ដោយ

រដ្ឋមន្ត្រីក្រសួងការងារ បានរំពឹងថា តាមរយៈកម្មវិធីបណ្ដុះបណ្ដាលជំនាញបច្ចេកទេសផ្នែករថយន្តអេឡិចត្រូនិក នេះ នឹងអាចជួយទាក់ទាញអ្នកវិនិយោគកូរ៉េ មកកម្ពុជា បន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរំពឹងនេះ ក្នុងឱកាស លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានទទួលជួបសម្ដែងការគួរសម និងពិភាក្សាការងារ ជាមួយ លោក គីម ជីនផ្យូ (Kim Jin-Pyo) អតីតប្រធានរដ្ឋសភា សាធារណរដ្ឋកូរ៉េ និងជាប្រធានក្រុមប្រឹក្សាអង្គការដើម្បីពិភពលោកទាំងអស់គ្នា (Global Together) នៅទីស្ដីការក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី ១២ ខែកុម្ភៈ ឆ្នាំ ២០២៥ ម្សិលមិញ ដោយភាគីទាំងពីរ បានលើកឡើងពីការគាំទ្រលើកម្មវិធីបណ្ដុះបណ្ដាលជំនាញបច្ចេកទេស ជាពិសេសផ្នែករថយន្តអេឡិចត្រូនិក សម្រាប់អភិវឌ្ឍន៍កម្លាំងពលកម្មជំនាញនៅកម្ពុជា។

នាឱកាសនោះ លោក ហេង សួរ បានលើកឡើងដោយរំពឹងថា «តាមរយៈកម្មវិធីបណ្ដុះបណ្ដាលជំនាញបច្ចេកទេសផ្នែករថយន្តអេឡិចត្រូនិកនេះ នឹងអាចជួយទាក់ទាញអ្នកវិនិយោគកូរ៉េ មកកម្ពុជា បន្ថែមទៀត ដោយសារកម្ពុជាមានសិស្សដែលចេះជំនាញបច្ចេកទេស ដូចសិស្សនៅកូរ៉េដែរ»។

ទន្ទឹមនេះ លោករដ្ឋមន្ត្រី ក៏មើលឃើញថា ពេលដែលកម្ពុជាមានសិស្សមានជំនាញបច្ចេកទេសច្រើន គឺជាកត្តាដ៏ល្អប្រសើរដែលអាចគាំទ្រដល់គំនិតផ្ដួចផ្ដើមបង្កើតឲ្យមានតំបន់សេដ្ឋកិច្ចពិសេសកូរ៉េ នៅកម្ពុជា។ ក្នុងន័យនេះ លោករដ្ឋមន្ត្រី បានថ្លែងបញ្ជាក់ថា ក្រសួងការងារ និងបណ្ដុះបណ្ដាលវិជ្ជាជីវៈ ត្រៀមខ្លួនជាស្រេចចំពោះសំណូមពរជាក់ស្ដែង និងកិច្ចសហប្រតិបត្តិការ សម្រាប់គំនិតផ្ដួចផ្ដើមរវាងប្រទេសកម្ពុជា និងប្រទេសកូរ៉េ។

ជាមួយគ្នានេះដែរ លោក គីម ជីនផ្យូ បានបង្ហាញការពេញចិត្តចំពោះកិច្ចសហប្រតិបត្តិការរវាងសាធារណរដ្ឋកូរ៉េជាមួយរាជរដ្ឋាភិបាលកម្ពុជា ក៏ដូចជារវាងវិទ្យាស្ថានពហុបច្ចេកទេសកូរ៉េ ជាមួយវិទ្យាស្ថានពហុបច្ចេកទេសកម្ពុជា (NPIC) នៃក្រសួងការងារ និងបណ្ដុះបណ្ដាលវិជ្ជាជីវៈ ទៅលើកម្មវិធីបណ្ដុះបណ្ដាលជំនាញបច្ចេកទេសផ្នែករថយន្តអេឡិចត្រូនិក ដែលនឹងចូលរួមអភិវឌ្ឍន៍កម្លាំងពលកម្មជំនាញបច្ចេកទេសនៅកម្ពុជា។

លោកសង្ឃឹមថា តាមរយៈកិច្ចសហប្រតិបត្តិការរវាងក្រសួងការងារ និងបណ្ដុះបណ្ដាលវិជ្ជាជីវៈ ជាមួយ KOICA និងស្ថានទូតសាធារណរដ្ឋកូរ៉េប្រចាំកម្ពុជា នឹងជំរុញឲ្យកម្មវិធីបណ្ដុះបណ្ដាលនេះ ទទួលបានផ្លែផ្កា ជាមួយនឹងការអភិវឌ្ឍកម្លាំងពលកម្មជំនាញបច្ចេកទេសនៅកម្ពុជា ដែលអាចបំពេញតម្រូវការរបស់អ្នកវិនិយោគបរទេស៕

អត្ថបទ ៖ ពិសី