ព័ត៌មានជាតិ
កម្ពុជា គ្រោងនឹងបញ្ជូនក្រុមការងារអន្តរក្រសួង ទៅបន្តសុពលភាពលិខិតធ្វើដំណើរដល់ពលករខ្មែរធ្វើការនៅថៃ
កម្ពុជា គ្រោងនឹងបញ្ជូនក្រុមការងារអន្តរក្រសួងទៅបន្តសុពលភាពលិខិតធ្វើដំណើរដល់ពលករខ្មែរកំពុងធ្វើការ និងស្នាក់នៅប្រទេសថៃនាពេលខាងមុខ។
ក្នុងនោះ ដើម្បីឲ្យពួកគេទទួលបាននូវការគាំពារផ្នែកផ្លូវច្បាប់ និងអត្ថប្រយោជន៍ផ្សេងៗដូចពលករដទៃទៀតដែរ។
គម្រោងបញ្ជូនក្រុមការងារអន្តរក្រសួងទៅថៃនេះ ធ្វើឡើងបន្ទាប់ពីភាគីថៃ បានត្រៀមសម្របសម្រួលជាមួយស្ថាប័នពាក់ព័ន្ធរបស់ខ្លួន ដើម្បីទទួលមន្ត្រីបច្ចេកទេស នៃគណៈកម្មការផ្ដល់ភាពស្របច្បាប់ដល់ពលករកម្ពុជាដែលកំពុងស្នាក់នៅ និងធ្វើការនៅប្រទេសថៃ។ បន្ថែមពីនោះ ដើម្បីជួយបង្កើនល្បឿនក្នុងការផ្ដល់សុពលភាពឯកសារ និងគ្រប់គ្រងទិន្នន័យពលករ សម្រាប់ទទួលបានការគាំពារ និងអត្ថប្រយោជន៍សន្តិសុខសង្គមនៅពេលបញ្ចប់កិច្ចសន្យាការងារ។
ថ្លែងក្នុងកិច្ចប្រជុំទ្វេភាគីកាលពីរាត្រីថ្ងៃទី០៥វិច្ឆិកា តាមរយៈប្រព័ន្ធវីដេអូជាមួយ លោក ស៊ូរ៉ាឆៃ ឆៃ ត្រាក់គុលថង អនុរដ្ឋមន្ត្រីក្រសួងការងារថៃ លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានមានប្រសាសន៍ថា ចំពោះការងារនេះ ភាគីកម្ពុជា នឹងស្នើសុំគោលការណ៍រដ្ឋាភិបាល ដើម្បីបញ្ជូនក្រុមការងារបច្ចេកទេស នៃគណៈកម្មការផ្ដល់ភាពស្របច្បាប់ដល់ពលករកម្ពុជាដែលកំពុងស្នាក់នៅ និងធ្វើការនៅប្រទេសថៃ រួមមាន ៖ ក្រសួងការងារ និងបណ្តុះបណ្តាលវិជ្ជាជីវៈ ក្រសួងមហាផ្ទៃ និងស្ថានឯកអគ្គរាជទូតព្រះរាជាណាចក្រកម្ពុជាប្រចាំប្រទេសថៃដើម្បីធ្វើការបន្តសុពលភាពលិខិតធ្វើដំណើរពលករកម្ពុជាធ្វើការនៅបរទេសតាមរយៈប្រព័ន្ធស្វ័យប្រវត្តិកម្ម និងសម្របសម្រួលជាមួយភាគីថៃក្នុងការផ្ដល់ភាពស្របច្បាប់ដល់ពលករកម្ពុជា។
លោកបណ្ឌិត អ៊ិត សំហេង ដែលជាប្រធានគណៈកម្មការផ្ដល់ភាពស្របច្បាប់ដល់ពលករកម្ពុជាកំពុងស្នាក់នៅ និងធ្វើការនៅប្រទេសថៃផងដែរនោះ បានបន្តថា ក្នុងជំនួបនោះ ភាគីទាំងពីរបានឯកភាពគ្នាបន្តកិច្ចសន្យាការងាររយៈពេលពីរឆ្នាំថែមទៀតចំពោះពលករដែលបានបញ្ជូនតាមរយៈអនុស្សរណៈ នៃការយោគយល់គ្នា ហើយត្រូវបញ្ចប់កិច្ចសន្យាការងាររយៈពេល៤ឆ្នាំ ចាប់ពីថ្ងៃទី០១ខែវិច្ឆិកា ឆ្នាំ២០២០ រហូតដល់ការរីករាលដាល នៃជំងឺកូវីដ-១៩ អាចគ្រប់គ្រងបាន ដោយពុំចាំបាច់ធ្វើមាតុភូមិនិវត្តន៍មកកម្ពុជាវិញ។ ប៉ុន្តែបន្ទាប់ពីបញ្ចប់កិច្ចសន្យាការងារបន្តរយៈពេលពីរឆ្នាំហើយពលករទាំងនោះ នឹងត្រូវត្រឡប់មកកម្ពុជាវិញ ដោយមិនអនុញ្ញាតឲ្យបន្តកិច្ចសន្យាទៀតទេ។
