វិទ្យាស្ថានវិទ្យាសាស្ត្រសុខាភិបាល ខ.ភ.ម បានរួមចំណែកព្យាបាលជាង៣ពាន់នាក់ ក្នុងឆ្នាំ២០២៤

នៅក្នុងឆ្នាំ២០២៤កន្លងទៅ វិទ្យាស្ថានវិទ្យាសាស្ត្រសុខាភិបាល កងយោធពលខេមរភូមិន្ទ បានចូលរួមចំណែកក្នុងការព្យាបាលជំងឺជូនដល់បុគ្គលិក និស្សិតក្នុងអង្គភាព និងប្រជាជនប្រមាណជាង ៣ពាន់នាក់។

បើតាមរបាយការណ៍របស់ឧត្តមសេនីយ៍ឯក សាស្ត្រាចារ្យ នឹម មាលា នាយកវិទ្យាស្ថានវិទ្យាសាស្ត្រសុខាភិបាល កងយោធពលខេមរភូមិន្ទ គឺនៅវិទ្យាស្ថាននេះ ក៏មានមន្ទីរពេទ្យមួយ ដែលបានចូលរួមយ៉ាងសកម្មក្នុងការព្យាបាលជំងឺជូនដល់បុគ្គលិក និស្សិតក្នុងអង្គភាព និងប្រជាជន ដែលរស់នៅជុំវិញវិទ្យាស្ថាន ជាសមាជិករបស់ ប.ស.ស នឹងចូលរួមសកម្មភាពផ្សេងៗរបស់ក្រសួងការពារជាតិ និងរាជរដ្ឋាភិបាល។ ក្នុងនោះ នៅឆ្នាំ២០២៤កន្លងមក បានពិនិត្យ និងព្យាបាលជារួមបានចំនួន ៣ ៣៦៤នាក់។

សម្រាប់ការងារស្នូល លើការបណ្ដុះបណ្ដាល ឧត្តមសេនីយ៍ឯកនាយកវិទ្យាស្ថាន បានឱ្យដឹងថា និស្សិតដែលបានសិក្សានៅវិទ្យាស្ថាន តម្រូវឱ្យមានការប្រឡងជាប់ថ្នាក់ជាតិ និងប្រឡងចេញថ្នាក់ជាតិក្រោយបញ្ចប់ការសិក្សា ខណៈសព្វថ្ងៃវិទ្យាស្ថានមាន ៤មហាវិទ្យាល័យ ដែលកំពុងតែបណ្ដុះបណ្ដាលនិស្សិត បច្ចុប្បន្នមានចំនួន៨វគ្គ ដែលមាននិស្សិតសរុប​ ៧៨១នាក់ ស្រី២៨៥នាក់។  

របាយការណ៍របស់លោកឧត្តមសេនីយ៍ឯក ធ្វើឡើងក្នុងពិធីជួបសំណេះសំណាលសាកសួរសុខទុក្ខ និងត្រួតពិនិត្យវឌ្ឍនភាពការងារ និងស្ដាប់របាយការណ៍អំពីសកម្មភាពការងារ នៅវិទ្យាស្ថានវិទ្យាសាស្ត្រសុខាភិបាល ខ.ភ.ម ដែលសម្រេចបាននារយៈពេលកន្លងមកនេះ ដែលស្ថិតក្នុងភូមិសាស្ត្រ ខណ្ឌពោធិ៍សែនជ័យ រាជធានីភ្នំពេញ ក្រោមអធិបតីលោកស្រី នាយឧត្ដមសេនីយ៍ ដាំ ដារីនី រដ្ឋលេខាធិការក្រសួងការពារជាតិ កាលពីថ្ងៃទី២១ ខែកុម្ភៈ ឆ្នាំ២០២៥។

នាយឧត្ដមសេនីយ៍ ដាំ ដារីនី បានសរសើរ និងវាយតម្លៃខ្ពស់ចំពោះវឌ្ឍនភាពដែលវិទ្យាស្ថានសម្រេចបានក្នុងរយៈពេលមួយឆ្នាំកន្លងមក និងទិសដៅដែលត្រូវអនុវត្តបន្ត ជាពិសេសតែងមានសកម្មភាពជាប្រចាំ ពីការអភិវឌ្ឍប្រព័ន្ធហេដ្ឋារចនាសម្ព័ន្ធ និងជួសជុលកែលម្អក្នុងវិទ្យាស្ថាន។

លោកស្រី នាយឧត្ដមសេនីយ៍ បានជំរុញឱ្យថ្នាក់ដឹកនាំវិទ្យាស្ថាន បន្តពិនិត្យរៀបចំកម្មវិធីសិក្សាឱ្យស្របទៅតាមស្តង់ដារថ្នាក់ជាតិ លើកកម្ពស់កិច្ចសហការរវាងក្រសួងស្ថាប័នពាក់ព័ន្ធ ដើម្បីប្រយោជន៍ដល់ការបណ្ដុះបណ្ដាលលើកកម្ពស់ការគោរពវិន័យ សីលធម៌ គុណធម៌ និងវិជ្ជាជីវៈ លើកកម្ពស់សាមគ្គីឯកភាពផ្ទៃក្នុង ការប្រាស្រ័យទាក់ទងរវាងថ្នាក់ដឹកនាំ គណៈគ្រប់គ្រងវិទ្យាស្ថាន និងនិស្សិត ទាំងស៊ីវិល និងយោធាឱ្យបានល្អប្រសើរ។

ឆ្លៀតឱកាសនោះ លោកស្រី នាយឧត្ដមសេនីយ៍ ក៏បានគូសរំលេចពីការដឹងគុណតម្លៃសុខសន្តិភាព អរគុណនយោបាយឈ្នះឈ្នះ ដឹងគុណស្ថាបនិកមគ្គុទេសក៍ឯក ដែលនាំមកនូវសន្តិភាព និងការឯកភាពជាតិពេញលេញរបស់សម្ដេចតេជោ ហ៊ុន សែន ដែលសម្ដេចបានយកជីវិតធ្វើជាដើមទុន។

លោកស្រី ដាំ ដារីនី  ក៏បានផ្ដាំផ្ញើក្នុងជួរថ្នាក់ដឹកនាំរួមជាមួយយោធិនគ្រប់ថ្នាក់ ត្រូវរួមសាមគ្គីឯកភាពផ្ទៃក្នុងដោយសម្របសម្រួលទៅតាមយន្តការគ្រប់គ្រងរបស់វិទ្យាស្ថាន ព្រមទាំងគោរពឲ្យបានម៉ឺងម៉ាត់រាល់បទបញ្ជាច្បាប់ និងលក្ខន្តិកៈទូទៅរបស់កងយោធពលខេមរភូមិន្ទ ឱ្យបានខ្ជាប់ខ្ជួនបំផុត៕