ព័ត៌មានជាតិ

ពលរដ្ឋ និងកម្មករមកពីខេត្តកំពង់ស្ពឺ កំពង់ចាម កំពត និងខេត្តស្វាយរៀង មិនចង់ឃើញបាតុកម្មនៅកូរ៉េក្រោមរូបភាពចាញ់កលល្បិចទណ្ឌិត សម រង្ស៊ី

បានផុស

១ ខែ មុន

នៅ

ថ្ងៃសុក្រ ២១ កុម្ភៈ ២០២៥

ដោយ

ភ្នំពេញ ៖ ប្រជាពលរដ្ឋ និងកម្មករនៅខេត្តកំពង់ស្ពឺ កំពង់ចាម កំពត និងខេត្តស្វាយរៀង បានប្រកាសពហិការប្រឆាំងនឹងផែនការធ្វើបាតុកម្មនៅសាធារណរដ្ឋកូរ៉េ ដែលរៀបចំដោយក្រុមជ្រុលនិយមក្រៅច្បាប់ ខណៈពួកគេមិនចង់ឃើញចលនាបំផុសបំផុលប្រឆាំងខ្មែរ និងខ្មែរ ក្រោមរូបភាពចាញ់កលល្បិច ទណ្ឌិត សម រង្ស៊ីនោះទេ។

អ្នកស្រី សំ គឹមហ៊ង ប្រជាពលរដ្ឋដែលបម្រើការងារជាសហជីពនៅក្រុមហ៊ុន ប៉ាស៊ីហ្វិក អឹមភើរឹល ខេត្តកំពង់ស្ពឺបាននិយាយថា “ទណ្ឌិត សម រង្ស៊ី តែងតែរៀបចំកលល្បិចគ្រប់រូបភាព ដើម្បីកៀរគរមនុស្សទៅចូលរួមបាតុកម្ម ហើយបាតុកម្មនោះ ក៏បង្កបញ្ហាប្រឈមជាច្រើនដល់ពលរដ្ឋ កម្មករទាំងនៅក្នុងស្រុក និងនៅបរទេស”។

អ្នកស្រីបន្តថា “យើងទទួលបានមេរៀនជាច្រើនមកហើយតាមរយៈផែនការបាតុកម្មនៅកម្ពុជា គឺគ្មាននាំឱ្យមានផលចំណេញអ្វីទេ យើងជាប្រជាពលរដ្ឋជាអ្នកខាតបង់គ្រប់ទម្រង់ទាំងអស់។

ដូច្នេះខ្ញុំមិនចង់ឃើញពលរដ្ឋយើងចាញ់បោកបុគ្គល សម រង្ស៊ី បន្តទៀតនោះទេ យើងគ្រប់គ្នាបន្តការងាររបស់យើងជាធម្មតា ហើយកុំទៅចូលរួមបាតុកម្មជាមួយក្រុមជ្រុលនិយមទាំងអស់នោះ”។

អ្នកស្រី គឹមហ៊ង បន្ថែមថា ការធ្វើបាតុកម្មលើទឹកដីបរទេសទៀតសោធ គឺនឹងធ្វើឱ្យកេរ្ដិ៍ឈ្មោះ និងកិត្តិយសជាតិអាប់ឱននៅលើឆាកអន្តរជាតិដោយសារសកម្មភាពក្រុមជ្រុលនិយមទាំងនោះ។ ក្នុងនាមជាប្រជាពលរដ្ឋខ្មែរម្នាក់ គួរតែតាំងខ្លួនជាទូតសុច្ចន្ទៈរបស់ជាតិកម្ពុជានៅឯបរទេស ខិតខំប្រឹងប្រែងផ្សព្វផ្សាយនូវអ្វីដែលជាសត្ដានុពលរបស់កម្ពុជា។

លោក អឹម ប្រាក់ ពលរដ្ឋបម្រើការងារជាសហជីពអភិវឌ្ឍន៍កម្មករនៅក្រុមហ៊ុន ឡឺក្រោនស៊ូ ស្ថិតនៅស្រុកជើងព្រៃ ខេត្តកំពង់ចាមបានថ្លែងថា «ខ្ញុំនៅតែឆ្ងល់ថា ពលរដ្ឋយើងនៅក្រៅប្រទេសមួយចំនួន តែបន្តចាញ់ល្បិចកលរបស់ទណ្ឌិត សម រង្ស៊ី គឺគាត់រត់ចោលយើង ហើយអង្គុយចាំតែញុះញង់ឱ្យបាតុកម្មនៅក្រៅប្រទេស ដើម្បីបម្រើមហិជ្ជាតានយោបាយរបស់ខ្លួនប៉ុណ្ណោះ”។