លោករដ្ឋមន្ត្រី បានបន្ថែមទៀតថា ភាគីទាំងពីរបានឯកភាពគ្នាលើការបញ្ជូន និងទទួលពលករកម្ពុជាទៅធ្វើការតាមរដូវកាលនៅតាមបណ្ដាខេត្តជាប់ព្រំដែនកម្ពុជា-ថៃ។ ជាមួយនោះ ដោយភាគីទាំងពីររៀបចំស្នើសុំគោលការណ៍ពីរាជរដ្ឋាភិបាលរបស់ខ្លួន ដើម្បីបើកច្រកព្រំដែនសម្រាប់បញ្ជូន និងទទួលពលករកម្ពុជា ហើយត្រូវអនុវត្តតាមវិធានសុខាភិបាល នៃប្រទេសទាំងពីរ។
លើសពីនេះទៀត ភាគីទាំងពីរ បានពិភាក្សាគ្នាទៅលើបច្ចេកទេស និងនីតិវិធី នៃការជ្រើសរើស និងបញ្ជូនពលករកម្ពុជាទៅធ្វើការនៅប្រទេសថៃ តាមរយៈអនុស្សរណៈ នៃការយោគយល់គ្នាក្នុងកំឡុងពេលការរាលដាល នៃជំងឺកូវីដ-១៩ អនុលោមតាមវិធានសុខាភិបាលប្រទេសទាំងពីរ និងបានសន្យារួមគ្នាបង្ការ និងទប់ស្កាត់ភាពមិនប្រក្រតី នៃផ្ដល់ភាពស្របច្បាប់ជូនពលករ និងរួមគ្នាទប់ស្កាត់ការឆ្លងដែនទៅធ្វើការខុសច្បាប់ផងដែរ។
សូមរំលឹកថា កាលពីថ្ងៃទី១១ ខែកញ្ញា ឆ្នាំ២០១៧ កន្លងទៅនេះ រាជរដ្ឋាភិបាលកម្ពុជា បានបញ្ជូនក្រុមការងារអន្តរក្រសួងចំនួន៣៦០នាក់ ចែកជា៣ក្រុម ទៅកាន់ប្រទេសថៃ ដើម្បីចុះទៅធ្វើលិខិតបញ្ជាក់អត្តសញ្ញាណជូនដល់ពលករខ្មែរដែលកំពុងស្នាក់នៅ និងធ្វើការនៅប្រទេសថៃឲ្យមានភាពស្របច្បាប់ ខណៈបច្ចុប្បន្នមានពលករកម្ពុជាកំពុងធ្វើការ និងស្នាក់ប្រទេសថៃប្រមាណជាង១លាននាក់៕
អត្ថបទ ៖ សំអឿន
-
ព័ត៌មានជាតិ៥ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៣ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានអន្ដរជាតិ១ សប្តាហ៍ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ៣ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ព័ត៌មានជាតិ៣ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
ជីវិតកម្សាន្ដ១ សប្តាហ៍ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
សេដ្ឋកិច្ច៤ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានជាតិ៣ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