ព័ត៌មានជាតិ

គណៈកម្មការទី ៨ នៃរដ្ឋសភា ចុះឈ្វេងយល់វឌ្ឍនភាពបញ្ហាប្រឈម និងសំណូមពរ នៃការផ្តល់សេវា ប.ស.ស

បានផុស

១ សប្តាហ៍ មុន

នៅ

ថ្ងៃសុក្រ ២១ កុម្ភៈ ២០២៥

ដោយ

លោកស្រី ឡោក ខេង ប្រធានគណៈកម្មការទី ៨ ទទួលបន្ទុកសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្ដុះបណ្ដាលវិជ្ជាជីវៈ និងកិច្ចការនារី នៃរដ្ឋសភា កាលពីថ្ងៃទី ២០ ខែកុម្ភៈ ឆ្នាំ ២០២៥ បានដឹកនាំគណៈប្រតិភូចុះឈ្វេងយល់អំពីវឌ្ឍនភាព បញ្ហាប្រឈម សំណូមពរ និងចក្ខុវិស័យរបស់បេឡាជាតិសន្តិសុខសង្គម នៃក្រសួងការងារ និងបណ្ដុះបណ្ដាលវិជ្ជាជីវៈ ជាពិសេស ដើម្បីឈ្វេងយល់អំពីការធ្វើប្រតិបត្តិការក្នុងការផ្តល់សេវាជូនសមាជិក ប.ស.ស. ប្រកបដោយប្រសិទ្ធភាព ស័ក្តិសិទ្ធភាព តម្លាភាព គណនេយ្យភាព និងសុក្រឹតភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងឱកាសនោះ ជំនួបពិភាក្សាការងារជាមួយ លោក ម៉េង ហុង ប្រតិភូរាជរដ្ឋាភិបាលទទួលបន្ទុក ជាអគ្គនាយក ប.ស.ស. និងថ្នាក់ដឹកនាំ ប.ស.ស. លោកស្រី ឡោក ខេង បានធ្វើការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ ដោយបានវិវត្តខ្លួនយ៉ាងឆាប់រហ័សក្លាយជាស្ថាប័នដែលមានការសាទរ មានការទទួលស្គាល់ និងទទួលបាននូវទំនុកចិត្តយ៉ាងខ្លាំងពីសំណាក់ប្រជាពលរដ្ឋគ្រប់ស្រទាប់វណ្ណៈ ជាពិសេស សមាជិក ប.ស.ស. លើការទទួលបានរបបសន្តិសុខសង្គមពេញលេញ។

លោកស្រីប្រធានគណៈកម្មការទី ៨ បានបន្ថែមទៀតថា សម្រាប់នីតិកាលទី ៧ នេះ រាជរដ្ឋាភិបាល បានយកចិត្តទុកដាក់ខ្ពស់ចំពោះការពង្រឹងវិស័យសុខាភិបាល និងគោលនយោបាយអាទិភាពសំដៅឈានដល់ការគ្របដណ្ដប់សុខភាពជាសកល ក្នុងន័យនេះ ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ ដើរតួយ៉ាងសំខាន់ក្នុងការជំរុញគោលនយោបាយមួយនេះផងដែរ។

ក្នុងឱកាសនោះដែរ លោកប្រតិភូរាជរដ្ឋាភិបាល បានទទួលស្វាគមន៍យ៉ាងកក់ក្ដៅចំពោះគណៈប្រតិភូ នៃគណៈកម្មការទី ៨ នៃរដ្ឋសភា និងបានធ្វើបទបង្ហាញស្ដីពីវឌ្ឍនភាព នៃការអនុវត្តរបបសន្តិសុខសង្គម ដោយក្នុងនោះរួមមាន ៖ (១).វឌ្ឍនភាព និងការអនុវត្តរបបសន្តិសុខសង្គម (២).ប្រតិបត្តិការ និងរចនាសម្ព័ន្ធ ប.ស.ស. (៣). ការធ្វើបរិវត្តកម្មបច្ចេកវិទ្យារបស់ ប.ស.ស. (៤).បញ្ហាប្រឈម ដំណោះស្រាយនានា និងទិសដៅអនុវត្តបន្ត ព្រមទាំងចក្ខុវិស័យដែលត្រូវបន្ដការងារអនុវត្តស្របតាមគោលនយោបាយរបស់រាជរដ្ឋាភិបាលក្នុងអាណត្តិទី ៧ នេះ ផងដែរ៕

អត្ថបទ ៖ សំអឿន