លោក ទៀ សុខា ឡើងជាមេទ័ពជើងទឹកបន្តពីឪពុក

ឧត្តមនាវីឯក ទៀ សុខា ត្រូវបានព្រះមហាក្សត្រចេញព្រះរាជក្រឹត្យតែងតាំងជាមេបញ្ជាការទ័ពជើងទឹកនៃកងយោធពលខេមរភូមិន្ទ បន្តពីឪពុកលោកនាយឧត្តមសេនីយ៍ ទៀ វិញ ដែលត្រូវតែងតាំងជារដ្ឋលេខាធិការក្រសួងការពារជាតិ។

ក្នុងព្រះរាជក្រឹត្យឡាយព្រះហស្ថលេខាថ្ងៃទី១៣ ខែកុម្ភៈ ឆ្នាំ២០២៥ សម្ដេចព្រះនរោត្តម សីហមុនី ត្រាស់បង្គាប់តែងតាំងតាមសេចក្ដីក្រាបបង្គំថ្វាយរបស់សម្ដេចធិបតី ហ៊ុន ម៉ាណែត និងបញ្ជាឱ្យអនុវត្តព្រះរាជក្រឹត្យនេះចាប់ពីថ្ងៃឡាយព្រះហស្ថលេខាតទៅ។

ការតែងតាំងលោក ទៀ សុខា នេះគឺបន្ទាប់ពីឪពុកលោកដែលជាអតីតមេបញ្ជាការទ័ពជើងទឹកលោក ទៀ វិញ ត្រូវបានព្រះមហាក្សត្រសម្រេចតែងតាំងជារដ្ឋលេខាធិការក្រសួងការពារជាតិកាលពីថ្ងៃទី៨ ខែកម្ភៈ។ មុនត្រូវបានតែងតាំងជាមេបញ្ជាការទ័ពជើងទឹក លោក ទៀ សុខា បានកាន់តួនាទីជាមេបញ្ជាការរង និងជាអគ្គលេខាធិការរងនៃគណៈកម្មការជាតិសន្ដិសុខលម្ហសមុទ្រ៕

អត្ថបទដោយ ហ៊ុន សិរីវឌ្ឍន៍