ព័ត៌មានជាតិ

ក្លឹបហាត់ប្រាណ ១ កន្លែង ត្រូវនគរបាលសណ្ដាប់ធ្នាប់ចុះធ្វើកិច្ចសន្យា ក្រោយគ្មានចំណតត្រឹមត្រូវ ចតបំពានផ្លូវសាធារណៈ

បានផុស

១ ខែ មុន

នៅ

ថ្ងៃព្រហស្បតិ៍ ២០ កុម្ភៈ ២០២៥

ដោយ

កម្លាំងការិយាល័យសណ្ដាប់ធ្នាប់ នៃស្នងការដ្ឋាននគរបាលរាជធានីភ្នំពេញ សហការជាមួយកម្លាំងសណ្ដាប់ធ្នាប់ នៃអធិការដ្ឋាននគរបាលខណ្ឌចំការមន បានចុះរៀបចំសណ្ដាប់ធ្នាប់ចំណុចទីតាំងក្លឹបហាត់ប្រាណ ELITE ស្ថិតក្នុងភូមិសាស្ត្រខណ្ឌចំការមន ដែលគ្មានចំណតត្រឹមត្រូវ ចតបំពានផ្លូវសាធារណៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យុទ្ធនាការនេះបានធ្វើឡើងកាលពីវេលាម៉ោង ០៥ ល្ងាច ថ្ងៃទី ១៩ ខែកុម្ភៈ ឆ្នាំ ២០២៥ កម្លាំងការិយាល័យសណ្ដាប់ធ្នាប់ ដឹកនាំដោយ លោកវរសេនីយ៍ឯក លី លាងឆេង ប្រធានការិយាល័យសណ្ដាប់ធ្នាប់ នៃស្នងការដ្ឋាននគរបាលរាជធានីភ្នំពេញ សហការជាមួយកម្លាំងសណ្ដាប់ធ្នាប់ នៃអធិការដ្ឋាននគរបាលខណ្ឌចំការមន បានចុះរៀបចំសណ្ដាប់ធ្នាប់ អប់រំ និងធ្វើកិច្ចសន្យា ចំពោះការឈប់ចតនៅលើផ្លូវលេខ ៤៧៤ និងផ្លូវលេខ ១០១ ជាពិសេសចំពោះក្លឹបហាត់ប្រាណ ELITE ដែលស្ថិតក្នុងភូមិសាស្ត្រខណ្ឌចំការមន។

មន្ត្រីអាជ្ញាធរបានបញ្ជាក់ថា កម្លាំងសណ្ដាប់ធ្នាប់បានចុះរៀបចំជាប្រចាំតាមគោលដៅផ្សេងៗ ដែលបង្កការកកស្ទះ និងធ្វើឲ្យបាត់បង់សណ្ដាប់ធ្នាប់ ជាពិសេសរំលោភលើផ្លូវសាធារណៈ សម្រាប់អ្នកថ្មើរជើង។ ជាក់ស្ដែងនៅទីតាំងខាងលើនេះ អាជ្ញាធរចុះធ្វើកិច្ចសន្យាហើយ ក្នុងករណីនៅតែបំពាន នោះ អាជ្ញាធរនឹងចាត់វិធានការរដ្ឋបាល ដោយស្ទូចយកមធ្យោបាយយានជំនិះទាំងនោះទៅរក្សាទុក។

លោក ជា សេង ជាប្រជាពលរដ្ឋដែលតែងតែធ្វើដំណើរឆ្លងកាត់តំបន់នោះបានលើកឡើងថា ជាពិសេសទីតាំងក្លឹបហាត់ប្រាណនោះពុំមានចំណតត្រឹមត្រូវ ភ្ញៀវជាអ្នកចូលមកហាត់ប្រាណបានចតទាំងម៉ូតូទាំងរថយន្តបំពានផ្លូវសម្រាប់អ្នកថ្មើរជើង បណ្ដាលឲ្យបាត់សណ្ដាប់ធ្នាប់ និងកកស្ទះចរាចរណ៍ជារៀងរាល់ថ្ងៃ។ ដូច្នេះក្រោយអាជ្ញាធរចុះធ្វើកិច្ចសន្យា និងអប់រំ បែបនេះរួច សង្ឃឹមថា សណ្ដាប់ធ្នាប់នៅតំបន់នោះនឹងល្អប្រសើរ៕

អត្ថបទ ៖ សុភា