នាយករដ្ឋមន្រ្តី៖ ត្រូវធានាថា អ្នកទទួលបានបណ្ណសមធម៌ ជាពលរដ្ឋក្រីក្រពិតប្រាកដ

សម្តេចនាយករដ្ឋមន្រ្តី ហ៊ុន ម៉ាណែត ក្រើនរំឭកដល់ក្រសួងផែនការ និងក្រសួងមហាផ្ទៃ ត្រូវកំណត់អត្តសញ្ញាណពលរដ្ឋក្រីក្រ ប្រកបដោយតម្លាភាព​ និងគ្មានការរើសអើង ដើម្បីទទួលបានអត្ថប្រយោជន៍សង្គមតាមរយៈបណ្ណសមធម៌ និងបណ្ណងាយរងហានិភ័យ ដែលផ្តល់ដោយរដ្ឋ។

ថ្លែងក្នុងវេទិកា បើកសប្តាហ៍គាំពារសង្គមកម្ពុជា ឆ្នាំ២០២៥ និងប្រកាសដាក់ឱ្យអនុវត្តជាផ្លូវការ ក្របខណ្ឌគោល​នយោបាយជាតិ គាំពារសង្គម ឆ្នាំ២០២៤-២០៣៥”  នៅថ្ងៃទី ២០ ខែកុម្ភៈនេះ សម្តេចធិបតី ហ៊ុន ម៉ាណែត មានប្រសាសន៍ថា ប្រព័ន្ធគាំពារសង្គមមិនមែនសំដៅលើរដ្ឋចេញ១០០ភាគរយនោះទេ ប៉ុន្តែគឺជាការបង្កើននូវសំណាញ់សុវត្ថិភាពសង្គម គាំពារសង្គម និងផ្តល់ការថែទាំងសុខភាពប្រជាពលរដ្ឋប្រកបដោយចីរភាព។

ក្នុងន័យនេះ នាយករដ្ឋមន្រ្តី  ក្រើនរំ​ឭកដល់ក្រសួងផែនការ និងក្រសួងមហាផ្ទៃ តាមរយៈរាជធានីខេត្ត ក្រុង ស្រុក ខណ្ឌ និងឃុំ សង្កាត់​ ត្រូវធានាថាការកំណត់អត្តសញ្ញាណពលរដ្ឋក្រីក្រ ត្រូវបានធ្វើឡើងចំគោលដៅ និងប្រកបដោយប្រសិទ្ធភាព ព្រមទាំងពន្លឿន ធ្វើបច្ចុប្បន្នភាព និងការកំណត់អត្តសញ្ញាណ គោលដៅឱ្យបានជាប្រចាំ ដើម្បីចៀសវាងនូវការខ្វះខាត ក្នុងការទទួលបានអត្ថប្រយោជន៍​គាំពារសង្គម។

សម្តេចថ្លែងថា៖«ត្រង់ចំណុចនេះ ខ្ញុំសូមសង្កត់ធ្ងន់ថា ក្រុមការងារនីមួយៗ ដែលមានសមត្ថកិច្ចពាក់ព័ន្ធ ត្រូវធានាថា អ្នកដែលទទួលបានបណ្ណសមធម៌ និងបណ្ណងាយរងហានិភ័យ គឺជាពលរដ្ឋដែលជួបការលំបាកពិតប្រាកដ ចៀសវាងការរិះគន់ថា ការផ្តល់បណ្ណទាំងនេះមិនមានភាពយុត្តិធម៌»។

ការណែនាំនេះ ដោយសារមានការរិះគន់ថា កន្លងមកការផ្តល់បណ្ណសមធម៌ ឬបណ្ណងាយរងហានិភ័យ មិនបានធ្វើឡើងប្រកបដោយតម្លាភាព ពោលអ្នកក្រីក្រពិតប្រាកដមិនទទួលបានបណ្ណ ខណៈដែលមានជីវភាពសមរម្យ បែរជាទទួលបានបណ្ណគាំពារសង្គមទៅវិញ។

លើសពីនេះ សម្តេចធិបតី ក្រើនរំឭកដល់តួអង្គអ្នកផ្តល់សេវាសុខាភិបាលផ្នែករដ្ឋ និងឯកជន ត្រូវធានាថាការចាយវាយ និងតម្លៃសេវា មានតម្លាភាព ។ សម្តេចសង្កត់ធ្ងន់ថា៖« ព្រោះថវិកាជាតិសម្រាប់ជួយប្រជាពលរដ្ឋ អញ្ចឹងអនុវត្តដោយតម្លាភាព និងភាពត្រឹមត្រូវគឺចាំបាច់។ កុំឱ្យថាអត់ទៅព្យាបាលផងយកមកទូទាំងលុយដែរ ហើយអនុវត្តឱ្យតឹងរ៉ឹងសម្រាប់អ្នកដែលមិនអនុវត្តគោលការណ៍នេះ ឬមានការកេញបន្លំ»។ «ព្រោះនេះលុយសម្រាប់ត្រៀមជួយប្រជាពលរដ្ឋ លុយបម្រុងសម្រាប់ជួយពលរដ្ឋពេលការលំបាក ហើយបើសិនជាមូលដ្ឋានមួយណា ដៃគូណាមិនអនុវត្ត គឺធ្វើការព្រមាន ឬចាត់វិធានការតឹងរ៉ឹងតែម្តង»។

បច្ចុប្បន្ននេះ រាជរដ្ឋាភិបាលកម្ពុជា បានពង្រីកសេវាគាំពារសង្គមទៅកាន់ពន្ធនាគារ ពោលជួយដល់ស្រ្តី និងកុមារដែលកំពុងរស់នៅជាមួយម្តាយក្នុងពន្ធនាគារ។ សម្តេចបានពន្យល់ថា៖«ម្តាយធ្វើខុសគាត់ទទួលខុសត្រូវចំពោះមុខច្បាប់ តែកូនយើងត្រូវទទួល(ថែទាំ)។ ទោះបីជាម្តាយក៏ដោយ យើងត្រូវគិតគូរពីសុខភាពប្រជាពលរដ្ឋ ព្រោះសុទ្ធតែកូនចៅរបស់យើងដែលត្រូវយកចិត្តទុកដាក់ នេះជាអ្វីដែលការធ្វើជាក់ស្តែងរបស់យើង ក្នុងការជួយនូវសុខភាព​និងសុខុមាលភាពរបស់ប្រជាពលរដ្ឋដែលជាទ្រព្យសំខាន់របស់ជាតិយើង»។

ក្នុងនាមរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត បញ្ជាក់ជូនពលរដ្ឋទាំងអស់ដោយបានប្តេជ្ញាកំណត់យកការលើកស្ទួយ សុខុមាលភាព ជីវភាពរបស់ពលរដ្ឋ ការអភិវឌ្ឍមូលធនមនុស្ស និងការកាត់បន្ថយភាពក្រីក្រ ជាការងារអាទិភាពចំពោះមុខ ក្នុងស្មារតីមិនបោះបង់ពលរដ្ឋណាម្នាក់។សម្តេចថ្លែងថា៖« ដោយខ្ញុំនៅតែបន្តដឹកនាំប្តូរផ្តាច់នាវាគាំពារសង្គមកម្ពុជា ធ្វើដំណើរទៅមុខយ៉ាងស្វាហាប់ ប្រកបដោយនិរន្តរភាពដើម្បីសម្រេចបានចក្ខុវិស័យកម្ពុជា ឆ្នាំ ២០៥០»៕