មុនរដូវវស្សាមកដល់ អភិបាលខេត្តកណ្ដាលឱ្យក្រុមហ៊ុនពន្លឿនការសាងសង់ស្ពានកោះចំរើនឱ្យរួចរាល់

អភិបាលខេត្តកណ្ដាល លោក គួច ចំរើន បានជំរុញឱ្យក្រុមហ៊ុនសាងសង់ស្ពានកោះចំរើន ក្នុងស្រុកលើកដែក ពន្លឿនការសាងសង់ឱ្យរួចរាល់មុនរដូវវស្សាឈានចូលមកដល់ខាងមុខនេះ។

លោក គួច ចំរើន បញ្ជាក់ថា នៅពេលសាងសង់រួចរាល់ ស្ពានកោះចំរើន នឹងទៅជួយសម្រួលដល់ការដល់ការធ្វើដំណើរទៅវិញទៅមករបស់ប្រជាពលរដ្ឋ សិស្សានុសិស្ស ជាពិសេសការដឹកកសិផលរបស់ប្រជាកសិករមានភាពងាយស្រួលនៅក្នុងរដូវវស្សាខាងមុខនេះ ហើយម្យ៉ាងស្ពាននេះ ក៏បានកាត់បន្ថយហានិភ័យក្នុងការធ្វើដំណើរទៅវិញទៅមកដោយទូកនារដូវវស្សា ដែលអាចបង្កហានិភ័យដល់ប្រជាពលរដ្ឋពិសេសសិស្សសាលាតូចៗ។

ជាមួយការពន្លឿនការសាងសង់ អភិបាលខេត្ត បានប្រាប់ទៅកាន់ក្រុមហ៊ុនត្រូវធានាឱ្យបាបផងដែរ ថា ការសាងសង់ស្របតាមបទដ្ឋានបច្ចេកទេស គុណភាព សុវត្ថិភាព ដើម្បីជាគុណប្រយោជន៍សម្រាប់ប្រជាពលរដ្ឋ នៅក្នុងមូលដ្ឋាននេះប្រើប្រាស់បានយូរអង្វែង។  

ការជំរុញដូច្នេះរបស់លោក គួច ចំរើន ក្នុងឱកាសលោកអញ្ជើញដឹកនាំមន្ត្រីជំនាញ និងអាជ្ញាធរស្រុកលើកដែក អញ្ជើញចុះពិនិត្យការដ្ឋានសាងសង់ស្ពានកោះចំរើន ស្ថិតនៅភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្ដាល។ ស្ពានកោះចំរើន ជាស្ពានប្រភេទបេតុង មានបណ្ដោយប្រវែង៥៤ម៉ែត្រ ទទឹង៨ម៉ែត្រ មានលូជ្រុងប្រវែង ១២ម៉ែត្រx២ម៉ែត្រ ១កន្លែង ដែលគិតដល់ពេលនេះ សាងសង់បានប្រមាណ៥៨%ហើយ៕