លោកបានអំពាវនាវឱ្យប្រជាពលរដ្ឋទាំងក្នុងស្រុក និងក្រៅប្រទេស គួរតែឈប់ចាញ់បោកទណ្ឌិត សម រង្ស៊ី ព្រោះអាចប៉ះពាល់ដល់ការងាររបស់បងប្អូនពលករ និងបង្ហាញរូបភាពមិនល្អទាល់តែសោះលើទឹកដីបរទេសដែលជាទីតាំងបម្រើការងាររបស់បងប្អូន។

ចំណែកលោក ម៉ៅ រុំ ប្រជាពលរដ្ឋបម្រើការងារជាសហជីពកម្មករប្រជាធិបតេយ្យនៅក្រុមហ៊ុន ជាដេយី សេហ្វធី នៅខេត្តកំពតបាននិយាយថា “ប្រសិនបើធ្វើបាតុកម្មបែបនេះ គឺនឹងប៉ះពាល់ពលករដែលកំពុងធ្វើការនៅប្រទេសកូរ៉េ ហើយប៉ះពាល់ដល់បងប្អូនពលរដ្ឋខ្មែរជំនាន់ក្រោយដែលចង់ទៅធ្វើការនៅទីនោះដែរ។ អ៊ីចឹង អាចត្រូវបានរដ្ឋាភិបាលបរទេសកាត់ផ្តាច់ការទទួលពលករខ្មែរយើងជាដើម”។

លោកបានអំពាវនាវឱ្យពលរដ្ឋនៅសាធារណរដ្ឋកូរ៉េកុំទៅចូលរួមបាតុកម្ម ដើម្បីរក្សាសេចក្ដីថ្លៃថ្នូររបស់ជាតិ ហើយជឿទុកចិត្តមកលើរាជរដ្ឋាភិបាលកម្ពុជា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា ក្នុងការដោះស្រាយដោយសន្តិវិធីជាមួយភាគីថៃ។

អ្នកស្រី អ៊ួង សុភាព ពលរដ្ឋបម្រើការងារជាសហជីពរក្សាសិទ្ធិកម្មករប្រចាំរោងចក្រ អ៊ីលីត (ខេមបូឌា) នៅក្រុងបាវិត ខេត្តស្វាយរៀងបាននិយាយថា “យើងទុកលទ្ធភាពនេះឱ្យរាជរដ្ឋាភិបាលកម្ពុជាក្នុងការដោះស្រាយបញ្ហាព្រំដែនប្រកបដោយសន្តិវិធី។ បងប្អូនពលករខ្មែរ ត្រូវជឿជាក់លើមេដឹកនាំខ្មែរខ្លួនឯង ដើម្បីដោះស្រាយបញ្ហាជាតិ ជៀសវាងមានជម្លោះការទូត”។

អ្នកស្រីបានអំពាវនាវឱ្យពលរដ្ឋខ្មែរនៅបរទេសទាំងអស់ជឿជាក់លើរាជរដ្ឋាភិបាលកម្ពុជាក្នុងការដោះស្រាយបញ្ហាព្រំដែនជាមួយប្រទេសជិតខាងតាមរយៈការចរចារដោយសន្តិវិធីជាជាងនាំគ្នាធ្វើបាតុកម្មពោរពេញដោយកំហឹង។

លោក ចាន់ លឿង ពលរដ្ឋបម្រើការងារជាសហជីពសុវត្ថិភាពកម្មករ ក្រុមហ៊ុន ថប ស្ព័ត នៅតំបន់សេដ្ឋកិច្ចពិសេស មេតហាធេន ក្រុងបាវិត ខេត្តស្វាយរៀងបាននិយាយថា “ខ្ញុំសូមប្រឆាំងការធ្វើបាតុកម្មដែលជាការបំផុសបំផុលពីសំណាក់ក្រុមជ្រុលនិយមម្តងហើយម្តងទៀត ហើយនឹងមិនត្រឹមតែមិនអាចដោះស្រាយបញ្ហាបាននោះទេ”។

លោកបានអំពាវនាវដល់ប្រជាពលរដ្ឋកុំជឿតាមការទាញភ្ជាប់បញ្ហាកោះគុតដែលស្ថិតក្នុងតំបន់ត្រួតស៊ីគ្នានៃព្រំដែនសមុទ្ររវាងកម្ពុជា និងថៃមកបញ្ឆេះកំហឹងពលរដ្ឋក្នុងចេតនាទុច្ចរិតបង្កឱ្យមានជម្លោះរវាងប្រទេសជិតខាង និងនាំឱ្យខ្មែរបែកបាក់ជាតិជាខ្លាំង៕