ច្រកចេញចូលតែមួយរដ្ឋបាលខេត្តតាកែវ រកចំណូលបានជាង១លានដុល្លារក្នុងឆ្នាំ២០២៤

រយៈពេលពេញ១ឆ្នាំ២០២៤ ការប្រមូលចំណូលរបស់អង្គភាពច្រកចេញចូលតែមួយរបស់រដ្ឋបាលខេត្តតាកែវ មានការកើនឡើងទាំងការផ្ដល់សេវា និងចំណូលគួរឲ្យកត់សម្គាល់ ខណៈដែលការប្រមូលចំណូលនាឆ្នាំ២០២៣កន្លងមកបានធ្លាក់ចុះប្រមាណ២០ភាគរយ។

លោក ឃុត ប៊ុនធឿន ប្រធានអង្គភាពច្រកចេញចូលតែមួយរបស់រដ្ឋបាលខេត្តតាកែវ បានថ្លែងប្រាប់ឲ្យដឹងថា ពេញមួយឆ្នាំ២០២៤នេះ អង្គភាពច្រកចេញចូលតែមួយរបស់រដ្ឋបាលខេត្តតាកែវ ដែលមានវិស័យចំនួន១៤ បានធ្វើការបម្រេីសេវាជូនប្រជាពលរដ្ឋបានចំនួនជាង២ម៉ឺន៨ពាន់សេវា និងទទួលបានចំណូលចំនួនជាង ៤៨ពាន់លានរៀល បើគិតជាប្រាក់ដុល្លារ គឺប្រមាណជាង ១លាន២សែនដុល្លារសហរដ្ឋអាមេរិក។ ចំនួនសេវាមានការកើនឡើជាង២ភាគរយ និងចំណូលមានការកើនឡើងចំនួន ១៦,៨៤ភាគរយ បើប្រៀបធៀបនឹងឆ្នាំ២០២៣កន្លងទៅ។ ក្នុងនោះដែរវិស័យដែលបានផ្ដល់សេវា និងចំណូល បានច្រើនជាងគេ គឺទទួលបានពីវិស័យសូរិយោដី វិស័យកសិកម្ម វិស័យព័ត៌មាន និងវិស័យសាធារណៈការ។

បើតាមប្រធានច្រកចេញចូលតែមួយរបស់រដ្ឋបាលខេត្តតាកែវ មូលហេតុដែលនាំឲ្យចំណូលច្រកមានការកើនឡើង ដោយសារការចុះបញ្ជីវិនិយោគរោងចក្រសហគ្រាសដែលមានមានលក្ខណៈសម្បត្តិគ្រប់គ្រាន់នៅក្នុងខេត្តតាកែវមានការកើនឡើងរួមទាំងវិស័យដីធ្លីក៏មានការកើនឡើងផងដែរ ជាពិសេសដោយសារមានការខិតខំប្រឹងប្រែងសម្របសម្រួលបន្ថែមទៀតពីមន្រ្តីច្រក និងថ្នាក់ដឹកនាំខេត្ត ព្រមទាំងពីមន្ទីរជំនាញស្ថាប័នដែលបានផ្ទេរសេវាមកកាន់អង្គភាពច្រកចេញចូលតែមួយ ដែលនាំឲ្យការបម្រេីសេវាបានរហ័ស និងបានផ្ដល់ជំនឿទុកចិត្តដល់ប្រជាពលរដ្ឋដែលមករកសេវាផងដែរ។

ស្របគ្នានេះផងដែរ​ លោក ឃុត ប៊ុនធឿន ប្រធានអង្គភាពច្រកចេញចូលតែមួយរបស់រដ្ឋបាលខេត្តតាកែវ បានអំពាវនាវដល់ប្រជាពលរដ្ឋដែលត្រូវការសេវាផ្សេងៗ សូមអញ្ជើញមកទទួលសេវានៅអង្គភាពច្រកចេញចូលតែមួយរបស់រដ្ឋបាលខេត្ត ឬនៅតាមអង្គភាពច្រកចេញចូលតែមួយ នៅតាមបណ្ដាលស្រុកមួយចំនួន ដើម្បីកាត់បន្ថយការចំណាយ របស់ប្រជាពលរដ្ឋការផ្ដល់សេវាមានភាពលឿនរហ័ស ចៀសវាងពឹងអ្នករត់ការជំនួសដែលនាំឲ្យមានការយកតម្លៃសេវាលើសពីតម្លៃរដ្ឋ ដែលបានកំណត់៕

​អត្ថបទ៖ វីរៈ