ខណ្ឌរដ្ឋបាលជលផល ខេត្តកំពង់ចាម បង្ក្រាបបទល្មើសនេសាទក្នុងស្រុកបាធាយបាន ១ករណី

នាថ្ងៃទី១៧ ខែកុម្ភៈ ឆ្នាំ២០២៥ មន្រ្តីខណ្ឌរដ្ឋបាលជលផលខេត្តកំពង់ចាម បានសហការជាមួយអធិការដ្ឋានជលផលមេគង្គ ចុះប្រត្តិបត្តការត្រួតពិនិត្យ និងបង្ក្រាបបទល្មើសនេសាទក្នុងភូមិសាស្ត្រស្រុកបាធាយ បានចំនួន ១ករណី។ នេះបើតាមមន្ទីរព័ត៌មាន ខេត្តកំពង់ចាម។

មន្រ្តីជលផល បានឱ្យដឹងថា ប្រតិបត្តិការខាងលើ ធ្វើឡើងនៅចំណុចតាមដងទន្លេសាប ភូមិអូរម៉ាល់ ឃុំបាធាយ ស្រុកបាធាយ និងបានរុះរើសម្រាស់ទំហំ ១៥ម៉ែត្រx១៥ម៉ែត្រ ចំនួន ១កន្លែង និងបានធ្វើកិច្ចសន្យាបញ្ឈប់ការធ្វើនេសាទដោយដាក់សម្រាស់តទៅទៀត។

មន្ត្រីដដែល បានបន្ថែមថា ចំពោះផ្នែកវារីវប្បកម្ម បានសម្របសម្រួលជាមួយក្រុមការងារអង្គការយូរីដូ (HURREDO) បានចុះតាមដានកសិករចិញ្ចឹមត្រីក្រោយពីបានចូលរួមវគ្គបណ្តុះបណ្តាលស្តីពីទីផ្សារ និងការអនុវត្តវារីវប្បកម្មល្អ នៅភូមិបាធាយ ឃុំបាធាយ ស្រុកបាធាយ និងភូមិព្រែកយួន ឃុំគៀនជ្រៃ ស្រុកកំពង់សៀមចំនួន ១០គ្រួសារ ផងដែរ៕