នាយករដ្ឋមន្ត្រីថាស្ថេរភាពនៅកម្ពុជាបង្កើតជំនឿចិត្តដល់ BVLGARI

នាយករដ្ឋមន្ត្រី សម្ដេចធិបតី ហ៊ុន ម៉ាណែត បានលើកឡើងថាស្ថេរភាព និងសណ្ដាប់ធ្នាប់ល្អរបស់កម្ពុជា បានបង្កើតនូវភាពជឿជាក់ពីក្រុមហ៊ុនអលង្ការពិភពលោក BVLGARI ដើម្បីរៀបចំកម្មវិធីរបស់ខ្លួននៅប្រាសាទបាយ័ន ខេត្តសៀមរាបកម្ពុជា។

សម្ដេចធិបតីបានសរសេរនៅលើហ្វេសបុកផេករបស់សម្ដេចនៅព្រឹកថ្ងៃទី២២ ខែកុម្ភៈ ឆ្នាំ២០២៥នេះថា៖ «ការដែលក្រុមហ៊ុនគ្រឿងអលង្ការប្រណិតលំដាប់ពិភពលោក បានមករៀបចំតាំងពិព័រណ៍នូវគ្រឿងអលង្ការប្រណិតៗ នៅកម្ពុជា រួមទាំងនាំមកនូវតារាល្បីៗនៅលើពិភពលោក ដោយសារក្រុមហ៊ុនមានភាពជឿជាក់មកសមត្ថភាព ស្ថិរភាព និងសន្តិសុខសណ្ដាប់ធ្នាប់ល្អរបស់កម្ពុជា ព្រមទាំងកិត្តិសព្ទដ៏ល្បីល្បាញរបស់តំបន់រមណីយដ្ឋានអង្គរ ដែលជាតំបន់ទេសចរណ៍ដែលមានភាពទាក់ទាញបំផុតមួយនៅក្នុងចំណោមរមណីយដ្ឋានល្បីៗនៅលើពិភពលោក»។

BVLGARI ដែលជាម៉ាកយីហោគ្រឿងអលង្ការយ៉ាងល្អប្រណិត និងល្អឯក ដ៏ល្បីលំដាប់ពិភពលោក បានរៀបចំកម្មវិធីរាត្រីសមោសរ (Gala Dinner) ឈ្មោះថា BVLGARI AETERNA ដើម្បីបង្ហាញម៉ូតផលិតផលរបស់ខ្លួន នៅប្រាសាទបាយ័ន ក្នុងខេត្តសៀមរាប កាលពីយប់ថ្ងៃទី២១​ ខែកុម្ភៈ ឆ្នាំ២០២៥។

ជំទាវទីមួយកម្ពុជាលោកស្រី ពេជ ចន្ទមុន្នី ហ៊ុនម៉ាណែត បានអញ្ញើញធ្វើជាកិត្តិយសក្នុងកម្មវិធីនេះផងដែរក្នុងសំលៀកបំពាក់ប្រពៃណីជាតិយ៉ាងស្រស់ស្អាត៕

អត្ថបទដោយ ហ៊ុន សិរីវឌ្ឍន៍