សិស្សានុសិស្ស៥០០នាក់នៅសាលាដាច់ស្រយាលក្នុងខេត្តមណ្ឌលគិរី ទទួលបានសម្ភារសិក្សាពីសមាគមកាយឫទ្ធិនារីកម្ពុជា

លោកស្រី ហ៊ី ផល្គុន ប្រធានក្រុមប្រឹក្សាសមាគមកាយឫទិ្ធនារីកម្ពុជា សាខាខេត្តមណ្ឌលគិរី បាននាំយកសម្ភារប្រើប្រាស់ និងសម្ភារៈសិក្សាទៅចែកជូនដល់លោកគ្រូ អ្នកគ្រូ សិស្សានុសិស្ស ប្រមាណជាង៥០០នាក់ នៅសាលាដាច់ស្រយាលពីតំបន់ ស្ថិតនៅភូមិពូកេះ ឃុំមេម៉ង់ ស្រុកកែវសីមា និងភូមិក្តោយ ឃុំរយ៉ ស្រុកកោះញែក ខេត្តមណ្ឌលគិរី កាលពីពេលថ្មីៗកន្លងទៅនេះ។

ការយកសម្ភារប្រើប្រាស់ និងសម្ភារៈសិក្សាទៅចែកជូននេះ គឺដោយការយកចិត្តទុកដាក់ពីលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការសមាគមកាយឫទ្ធិនារីកម្ពុជា ក្រោមកម្មវិធីយុទ្ធនាការ«ចាស់អ្នកថ្មីខ្ញុំ»។ លោកស្រី ហ៊ី ផល្គុន ប្រធានក្រុមប្រឹក្សាសមាគមកាយឫទិ្ធនារីកម្ពុជា សាខាខេត្តមណ្ឌលគិរី ក៏បានផ្តាំផ្ញើណែនាំដល់ប្រជាពលរដ្ឋ លោកគ្រូ អ្នកគ្រូនិងសិស្សានុសិស្សទាំងអស់ ត្រូវខិតខំសិក្សារៀនសូត្រ ត្រូវចូលរួមថែទាំសុខភាពឲ្យបានល្អ តាមរយៈការរស់នៅស្អាត ហូបស្អាត ផឹកស្អាត និងខិតខំចិញ្ចឹមសត្វ ដាំដុះដំណាំរួមផ្សំផ្សេងៗ ជាពិសេស ត្រូវចូលរួមអនុវត្តគោលនយោបាយភូមិឃុំមានសុវត្ថិភាពក្នុងដែនដីរបស់ខ្លួនឲ្យបានល្អប្រសើរផងដែរ៕

អត្ថបទ៖ រៀម សុខហេង