តំណាងក្រុមហ៊ុនរបស់សេដ្ឋី Elon Musk ថាកម្ពុជាគឺជាគោលដៅវិនិយោគក្នុងឆ្នាំ២០២៥

ក្រុមហ៊ុន SpaceX – Starlink របស់សេដ្ឋីពិភពលោក Elon Musk ថា «កម្ពុជាគឺជាគោលដៅអទិភាពខ្ពស់សម្រាប់ការវិនិយោគរបស់ក្រុមហ៊ុន» ក្នុងឆ្នាំ២០២៥។ ដំណឹងនេះត្រូវបានបញ្ជាក់ពីនាយិកាទីផ្សារនៃក្រុមហ៊ុន SpaceX – Starlink លោកស្រី Rebecca Hunter ក្នុងជំនួបជាមួយនាយករដ្ឋមន្ត្រីកម្ពុជាព្រឹកថ្ងៃទី២០ ខែកុម្ភៈនេះ។

ក្នុងឱកាសនៃជំនួបនោះលោកស្រីនាយិកាទីផ្សារបាន​គោរពជម្រាបជូនសម្តេចបវរធិបតី ហ៊ុន ម៉ាណែត ថាគណៈប្រតិភូរបស់លោកស្រីក៏នឹងមានជំនួបពិភាក្សាការងារជាមួយក្រសួង-ស្ថាប័នពាក់ព័ន្ធរបស់កម្ពុជា​ នៅក្នុងឱកាសនៃដំណើរទស្សនកិច្ចនេះផងដែរ។

សម្ដេចបវរធិបតី ហ៊ុន ម៉ាណែត បានស្វាគមន៍ចំពោះក្រុមហ៊ុនដែលបង្ហាញអំពីចំណាប់អារម្មណ៍ក្នុងការស្វែងរកឱកាសវិនិយោគ​ ក៏ដូចជាការផ្សារភ្ជាប់ទំនាក់ទំនងជាមួយនឹងរាជរដ្ឋាភិបាលកម្ពុជា។ សម្ដេចបវរធិបតីក៏បានគូសបញ្ជាក់អំពីការដាក់ចេញនូវគោលនយោបាយរបស់រាជរដ្ឋាភិបាលក្នុងការអភិវឌ្ឍវិស័យបច្ចេកវិទ្យា ដើម្បីឆ្លើយតបទៅនឹងការវិវឌ្ឍដ៏ឆាប់រហ័សនៃបច្ចេកវិទ្យា នាពេលបច្ចុប្បន្ន។ ឆ្លៀតក្នុងឱកាសនោះ, សម្ដេចបវរធិបតីក៏បានលើកទឹកចិត្តឱ្យលោកស្រី ដែលជាតំណាងក្រុមហ៊ុន បន្តផ្សារភ្ជាប់ទំនាក់ទំនង និងពិភាក្សាជាមួយក្រសួង-ស្ថាប័នពាក់ព័ន្ធរបស់កម្ពុជា ដើម្បីជំរុញការស្វែងរកឱកាសវិនិយោគ​នៅកម្ពុជា។

Starlink គឺជាឈ្មោះរបស់បណ្ដាញផ្កាយរណបដែលអភិវឌ្ឍន៍ដោយក្រុមហ៊ុន SpaceX ដើម្បីផ្ដល់សេវាអ៊ិនធើណិតតម្លៃថោកដល់អ្នកប្រើប្រាស់នៅតំបន់ដាច់ស្រយាល។ ក្រុមហ៊ុននេះសង្ឃឹមថាផលិតបាញ់បង្ហោះរហូតដល់ ៤ម៉ឺន២ពាន់ផ្កាយរណបក្នុងអ្វីដែលគេហៅថាតារានិករធំមហិមា៕

អត្ថបទដោយ ហ៊ុន សិរីវឌ្ឍន៍