មន្ត្រីជាន់ខ្ពស់សុខាភិបាល ថា ការផ្ដល់សេវានៅមន្ទីរពេទ្យខេត្តពោធិ៍សាត់ គឺល្អប្រសើរ និងរហ័សជាងមុន

វេជ្ជបណ្ឌិត ង៉ូវ កាង រដ្ឋលេខាធិការក្រសួងសុខាភិបាល មើលឃើញថា បច្ចេកទេស ហេដ្ឋារចនាសម្ព័ន្ធ និងការផ្តល់សេវាកម្មនៅមន្ទីរពេទ្យខេត្តពោធិ៍សាត់មានការល្អប្រសើរយ៉ាងឆាប់រហ័សក្នុងរយៈពេលមួយឆ្នាំចុងក្រោយនេះ។ នេះបើតាមការផុសរបស់ផេកក្រសួងសុខាភិបាល នាព្រឹកថ្ងៃទី២៣ ខែកុម្ភៈ នេះ។

ការលើកឡើងរបស់វេជ្ជបណ្ឌិត ង៉ូវ កាង ធ្វើឡើងស្របពេលដែលលោក បានដឹកនាំក្រុមការងារចុះអភិបាលគាំទ្រ និងពិនិត្យវឌ្ឍនភាពការផ្ដល់សេវាសុខាភិបាលនៅមន្ទីរពេទ្យខេត្តពោធិ៍សាត់ ជុំទី៣ កាលពីថ្ងៃទី២០ ខែកុម្ភៈ ឆ្នាំ២០២៥។

អំឡុងពេលចុះពិនិត្យ លោក ង៉ូវ កាង បានពិនិត្យនៅតាមផ្នែកផ្ដល់សេវាជាពិសេសផ្នែកពិគ្រោះជំងឺក្រៅ ផ្នែកសង្គ្រោះបន្ទាន់ ផ្នែកវះកាត់ និងផ្នែកដទៃទៀតនៅក្នុងមន្ទីរពេទ្យ។ លោកក៏ សង្កេតឃើញថាមន្ទីរពេទ្យមានការផ្លាស់ប្ដូរកែសម្រួលហេដ្ឋារចនាសម្ព័ន្ធ និងការផ្ដល់សេវាបានល្អប្រសើរយ៉ាងឆាប់រហ័សក្នុងរយៈពេលមួយឆ្នាំចុងក្រោយមកនេះ។ បន្ទាប់ពីនេះ លោកក៏បានជួបប្រជុំជាមួយនឹងថ្នាក់ដឹកនាំមន្ទីរពេទ្យ ប្រធានផ្នែក និងក្រុមគ្រូពេទ្យនៃមន្ទីរពេទ្យខេត្តពោធិ៍សាត់ ដើម្បីផ្ដល់ព័ត៌មានត្រឡប់ និងលើកយកចំណុចខ្វះខាតដើម្បីធ្វើការកែលម្អ។

វេជ្ជបណ្ឌិត ង៉ូវ កាង បានលើកទឹកចិត្តដល់បុគ្គលិកទាំងអស់នៃមន្ទីរពេទ្យខេត្តពោធិ៍សាត់ ដែលបានខិតខំផ្ដល់សេវាសុខាភិបាលជូនពលរដ្ឋដែលមកទទួលសេវា នឹងបានណែនាំឱ្យថ្នាក់ដឹកនាំមន្ទីរពេទ្យពិនិត្យមើលចំណុចខ្វះខាតមួយចំនួនដើម្បីធ្វើការកែលម្អដូចជា រៀបចំរំហូរអ្នកជំងឺចូលពិគ្រោះជំងឺក្រៅ និងរៀបចំផ្នែកពិគ្រោះជំងឺក្រៅឱ្យបានល្អស្អាតជាងពេលបច្ចុប្បន្ននេះបន្ថែមទៀត ដើម្បីផ្ដល់ភាពងាយស្រួលដល់ ប្រជាពលរដ្ឋមកប្រើប្រាស់សេវា និងយកចិត្តទុកដាក់បង្កើនសមត្ថភាពការងារបច្ចេកទេសផ្នែកសង្គ្រោះបន្ទាន់កម្រិតធ្ងន់ និងផ្នែកវះកាត់របស់មន្ទីរពេទ្យ៕