គុយបា នឹងគាំទ្របន្ថែមលើវិស័យអប់រំកាយ និងកីឡា ដើម្បីឱ្យកម្ពុជាមានសមត្ថភាពគ្រប់គ្រាន់ប្រកួតថ្នាក់ជាតិ និងអន្តរជាតិ

ប្រទេសគុយបា នឹងបន្តគាំទ្របន្ថែមទៀតចំពោះវិស័យអប់រំកាយ និងកីឡា មកកម្ពុជា តាមរយៈការបណ្តុះបណ្តាលកីឡាករកម្ពុជា ពីគ្រូបង្វឹកជំនាញរបស់ប្រទេសគុយបា ដើម្បីឱ្យកីឡាករកម្ពុជា មានសមត្ថភាពគ្រប់គ្រាន់ក្នុងការប្រកួតនៅថ្នាក់ជាតិ និងអន្តរជាតិ។ នេះបើតាមក្រសួងអប់រំ ដែលបានផ្សាយនៅព្រឹកថ្ងៃទី២០ ខែកុម្ភៈ ឆ្នាំ២០២៥។

នារសៀលថ្ងៃទី១៩ ខែកុម្ភៈ ឆ្នាំ២០២៥ បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានទទួលជួបសម្ដែងការគួរសម និងពិភាក្សាការងារជាមួយ លោកស្រី Milena Caridad Zaldivar Piedra ឯកអគ្គរដ្ឋទូតនៃសាធារណរដ្ឋគុយបា ប្រចាំកម្ពុជា នៅទីស្តីការក្រសួង។ ក្នុងជំនួបនេះ លោកស្រី ឯកអគ្គរដ្ឋទូត បានពិភាក្សាពីកិច្ចសហការរវាងកម្ពុជា និងគុយបា ជាពិសេស លើវិស័យអប់រំកាយ និងកីឡា ដែលប្រទេសទាំងពីរបានសហការគ្នាជាច្រើនឆ្នាំមកហើយ។

បើតាមក្រសួងអប់រំ លោកស្រី ឯកអគ្គរដ្ឋទូត បានលើកឡើងពី៖ “ការសហការនិងគាំទ្រពីនាយកប្រតិបត្តិនៃ វិទ្យាស្ថាន INDER លើការអប់រំកាយ និងបន្តកិច្ចសហប្រតិបត្តិការលើការផ្លាស់ប្តូរវប្បធម៌ និងចែករំលែកបទពិសោធនានាចំពោះវិស័យអប់រំកាយ និងកីឡា ដូចជាកីឡាបាល់ទះ កីឡាប្រដាល់ និងកីឡាផ្សេងទៀត ដែលមានគ្រូបង្វឹក និងអ្នកជំនាញពីប្រទេសគុយបាមកជួយគាំទ្រ និងជួយបង្វឹកបណ្តុះបណ្តាលកីឡាករកម្ពុជា ដើម្បីទទួលបានសមត្ថភាពគ្រប់គ្រាន់ក្នុងការប្រកួតប្រជែងកម្រិតជាតិ និងអន្តរជាតិ”។ បន្ថែមពីនេះ លោកស្រីក៏បានលើកឡើងពីការផ្តល់អាហារូបករណ៍ផ្នែកឱសថ សម្រាប់ឆ្នាំ២០២៥-២០២៦ មកកាន់កម្ពុជាផងដែរ។

ជាការឆ្លើយតប បណ្ឌិតសភាចារ្យ ហង់ជួន ណារ៉ុន បានលើកឡើងថា តាមរយៈការកាំទ្រពីប្រទេសគុយបាលើវិស័យអប់រំកាយ និងកីឡាកន្លងមក បានចូលរួមចំណែកយ៉ាងសំខាន់ក្នុងការអភិវឌ្ឍវិស័យកីឡានៅកម្ពុជា ជាពិសេសកីឡាបាល់ទះ។ លោកបណ្ឌិត បានថ្លែងអំណរគុណចំពោះអាហារូបករណ៍ និងកិច្ចសហប្រតិបត្តិការអប់រំកាយ និងកីឡាជាមួយវិទ្យាស្ថានផ្សេងៗ របស់ប្រទេសគុយបា ដែលទាំងអស់នេះមិនត្រឹមតែជួយអភិវឌ្ឍធនធានមនុស្សកម្ពុជាប៉ុណ្ណោះទេ ថែមទាំងបានពង្រឹងទំនាក់ទំនងរវាងប្រទេសទាំងពីរឱ្យកាន់តែស្និទ្ធស្នាលថែមមួយកម្រិតទៀត។

បណ្ឌិសភាចារ្យ ក៏បានគាំទ្រនូវគំនិតផ្តួចផ្តើមរបស់ប្រទេសគុយបា ក្នុងការសហការលើកីឡាបេស្បល និងកីឡាផ្សេងទៀត ដោយនឹងមានកិច្ចប្រជុំពិភាក្សា ដើម្បីវាយតម្លៃ និងសម្រេចលើចក្ខុវិស័យនេះផងដែរ។ តាមរយៈកិច្ចសហប្រតិបត្តការកន្លងមក ឧបនាយករដ្ឋមន្ត្រី រដ្ឋមន្ត្រីក្រសួងអប់រំសង្ឃឹមថា ប្រទេសទាំងពីរ នឹងបន្ត ពង្រឹង និងពង្រីកសហប្រតិបត្តិការបន្ថែមទៀត ព្រមតាំងស្វែងរកកិច្ចសហប្រតិបត្តិការថ្មីៗសម្រាប់ការរីកចម្រើន និងការចែករំលែកបទពិសោធរវាងប្រទេសទាំងពីរ៕