រថយន្តដឹកប្រេងឆា​ បុកជាមួយរថយន្តដឹកស្រាបៀរបួសមនុស្ស៥នាក់

មានករណីគ្រោះថ្នាក់ចរាចណ៍រវាងរថយន្តដឹកទំនិញប្រេងឆា និងរថយន្តដឹកស្រាបៀ បណ្ដាលឱ្យមនុស្សម្នាក់រងរបួសធ្ងន់ និងរងរបួសស្រាល៤នាក់។

ករណីគ្រោះថ្នាក់ចរាចរណ៍នេះកេីតឡេីងនៅវេលាម៉ោង១៤និង៣០នាទី ថ្ងៃទី១៤ ខែកុម្ភៈ ឆ្នាំ២០២៥ នៅលើបណ្ដោយផ្លូវវាងក្រុងលេខ ១១០ ខាងលិចមន្ទីរពេទ្យភ្នែកខេត្ត ស្ថិតនៅភូមិប្រហ៊ូត សង្កាត់រកាក្នុង ក្រុងដូនកែវ។

តាមការបញ្ជាក់បឋមពីសមត្ថកិច្ចនៅកន្លែងហេតុបានឱ្យដឹងថា ករណីគ្រោះថ្នាក់ចរាចរណ៍នេះ បង្កឡើងដោយរថយន្ត ២គ្រឿង បើកបរបញ្រ្ចាសទិសគ្នា ដោយរថយន្តដឹកទំនិញរបស់ក្រុមហ៊ុនស្រាបៀកម្ពុជា ធ្វើដំណើរពីទិសខាងជើងទៅត្បូង លុះមកដល់កន្លែងកើតហេតុក៏ប៉ះចំពីមុខជាមួយរថយន្តសាំយ៉ុងទឹកប្រេងឆា មកពីទិសខាងត្បូង ឆ្ពោះមកទិសជើង ក្នុងល្បឿនយ៉ាងលឿន សង្ស័យដាច់ក្រឡេកង់ ក៏រេចង្កូតមកប៉ះជាមួយឡានដឹកទំនិញស្រាបៀកម្ពុជា តែម្ដង បណ្ដាលឱ្យមនុស្ស១នាក់រងរបួសធ្ងន់ ដឹកទៅសង្រ្គោះបន្ទាន់នៅមន្ទីរពេទ្យបង្អែកខេត្ត និង៤នាក់ទៀតរងរបួសស្រាល។

ក្រោយពេលកើតហេតុសមត្ថកិច្ចក្រុងដូនកែវបានចុះដល់កន្លែងហេតុ វាស់វែងកសាងសំណុំរឿងតាមនីតិវិធី៕

​អត្ថបទ៖ វីរៈ