ថ្ងៃបុណ្យនៃក្តីស្រឡាញ់ម្សិលមិញ អ្នកមណ្ឌលគិរីមួយចំនួននាំគ្នាទៅបរិច្ចាគឈាម ដើម្បីបង្ហាញពីសេចក្តីស្រឡាញ់

ថ្ងៃបុណ្យនៃក្តីស្រឡាញ់នៅថ្ងៃទី១៤ ខែកុម្ភៈ ម្សិលមិញ យុវជនយុវនារីក្មេងចាស់ប្រុសស្រីមួយចំនួននៅក្នុងខេត្តមណ្ឌលគិរី បាននាំគ្នាទៅទិញផ្កា និងកាដូអនុស្សាវរីយ៍ផ្សេងៗជូនអ្នកមានគុណ ក៏ដូចជា ក្រុមគ្រួសារ មនុស្សជាទីស្រឡាញ់ ដើម្បីបង្ហាញក្ដីស្រឡាញ់និងការដឹងគុណរបស់ពួកគេរៀងៗខ្លួន។ ក៏ប៉ុន្តែ ក៏មានដែរប្រជាពលរដ្ឋមួយចំនួន រួមទាំងមន្រ្តីរាជការខ្លះផង បាននាំគ្នាសម្រុកទៅបរិច្ចាគឈាមនៅឯមន្ទីរពេទ្យបង្អែកខេត្ត ដើម្បីជួយសង្គ្រោះអ្នកជំងឺកំពុងសម្រាកនៅរង់ចាំឈាមសង្គ្រោះជីវិត។

ស្រ្តីជាអាជីវករមួយរូប មានទីលំនៅក្បែររង្វង់មូលគោព្រៃ ក្រុងសែនមនោរម្យ ខេត្តមណ្ឌលគិរី បានប្រាប់«កម្ពុជាថ្មី»ថា អតិថិជនបានមកនាំគ្នាមកទិញផ្កា និងកាដូអនុស្សាវរីយ៍ផ្សេងៗជូនក្រុមគ្រួសារ ក៏ដូចជា មនុស្សជាទីស្រឡាញ់យ៉ាងច្រើនហូរហែ។ ជាពិសេសភាគច្រើន គឺសិស្សានុសិស្សបានទិញផ្កា និងកាដូអនុស្សាវរីយ៍ផ្សេងៗជូនលោកគ្រូ អ្នកគ្រូរបស់ខ្លួន ជាការតបស្នងសងគុណផង។ គាត់បន្ថែមទៀតថា អតិថិជនមកទិញផ្កា និងងកាដូអនុស្សាវរីយ៍នៅក្នុងឆ្នាំនេះ បើធៀបនឹងឆ្នាំមុន ក៏មិនខុសគ្នាប៉ុន្មានដែរ គឺប្រហាក់ប្រហែលគ្នាប៉ុណ្ណោះ។

ជាមួយគ្នានេះ លោកវេជ្ជបណ្ឌិត ទុយ ស្រស់ ប្រធានមន្ទីរពេទ្យបង្អែក ខេត្តមណ្ឌលគិរី ក៏បានឱ្យដឹងផងដែរថា នៅថ្ងៃទី១៤កុម្ភៈ បុណ្យនៃក្ដីស្រឡាញ់ មានប្រជាពលរដ្ឋ ក៏ដូចជា មន្រ្តីរាជកាប្រុសស្រីចំនួន ៤៦នាក់បានមកបរិច្ចាគឈាមជូនមន្ទីរពេទ្យបង្អែក ដើម្បីសង្គ្រោះអ្នកជំងឺកំពុងសម្រាកព្យាបាល និងរង់ចាំឈាម ក៏ដូចជាអ្នកជំងឺដែលត្រូវការឈាមសង្រ្គោះបន្ទាន់ផងដែរ។ លោកវេជ្ជបណ្ឌិតរូបនេះ បានបញ្ជាក់ថា បុណ្យនៃក្ដីស្រឡាញ់ឆ្នាំនេះ មានប្រជាពលរដ្ឋ ក៏ដូចជា មន្ត្រីរាជការយ៉ាងច្រើនសន្ធឹកសន្ធាប់នាំគ្នាសម្រុកមកបរិច្ចាគឈាមស្ទើរតែបូមមិនទាន់នៅមន្ទីរពេទ្យបង្អែកខេត្តមណ្ឌលគិរី បើធៀបនឹងឆ្នាំមុន មិនសូវជាមានអ្នកមកបរិច្ចាគឈាមប៉ុន្មាននោះទេ។

លោកវេជ្ជបណ្ឌិត បានថ្លែងអំណរគុណទៅដល់ប្រជាពលរដ្ឋ ក៏ដូចជា មន្ត្រីរាជការគ្រប់រូបដែលបានយកថ្ងៃ១៤កុម្ភៈបុណ្យនៃក្ដីស្រឡាញ់នេះ​ ដើម្បីបរិច្ចាគឈាមជូនមន្ទីរពេទ្យបង្អែកខេត្តមណ្ឌលគិរី ដើម្បីសង្គ្រោះអ្នកជំងឺកំពុងតែសម្រាកនៅក្នុងមន្ទីរពេទ្យ ក៏ដូចជាអ្នកជំងឺផ្សេងៗ ដែលត្រូវការឈាមដើម្បីសង្គ្រោះបន្ទាន់៕

អត្ថបទ៖ រៀម សុខហេង