សប្តាហ៍​ទី​៤ នា​រាត្រីថ្ងៃទី២២ខែកុម្ភៈនេះ ផ្លូវថ្មើជើង Walk Street បន្ថែមការរៀបចំឱ្យមានរបាំបុរាណ និងការតាំងវត្ថុអនុស្សាវរីយ៍ចាបុី

ភ្នំពេញ ៖ ផ្លូវថ្មើជើង Walk Street ក្នុងសប្តាហ៍ទី៤ នារាត្រីថ្ងៃទី២២ខែកុម្ភៈឆ្នាំ២០២៥នេះ រដ្ឋបាលរាជធានីភ្នំពេញ បាន​រៀប​ចំ​បន្ថែម ឱ្យមានរបាំបុរាណ ការតាំងវត្ថុអនុស្សាវរីយ៍ចាបុី ,ក្រុមគូរគំនូរ និងតាំងបង្ហាញនៅមុខព្រះបុរមរាជាវាំងថែមទៀត។

លោក​ស្រី​ ដោ សម្ផស្ស នាយិការ​រងរដ្ឋបាលនិងជាអ្នកនាំពាក្យ​រដ្ឋបាលរាជធានីភ្នំពេញ​បាន​ឱ្យ​ដឹង​ថា ផ្លូវថ្មើជើង Walk Street នាសប្តាហ៍ទី៤ក្នុងរាត្រីថ្ងៃសៅរ៍ ទី២២ខែកុម្ភៈ ឆ្នាំ២០២៥នេះ អនុវត្តទៅតាមការចង្អុលបង្ហាញរបស់ លោកឃួង ស្រេង អភិបាលនៃគណៈអភិបាលរាជធានីភ្នំពេញ រដ្ឋបាលរាជធានីភ្នំពេញ បានរៀបចំបន្ថែមនៅ របាំបុរាណ ( សុវណ្ណមច្ឆា),ចាបុីដងវែង និងដាក់តាំងវត្ថុអនុស្សាវរីយ៍ចាបុី ,វង់ភ្លេងមហោរី (ច្រៀង និងរាំលេង)ផងដែរ។ ជាមួយគ្នានេះ យើងក៏បានរៀបចំឱ្យមានក្រុមគូរគំនូរ និងតាំងបង្ហាញនៅមុខព្រះបុរមរាជាវាំងថែមទៀត។

ចំណែកការរៀបចំគ្រប់យ៉ាងទៀត ដែលមានកាលពីសប្តាហ៍ទីមុន គឺនៅរក្សាដដែរ ដូចជាការតាំងលក់វត្ថុអនុស្សាវរីយ៍ នៅលើសួនច្បារតាមបណ្តោយមាត់ទន្លេ ការគូសគំនូរយកភ្លាម ការកាច់ប៉ោងៗ ការសម្តែងតន្ត្រីបុរាណ, មហោរី និងរបាំប្រពៃណី របស់មន្ទីរវប្បធម៌ វិចិត្រសិល្បៈរាជធានីភ្នំពេញ,រៀបចំបណ្ណាល័យចល័ត សម្រាប់អានសៀវភៅ ,គូសគំនូរ និង ផាត់ព័ណ៌ជាដើម។

សម្រាប់​រដ្ឋាករស្វ័យ័តដឹកជញ្ជូនសាធារណៈ(រថយន្តក្រុង) ក៏នៅតែរក្សាតម្រាយខ្សែរត់ និងបន្ថែម ម៉ោងប្រតិបត្តិការរបស់រថយន្តក្រុងចំនួន ៣ខ្សែដដែលដើម្បីគាំទ្រដល់គម្រោងផ្លូវថ្មើរជើង។ ចំពោះការរៀបចំត្រីចក្រយានកម្ពុជា(ស៊ីក្លូ) ក្នុងមួយថ្ងៃចំនួន ១០គ្រឿង ដើម្បីផ្តល់សេវាដឹកជញ្ជូនភ្ញៀវទេសចរណ៍ទស្សនាកម្សាន្តតាមបណ្តោយតីរវិថីព្រះស៊ីសុវត្ថិក៏នៅបានរក្សាដដែលផងដែរ។

គួរ​បញ្ជាក់​ថា ផ្លូវថ្មើរជើង (Walk Street) ត្រូវ​បានរដ្ឋបាលរាជធានីភ្នំពេញ​ដាក់ឱ្យ​ដំណើរការសាកល្បង២ថ្ងៃ ក្នុង​១សប្ដាហ៍ គឺ​ថ្ងៃសៅនិងថ្ងៃអាទិត្យ​ចាប់ពីម៉ោង៦ល្ងាចដល់ម៉ោង១១យប់ នៅ​តាមបណ្តោយតីរវិថីព្រះស៊ីសុវត្ថិ ចាប់ពី​វិថីបក្សីចាំក្រុង (ផ្លូវលេខ៩៤) រហូត​ដល់​មុខព្រះបរមរាជវាំង៕

ដោយ ៖ ស្រីរ័ត្ន